16-تۋر ويىندارىنا شولۋ جاساعانىمىزدا «قايراتتىڭ» كەلەسى تۋردا «ورداباسىمەن» كەزدەسەتىنىن, ەگەر وسى ويىندا الماتىلىقتار جەڭىسكە جەتەتىن بولسا مەرزىمىنەن بۇرىن چەمپيوندىقتى تويلايتىنىن جازعان بولاتىنبىز. مۇنى ساۋەگەيلىك دەپ كولگىرسىمەي-اق قويايىق. ايتپاعىمىز, قازاقستان كاسىپقوي فۋتبول ليگاسىنىڭ باسشىسى ولجاس ابراەۆ تا وسى ماتچتا چەمپيوندىق انىقتالىپ قالار دەگەن ۇمىتپەن الماتىنىڭ ورتالىق ستاديونىنا چەمپيوندىق «التىن تاباق» پەن فۋتبولشىلارعا بەرىلەتىن التىن مەدالدى الا بارعان ەكەن. ءسويتىپ بولجام ءدال كەلىپ, ماتچ سوڭىندا «قايرات» كومانداسىن بىردەن التىن جۇلدەسىمەن ماراپاتتادى. ەستەرىڭىزدە بولسا, ولجاس ابراەۆ بىلتىر دا «استانا» التىنشى مارتە باس جۇلدەنى ولجالاعاندا چەمپيوندىق توندونى قوستانايعا الىپ بارعان-دى.
ورتالىق ستاديونداعى وتكەن كەزدەسۋگە توقتالار بولساق, ماتچتىڭ العاشقى جارتى ساعاتى تەڭ دارەجەدە ءوتتى. ەكى كوماندا گول سوعۋدىڭ جولىن قاراستىرىپ, ءبىراز شابۋىل ۇيىمداستىردى. بۇل كەزدەسۋدە جەڭىس «قايراتقا» قانشالىقتى ماڭىزدى بولسا, «ورداباسىعا» دا ءۇش ۇپاي اۋاداي قاجەت ەدى. ويتكەنى شىمكەنتتىڭ كومانداسى بيىل دا ۇزدىك ۇشتىكتەن كورىنىپ, كەلەسى جىلى دا ەۋروكۋبوك باسەكەلەرىنە قاتىسۋعا نيەتتى. الايدا كوماندالىق رۋح, جەڭىسكە دەگەن جىگەر جانە فۋتبولشىلاردىڭ جەكەلەي تاجىريبەسى جاعىنان «قايرات» كومانداسى قارسىلاستارىنان ءبىر باس جوعارى بولدى. ناتيجەسىندە, ماتچتىڭ ەسەبىن ويىننىڭ 36-مينۋتىندا «قايراتتىڭ» برازيليالىق شابۋىلشىسى ۆاگنەر لاۆ اشتى. ارادا 3 مينۋت وتكەندە «ورداباسى» فۋتبولشىلارى ءوز ايىپ الاڭىندا ەرەجە بۇزعان سوڭ, باس تورەشى ەش ويلانباستان «ورداباسى» قاقپاسىنا پەنالتي بەلگىلەدى. 11 مەترلىك ايىپ دوبىن ءساتتى ورىنداعان نۇرالى ءالىپ كومانداسىنىڭ ەكىنشى گولىن سوعىپ, ويىننىڭ ەسەبىن ەسەلەي ءتۇستى. قوناقتار ۇزىلىسكە دەيىن ەسەپ ايىرماسىن قىسقارتۋعا قانشا تىرىسقانىمەن, شابۋىلدارى ءساتسىز اياقتالىپ جاتتى. كوماندالار ۇزىلىسكە 2:0 ەسەبىمەن شىقتى.
ءبىرىنشى تايمدا ەكى دوپ باسىمدىعىنا يە بولعان «قايرات» ويىنشىلارى ەكىنشى تايمدى وتە سىلبىر باستادى. ءسويتىپ 77-مينۋتتا «ورداباسى» كومانداسىنىڭ برازيليالىق شابۋىلشىسى جواو پاۋلو «قايرات» قاقپاشىسى ستاس پوكاتيلوۆتى قاپى قالدىرىپ, ەسەپ ايىرماسىن قىسقارتتى. بۇل – جواو پاۋلونىڭ چەمپيوناتتاعى 11-گولى. وسى گولىنىڭ ارقاسىندا ول ەل بىرىنشىلىگىندەگى سۇرمەرگەندەر تىزىمىندە كوش باستادى. بىراق «ورداباسىنىڭ» قۋانىشى ۇزاققا سوزىلمادى. الاڭ يەلەرى بۇل گولعا كوپ ۇزاماي-اق جاۋاپ قاتتى. ويىننىڭ 80-مينۋتىندا نەبويشا كوسوۆيچ ارىپتەستەرىنە اسىرعان دوپتى قايتارامىن دەپ ۇمتىلعان «ورداباسىنىڭ» ويىنشىسى ۇلار جاقسىباەۆ ابايسىزدا ءوز قاقپاسىنا گول سوعىپ الدى. بۇل – شىمكەنتتىك كلۋبتىڭ وسى ماۋسىمداعى ءتورتىنشى اۆتوگولى.
«ورداباسى» كلۋبىن 3:1 ناتيجەسىمەن جەڭگەن «قايرات» بۇل ويىننان كەيىن چەمپيوناتتاعى تۋرنير كەستەسىندە 44 ۇپاي جيناپ, مەرزىمىنەن بۇرىن چەمپيون اتاندى. وسىلايشا, «قايرات» بيىل 16 جىلدان (2004) كەيىن ءبىرىنشى مارتە التىن جۇلدەگە قول جەتكىزىپ قانا قويماي, كەيىنگى التى جىلدا التى رەت چەمپيون اتانعان «استانانى» «تاقتان» قۇلاتتى. وسىلايشا, «قايرات» ءوز تاريحىندا ءۇشىنشى مارتە ەل چەمپيونى دەگەن مارتەبەلى اتاققا يە بولدى.
ماتچتان كەيىن «قايراتتىڭ» باس باپكەرى الەكسەي شپيلەۆسكي چەمپيوندىققا قالاي قول جەتكىزگەنى تۋرالى ايتىپ بەردى. «ارينە, ۇزاق كۇتتىرگەن چەمپيوندىق اتاققا قول جەتكىزگەنىمىزگە قۋانىشتىمىن. اسىرەسە, كلۋب پرەزيدەنتى قايرات بورانباەۆ ءۇشىن. ويتكەنى ول ماعان سەنىم ءبىلدىرىپ, كومانداعا شاقىردى. ال مەن سول سەنىمدى اقتاي الدىم دەپ ويلايمىن. قازاقستانعا كەلە سالا «قايراتپەن» بىرگە بىردەن چەمپيون بولامىن دەگەن سەنىم بولعان جوق. بىراق كلۋبتاعى العاشقى جۇمىس كۇنىنەن باستاپ جىگىتتەرگە قالاي دا چەمپيون بولۋىمىز كەرەك ەكەنىن ءتۇسىندىرىپ, سول ماقساتقا جەتۋىمىز ءۇشىن بارىمىزدى سالدىق. مىنە, ەكى جىلدىق جۇمىسىمىزدىڭ جەمىسىن كورىپ وتىرمىز. ءبىز بيىلعى چەمپيوندىققا لايىق ونەر كورسەتتىك دەپ ويلايمىن», دەيدى باس باپكەر. تاعى ءبىر ايتا كەتەرلىگى, الەكسەي شپيلەۆسكي – قازاقستان چەمپيوناتىنىڭ تاريحىندا التىن جۇلدەنى جەڭىپ العان ەڭ جاس جاتتىقتىرۋشى. 32 جاستاعى بەلارۋس مامانى وسىلايشا ىشكى چەمپيوناتتىڭ تاريحىنا وزگەرىس ەنگىزدى.
قازىرگى تاڭدا الەۋمەتتىك جەلىدە «قايراتتىڭ» چەمپيوندىعىنا بايلانىستى فۋتبول ماماندارى مەن جانكۇيەرلەرىنىڭ پىكىرى ەكىگە جارىلعان. ءبىرىنشى تاراپ پاندەمياعا بايلانىستى بارلىق ماتچ الماتىدا وتكەن سوڭ «قايرات» ءوز الاڭىندا ويناپ, باسىمدىققا يە بولدى. ءبىر-ەكى ويىندى ەسەپكە الماعاندا بارلىق كەزدەسۋىن جاساندى الاڭدا وتكىزىپ, چەمپيوندىققا قول جەتكىزدى دەپ ەسەپتەيدى. ال ەكىنشى تاراپ ويىنداردىڭ ءبارى ءبىر قالادا ءوتتى دەمەسەك, بارلىق كومانداعا بىردەي جاعداي جاسالعان دەگەن قارسى ۋاجدەرىن ايتۋدا. سونداي-اق «استانانىڭ» بيىلعى ساتسىزدىگىنە جانە چەمپيون اتانا الماعانىنا كلۋبتىڭ ىشكى جاعدايى اسەر ەتتى دەيدى.
ەندى ىشكى چەمپيوناتتا باس جۇلدەنى ۋىسىنان شىعارىپ العان «استانا» بارلىق كۇش-جىگەرىن قالايدا ەكىنشى ورىندى ۇستاپ قالۋ ءۇشىن جۇمسايتىنى انىق. الايدا «توبىل» مەن «ورداباسى» دا «اي قاراپ» تۇرمايتىنى بەلگىلى. سوندىقتان بىرىنشىلىكتە چەمپيوندىق بايگەگە قاراعاندا, ەكىنشى جانە ءۇشىنشى ورىن ءۇشىن وتەتىن تالاس تارتىستى بولايىن دەپ تۇر. بىلتىر ءۇشىنشى ورىنعا تابان تىرەگەن شىمكەنتتىڭ «ورداباسى» كلۋبى «قايراتتان جەڭىلگەننەن كەيىن 27 ۇپايمەن ءتورتىنشى ورىنعا ءتۇسىپ قالدى.
سونداي-اق وسى تۋردا «قايساردىڭ» قاقپاسىنا جاۋاپسىز ءۇش گول سوعىپ, جەڭىسكە جەتكەن قوستانايلىقتار 29 ۇپايمەن تۋرنير كەستەسىندە ەكىنشى ورىنعا كوتەرىلىپ الدى. كەزدەسۋدەگى گولداردى سەنين سەباي (53-مينۋت), جەرەمي مانزوررو (58-مينۋت) جانە سامات جارىنبەتوۆ (77-مينۋت) سوقتى. گازەت بەتتەلىپ جاتقاندا «استانا» «تاراز» كلۋبىمەن كەزدەسىپ جاتقان بولاتىن. وسى ويىننىڭ ناتيجەسىن ەسەپكە الماعاندا, «استانا» 27 ۇپايمەن ءۇشىنشى ورىندا تۇر. بىراق ەلوردالىقتار «توبىلعا» قاراعاندا ەكى ويىن كەم وتكىزگەن.
