اتالمىش قۇجات ەلباسىنىڭ يدەيالارى مەن باستامالارىن ىلگەرىلەتۋدى, بىرلەسكەن مادەني-ءبىلىم بەرۋ, عىلىمي-ىزدەنىس جوبالاردى ىسكە اسىرۋدى كوزدەيدى. مەموراندۋم اياعىنداعى نەگىزگى سەرىكتەستىك زەرتتەۋ باعدارلامالارىن, عىلىمي-پراكتيكالىق ءىس-شارالاردى (كونفەرەنتسيا, فورۋم, سەمينار, ت.ب.) ۇيىمداستىرۋعا, اقپارات الماسۋعا نەگىزدەلەدى.
كەلىسىمگە قولدى ەلباسى كىتاپحاناسىنىڭ ديرەكتورى ءامىرحان راحىمجانوۆ پەن قازاقستان رەسپۋبليكاسى ءبىلىم جانە عىلىم ءمينيسترى اسحات ايتماعامبەتوۆ قويدى.
"ىنتىماقتاستىق مەموراندۋمى تۇڭعىش پرەزيدەنتتىڭ جاھاندىق يدەيالارى مەن ىشكى جانە سىرتقى ساياسات باستامالارىنا اقپاراتتىق-يميدجدىك قولداۋ كورسەتۋگە, قازاقستاننىڭ دامۋىنا, جالپى الەمدىك قاۋىپسىزدىك جۇيەسىن قالىپتاستىرۋعا قوسقان ەلباسىنىڭ ۇلەسىن جان-جاقتى زەرتتەۋگە باعىتتالعان جۇمىسىمىزدى كۇش جۇمىلدىرادى اتقارۋعا ىقپال ەتەدى دەپ ويلايمىن", – دەدى ءا.راحىمجانوۆ.
قازاقستان رەسپۋبليكاسى ءبىلىم جانە عىلىم ءمينيسترى اسحات ايتماعامبەتوۆ ەلباسى كىتاپحاناسىمەن بىرلەسكەن جۇمىستىڭ قازاقستانداعى ءبىلىم سالاسىنا ماڭىزدىلىعىن اتاپ ءوتتى:
"ەلباسى كىتاپحاناسى مۋزەيىنىڭ جاڭا عيماراتىندا ەلىمىزدىڭ تاريحى تۇنىپ تۇر. "رۋحاني جاڭعىرۋ" اتتى ەلباسى باعدارلاماسى نەگىزىندە بالالار سوڭعى تەحنولوگيالارمەن جابدىقتالعان مەكەمەدە قۇندى اقپاراتپەن ءبىلىمىن تەرەڭدەتە تۇسەدى. بۇل باعىتتا ۇلكەن جۇمىس اتقارىلدى. جاۋاپتى ءىس جالعاسىن تابا بەرمەك. مۋزەيگە مەكتەپ, كوللەدج, جوعارعى وقۋ ورىندارىنىڭ ءبىلىم الۋشىلارى كەلەتىن بولادى. دوڭگەلەك ۇستەل, سيمپوزيۋم, كونفەرەنتسيا سياقتى شارالار وتكىزىلەدى. جوسپارلانعان جۇمىس اۋقىمى ءۇمىتتى اقتايتىنىنا سەنەمىن", – دەدى اسحات ايماعامبەتوۆ.
ءىس-شارا بارىسىندا "قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا. نازارباەۆتىڭ الەمنىڭ جەتەكشى ۋنيۆەرسيتەتتەرىندە وقىعان دارىستەرى" كىتابىنىڭ باسىلىمدىق جانە ەلەكتروندىق نۇسقالارىنىڭ تۇساۋى كەسىلدى. جوبانىڭ باس رەداكتورى – قازاقستان رەسپۋبليكاسى تۇڭعىش پرەزيدەنتى – ەلباسى كەڭسەسىنىڭ باسشىسى, ساياسي عىلىمداردىڭ دوكتورى, پروفەسسور ماحمۇد بازارقۇل ۇلى قاسىمبەكوۆ.
قاتىسۋشىلاردىڭ نازارىنا كىتاپتىڭ مازمۇنىن, ماقسات-مىندەتىن تانىستىراتىن بەينەروليك ۇسىنىلدى. ونىڭ اياسىندا الەمنىڭ جەتەكشى ۋنيۆەرسيتەتتەرىندە ەلباسىنىڭ ءسوز سويلەگەن ساتتەرى كورسەتىلدى.
ءبىلىم جانە عىلىم مينيسترىنە اتالمىش كىتاپ پەن باسىلىمنىڭ ەلەكتروندى نۇسقاسى جازىلعان ديسك ەلىمىزدەگى جوعارعى وقۋ ورىندارىنا تاراتۋعا بەرىلىپ, ەستەلىككە ەلباسى كىتاپحاناسى ۇجىمىنىڭ اۆتورلىق باسىلىمدارى تارتۋ ەتىلدى.
