راسىندا دا اقشاسىن تولەپ, جازىلعان سوڭ اركىم دە ءوزى الاتىن باسىلىمدى دەر كەزىندە وقىعىسى كەلەدى. بۇگىندە ينتەرنەتتىڭ زامانى دەسەك تە, ءالى كۇنگە دەيىن اعا بۋىن وكىلدەرى كەز كەلگەن جاڭالىقتى سايتتاردان ەمەس, گازەتتەردەن وقيدى. الايدا كەي جاعدايدا ونىڭ ءوزى دە مۇمكىن بولماي وتىر. بۇل رەتتە كوپشىلىك پوشتا قىزمەتىنىڭ جۇمىسىن سىنعا الىپ جاتادى. وقىرماننىڭ بازىناسى ورىندى دا.
جۋىردا عانا شۋ قالاسىنداعى «قوسقۇدىق» اۋدانىنىڭ تۇرعىنى دۋمان قياش ۇلى ەسىمدى وقىرمان گازەتتىڭ ۇيىنە ۋاقتىلى كەلمەيتىنىن ايتىپ, رەداكتسياعا حات جازعان بولاتىن. سول حاتىندا ول «قوسقۇدىق» اۋدانىنداعى پوشتا قىزمەتىنىڭ ناشارلىعىن, ءتىپتى جۇمىس ىستەمەيتىندىگىن ايتقان. «قايبىر جىلدارى سىزدەردىڭ رەداكتسيا گازەت باعاسىنىڭ جارتى قۇنىن تاسىمالداۋشى ۇيىم الاتىنىن جازعان بولاتىن. ال ەندى گازەتتى تاراتىپ بەرۋگە كەلگەندە «قازپوشتا» بولىمشەسى نەمقۇرايدىلىق تانىتىپ وتىر. ءبىراز جىل بۇرىن اپتاسىنا ءبىر رەت تاراتتى. كەيىنىرەك ايىنا ءۇش رەت اكەلەتىن ەدى. سوڭعى كەزدە گازەتتەردى ايلاپ اكەلمەيدى. پوشتاعا سەبەبىن بىلۋگە بارعان سايىن كۆيتانتسيانى تەكسەرىپ, «جەتكىزىپ بەرەمىز» دەگەن سوزدەن ءارى اسپايدى. ايتاتىندارى – «ايلىق از, بىزگە ەشكىم جۇمىسقا كەلمەيدى» دەگەن ءسوز. تىپتەن «گازەتكە نە ءۇشىن جازىلاسىڭ؟» دەگەندى دە شىعاردى. سوندا سول قىزمەتكەر ايلىقتى نە ءۇشىن الاتىنىن بىلمەگەنى مە؟.. بارا بەرگەن سوڭ, جاقىندا پوشتا قىزمەتكەرى 2,5 ايلىق گازەتتەرىمىزدى الىپ كەلدى. گازەت-جۋرنال جىلىنا ءبىر رەت الاتىن وتىن-سۋ ەمەس قوي. ايتا بەرسەڭ پوشتانىڭ كەمشىلىكتەرى جەتەرلىك», دەيدى ول.
شىنىندا دا, تۇرعىننىڭ بازىناسى ورىندى. ەگەر شىنىمەن جازىلعان باسىلىمدارىن ۋاقىتىندا الا الماي وتىرسا, كىم دە بولسىن شاعىمدانادى. ماسەلەنىڭ انىق-قانىعىن بىلمەككە اۋەلى شۋ اۋداندىق پوشتا تورابىنىڭ باسشىسى انارحان سرايىلوۆاعا حابارلاستىق. ول «قوسقۇدىق» اۋدانىنداعى پوشتا بولىمشەسى تاڭەرتەڭگى ساعات 10:00-دەن 15:00-گە دەيىن عانا جۇمىس ىستەيتىنىن, 4 حات تاسۋشىنىڭ بار ەكەنىن ايتتى. «جالپى, اۋدان بويىنشا 20 بولىمشە بار. شۋ قالاسىندا 4 بولىمشە جۇمىس ىستەيدى. بىراق بىزگە بەيسەنبى كۇنى شىعاتىن گازەت-جۋرنالدار سەنبى كۇنى ءبىر-اق كەلەدى. ءبىزدىڭ قىزمەتكەرلەر ونى جازىلعان كىسىلەردىڭ ۇيلەرىنە جەتكىزىپ بەرەدى», دەيدى انارحان سرايىلوۆا. ياعني, بەيسەنبى كۇنى شىققان كەز كەلگەن گازەت تاراز قالاسىنان شۋ قالاسىنا ەكى كۇننەن كەيىن عانا جەتەدى. وقىرماننىڭ شاعىمى وسى جەردەن باستالادى. گازەت-جۋرنالدىڭ كەشىگۋى, تۇرعىنداردىڭ قولىنا دەر كەزىندە تيمەۋى ماسەلەسىنىڭ ءبىرىنشى سەبەبى.
بىراق ءتيىستى باسشىلاردىڭ سوزىنشە, مۇنىڭ بىرنەشە سەبەبى بار بولىپ شىقتى. ايتپەسە, پوشتا قىزمەتكەرلەرى كەز كەلگەن باسىلىمدى ۋاقىتىندا ءاربىر ۇيگە تاراتۋعا مۇددەلى ەكەنىن جەتكىزدى. «قازپوشتا» اكتسيونەرلىك قوعامى جامبىل وبلىستىق فيليالى پوشتا, لوگيستيكا جانە ءوندىرىس ءبولىمىنىڭ باسشىسى گۇلماعيزا كەرۆەنەۆانىڭ ايتۋىنشا, وبلىستىڭ مويىنقۇم, شۋ, قورداي سياقتى شالعاي اۋداندارىنداعى اۋىلدارعا رەسپۋبليكالىق «Egemen Qazaqstan» گازەتىن كۇنبە-كۇن جەتكىزۋ, تاراتۋ مۇمكىنشىلىگى جوق ەكەن. ءبولىم باسشىسى ونىڭ سەبەبىن اتالعان باسىلىمنىڭ وبلىسقا تارايتىن تارالىمى شىمكەنت قالاسىندا باسىلاتىنىمەن ءتۇسىندىردى. بۇل رەسپۋبليكالىق «كازاحستانسكايا پراۆدا» گازەتىنە دە قاتىستى. ءتىپتى شالعاي اۋدانداردى ايتپاعاننىڭ وزىندە, وبلىس ورتالىعىنان اسا قاشىق ەمەس ت.رىسقۇلوۆ, مەركى اۋداندارىندا دا مۇنداي ماسەلە بار ەكەن. ناقتى ايتقاندا, گازەتتەر بۇل جاققا دا ۋاقىتىندا بارمايدى. قوس اۋدان توعىز جولدىڭ تورابىندا تۇرسا دا جايى وسىنداي. «اتالعان گازەتتەر اۋداندارعا مارشرۋتتار شىققانعا دەيىن, ياعني تۇنگى ساعات 2:00-گە دەيىن كەلىپ جەتكەن ارالىقتا شالعاي اۋىلدارعا تاراتىلادى. ال تاراز قالاسى بويىنشا جانە جامبىل, تالاس, سارىسۋ, بايزاق, جۋالى اۋداندارىنا قاراستى اۋىلدارعا گازەتتەر كەلىپ جەتكەن كۇنى تاراتىلادى. وبلىستىق گازەتتەر تاراز قالاسىنىڭ وزىندە باسىلاتىندىقتان, ولارعا قاتىستى مۇنداي ماسەلە جوق», دەيدى ول. سونداي-اق, ءبولىم باسشىسىنىڭ ايتۋىنشا, كەيبىر رەداكتسيالاردىڭ ءوزى گازەتتەردى باسپاحاناعا كەشىكتىرىپ جىبەرەدى ەكەن. سودان دا گازەت وقىرمان قولىنا كەش تيەدى. ال «قازپوشتا» اق جامبىل وبلىستىق فيليالى قىزمەتتەردى ۇيلەستىرۋ ءبولىمىنىڭ باسشىسى جانات اشىرىمبەت بۇگىندە وبلىس بويىنشا 106 مىڭ 248 دانا گازەت-جۋرنال تاراتىلاتىنىن جەتكىزدى.
«جامبىل وبلىسى بويىنشا 238 قۇرىلىمدىق بولىمشە بار. سونىڭ ىشىندە تاراز قالاسى بويىنشا 36, ال اۋداندار بويىنشا 202 بولىمشە حالىققا قولايلى قىزمەت كورسەتەدى. 2018 جىلدان باستاپ «قازپوشتا» اكتسيونەرلىك قوعامى سەرىكتەستىك جەلىنى دامىتۋدى بەلسەندى تۇردە باستادى. قازىرگى ۋاقىتتا وبلىستا 43 سەرىكتەس بولىمشە اشىلدى. ولاردىڭ كوپشىلىگى اۋدانداردا ورنالاسقان. «قازپوشتا» قىزمەتىن ۇسىنا وتىرىپ, كاسىپكەرلەر وزدەرىنىڭ بار كاسىبىنە قوسىمشا تابىس الۋعا مۇمكىندىك الادى. ءبىزدىڭ سەرىكتەستىك جەلىمىز بەلسەندى تۇردە ءوسىپ كەلەدى جانە اي سايىن «قازپوشتا» برەندىمەن بىرلەسىپ جۇمىس جاساعىسى كەلەتىن شاعىن-ورتا بيزنەس وكىلدەرىنىڭ سانى ارتىپ كەلەدى», دەيدى «قازپوشتا» اق جامبىل وبلىستىق فيليالىنىڭ ديرەكتورى ديدار ابدۋحالي ۇلى. تۇرعىنداردىڭ ساۋالىنا پوشتا باسشىلارىنىڭ جاۋابى وسىنداي. ولار قاي كەزدە دە وقىرماندارعا جازىلعان گازەت-جۋرنالدارىن ۋاقىتىندا تاراتۋعا كۇش سالىپ كەلە جاتقانىن ايتادى. تەك الگىندەي ماسەلەلەر عانا اۋدان, اۋىلدارداعى تۇرعىندارعا باسىلىمداردىڭ ۋاقىتىندا جەتۋىنە كەدەرگى كەلتىرەدى ەكەن.
جامبىل وبلىسى
