2045 جىلعا قاراي يادرولىق قارۋدان ازات الەمگە قول جەتكىزۋ ماقساتىنا جەتۋگە بولادى جانە وعان مۇددەلى تاراپتاردىڭ, سونىڭ ىشىندە ازاماتتىق قوعام وكىلدەرى مەن يادرولىق دەرجاۆالاردىڭ ۇكىمەتتەرىنىڭ كەڭ اۋقىمدى قاتىسۋى قاجەت. بۇل تۋرالى «پارلامەنتاريلەر يادرولىق قارۋدى تاراتپاۋ جانە قارۋسىزدانۋ ءۇشىن» ۇكىمەتتىك ەمەس حالىقارالىق ۇيىمى ۇيىمداستىرعان «ماقسات 2045: يادرولىق قارۋدى جويۋعا بىرلەسىپ شاقىرۋ» ارنايى ۆەبينارىنىڭ قاتىسۋشىلارى حابارلادى.
ونلاين فورماتتا وتكەن ءىس-شاراعا قازاقستاننىڭ بۇۇ جانىنداعى تۇراقتى وكىلى ماعجان ءىلياسوۆ, پارلامەنتارالىق وداقتىڭ قۇرمەتتى توراعاسى, «پارلامەنتاريلەر يادرولىق قارۋدى تاراتپاۋ جانە قارۋسىزدانۋ ءۇشىن» قاۋىمداستىعىنىڭ قۇرىلتايشىسى سابەر چوۋدحۋري, «IDN-InDepthNews» حالىقارالىق اقپاراتتىق اگەنتتىگىنىڭ باسقارما توراعاسى جانە باس رەداكتورى رامەش دجاۋرا, سونداي-اق ەكى جۇزدەن استام شەتەلدىك مەملەكەتتەردىڭ وكىلدەرى مەن يادرولىق قارۋسىزدانۋ سالاسىنداعى ساراپشىلار قاتىستى.
قاتىسۋشىلار يادرولىق قارۋدى تولىعىمەن جويۋدىڭ ماقساتتى كۇنى رەتىندە بۇۇ-نىڭ قۇرىلعانىنا 100 جىل تولۋىنىڭ 2045 جىلىنىڭ ساياسي سالدارىن قاراستىردى. بۇۇ-نىڭ ءجۇز جىلدىعىندا يادرولىق قارۋسىز الەمگە قول جەتكىزۋدىڭ ماڭىزدىلىعى تۋرالى يدەيانى قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ نيۋ-يوركتە بۇۇ باس اسسامبلەياسىنىڭ 70-سەسسياسىندا العاش رەت ايتقاندىعى اتاپ ءوتىلدى. «بۇل ماقساتقا جەتۋگە بولادى. جەتكىلىكتى باتىلدىقپەن, ازاماتتىق قوعامنىڭ, بۇقارالىق اقپارات قۇرالدارىنىڭ, عالىمداردىڭ, پارلامەنتشىلەردىڭ جانە يادرولىق دەرجاۆالار ۇكىمەتتەرىنىڭ قاتىسۋىمەن ءبىز بۇل ەكزيستەنتسيالدى قاۋىپتەن - قاراي يادرولىق قارۋدان 2045 جىلعا, مۇمكىن ودان دا ەرتەرەك قۇتىلا الامىز», - دەدى سابەر چوۋدحۋري.
قازاقستاننىڭ بۇۇ جانىنداعى تۇراقتى وكىلى ءوز سوزىندە ن.نازارباەۆ يادرولىق قارۋدى جويۋدى ءححى عاسىرداعى ادامزاتتىڭ ەڭ ماڭىزدى جانە شۇعىل مىندەتى دەپ اتاعانىن اتاپ ءوتتى. ەلباسىنىڭ سەمەي پوليگونىن جاۋىپ, الەمدەگى ءتورتىنشى يادرولىق ارسەنالدان باس تارتۋ تۋرالى شەشىمى جاھاندىق يادرولىق سىناقتارعا تىيىم سالۋعا جانە يادرولىق سىناقتارعا جاپپاي تىيىم سالۋ تۋرالى شارتتى قابىلداۋعا سەرپىن بەردى.
«2045 جىلعا قاراي الەمدى يادرولىق قارۋدان ارىلتۋ ءۇشىن ءبىز قازىردەن باستاپ ارەكەت ەتۋىمىز كەرەك, قازاقستان الەمنىڭ بارلىق ەلدەرىن, ۇكىمەتتىك ەمەس ۇيىمداردى, ازاماتتىق بەلسەندىلەردى, بۇقارالىق اقپارات قۇرالدارىن ءبىزدىڭ كۇش-جىگەرىمىزدى بىرىكتىرۋگە, 2045 جىلدى انىقىراق ەتۋگە شاقىرادى», - دەپ ايتتى م.ءىلياسوۆ.
قازاقستاننىڭ تۇڭعىش پرەزيدەنتىنىڭ باسقا دا سىرتقى ساياسي باستامالارى, ونىڭ ىشىندە جاھاندىق يادرولىق قاۋىپسىزدىك جونىندەگى سامميتتەردى جالعاستىرۋ مۇمكىندىگى تالقىلاندى. يادرولىق قارۋدى تولىعىمەن جويۋ - بۇل يادرولىق قارۋدى قولدانۋ نەمەسە قولدانۋ قاۋىپىنە قارسى جالعىز ءابسوليۋتتى كەپىلدىك ەكەنى اتاپ ءوتىلدى.
ۆەبينارعا قاتىسۋشىلار قازاقستاننىڭ جاھاندىق يادرولىق قارۋسىزدانۋ سالاسىنداعى كۇش-جىگەرىن جوعارى باعالادى, جاستاردى حالىقارالىق انتيادرولىق قوزعالىسقا كوبىرەك تارتۋدىڭ ماڭىزدىلىعىن اتاپ ءوتتى جانە 2045 جىلعا دەيىن يادرولىق قارۋسىز الەمگە قول جەتكىزۋ بويىنشا ۇسىنىستار ازىرلەۋ ءۇشىن وسىنداي تاقىرىپتىق پىكىرتالاستار سەرياسىن جالعاستىرۋعا كەلىستى.
بۇعان دەيىن, 2020 جىلدىڭ 2 قازانىندا قازاقستان سىرتقى ىستەر ءمينيسترى مۇحتار تىلەۋبەردى بۇۇ باس اسسامبلەياسىنىڭ 75-سەسسياسىنىڭ شەڭبەرىندە يادرولىق قارۋدى جويۋدىڭ حالىقارالىق كۇنىنە ارنالعان جوعارى دەڭگەيدەگى فورۋمدا ءسوز سويلەپ, ءىس-شاراعا قاتىسۋشىلارعا ەلباسىنىڭ بۇۇ جۇزجىلدىعىنا دەيىن يادرولىق قارۋدان تولىقتاي باس تارتۋعا شاقىرۋىن ەسكە سالدى.
