ساپار بارىسىندا وزبەكستان رەسپۋبليكاسىنىڭ پرەمەر-ءمينيسترى ابدۋللا اريپوۆپەن, پرەمەر-ءمينيستردىڭ ءبىرىنشى ورىنباسارى اچيلباي راماتوۆپەن, وزبەكستان رەسپۋبليكاسى پرەمەر-ءمينيسترىنىڭ ورىنباسارى — ينۆەستيتسيالار جانە سىرتقى ساۋدا ءمينيسترى ساردور ومىرزاقوۆپەن كەزدەسۋ ءوتتى.
كۇن تارتىبىندەگى وزەكتى ماسەلەلەر بويىنشا ەكى جاققا ءتيىمدى ءوزارا ءىس-قيمىل بويىنشا ۋاعدالاستىقتارعا قول جەتكىزىلدى. كەزدەسۋلەردە قازاق-وزبەك ستراتەگيالىق سەرىكتەستىگى الەمدەگى اعىمداعى ەپيدەميولوگيالىق جاعدايعا قاراماستان, ءداستۇرلى تۇردە جوعارى دەڭگەيدە جانە سەرپىندى تۇردە دامىپ كەلە جاتقانى اتاپ ءوتىلدى. قول جەتكىزىلگەن ۋاعدالاستىقتاردى ىسكە اسىرۋ بارىسى مەن ءوزارا ءتيىمدى ىنتىماقتاستىقتىڭ پەرسپەكتيۆالىق باعىتتارى كەزەكتى رەت تىڭعىلىقتى تالقىلاندى. ساۋدا-ەكونوميكالىق بايلانىستاردى نىعايتۋ ماقساتىندا اۆتوموبيل جاساۋ, ەكسپورتتى شوعىرلاندىرا وتىرىپ, اۋىل شارۋاشىلىعى, ءۇشىنشى ەلدەردىڭ نارىقتارىندا سۇرانىسقا يە مۋلتيمودالدىق جەتكىزىلىمدەردى (اۆتو/تەمىرجول/اۋە) قالىپتاستىرۋ جونىندەگى جوبالار قارالدى.
قازاقستان تاراپى ەكسپورتتىق نارىقتاردىڭ ءىرى ساۋدا جەلىلەرىنە شىعۋ ءۇشىن اۋىل شارۋاشىلىعى ءونىمىن جەتكىلىكتى كولەمدە شوعىرلاندىرۋعا مۇمكىندىك بەرەتىن كوتەرمە-تاراتۋ ورتالىقتارىنىڭ مەملەكەتارالىق تارماقتالعان جەلىسىن قۇرۋدى ۇسىندى. ءوز كەزەگىندە وزبەكستان پرەمەر-ءمينيسترى تەرمەز-مازاري-شاريف ساۋدا-لوگيستيكالىق ورتالىعى اياسىنداعى ىنتىماقتاستىق ماسەلەلەرىن قاراستىرۋدى ۇسىندى.
ساپار بارىسىندا كولىك, اۋىل شارۋاشىلىعى ماشينالارىن جاساۋ, جەڭىل, فارماتسەۆتيكالىق, تاماق ونەركاسىبى, سونداي-اق ميكرو, شاعىن جانە ورتا كاسىپكەرلىك, ءبىلىم بەرۋ سالالارىن قامتيتىن پراكتيكالىق شارالار جوسپارىنا قول قويىلدى.
