كىتاپتاردىڭ تۇساۋكەسەر راسىمىنە قازاقستان رەسپۋبليكاسى پارلامەنتى سەناتىنىڭ توراعاسى ماۋلەن اشىمباەۆ, وزبەكستاننىڭ ولي ءماجىلىس سەناتىنىڭ ءتورايىمى تانزيلا نارباەۆا, حالىقارالىق تۇركى اكادەمياسىنىڭ پرەزيدەنتى دارحان قىدىرالى, تۇركيا, وزبەكستان, قىرعىزستان ەلدەرىنىڭ قازاقستانداعى ەلشىلەرى, ءماجىلىس دەپۋتاتتارى جانە بىرقاتار اقىن-جازۋشى مەن زيالى قاۋىم وكىلدەرى قاتىستى.
ماۋلەن اشىمباەۆ بۇل كۇننىڭ قازاق جانە وزبەك ادەبيەتى ءۇشىن, سونداي-اق, تۇتاس تۇركى جۇرتى ءۇشىن ماڭىزى زور ەكەنىن ايتتى.
"اباي قازاقتىڭ عانا اقىنى ەمەس. ول – بارشا ادامزاتقا ورتاق عۇلاما. اقىننىڭ وي-تولعامدارى مەن وسيەتى بارشا تۇركى جۇرتىنا ارنالعان دەسەك تە, ارتىق بولا قويماس. قازىرگىدەي سىن-قاتەرلەر زامانىندا ءبىز وسىنداي ورتاق قۇندىلىقتارىمىزدى كەڭىنەن دارىپتەۋىمىز كەرەك. اسىرەسە, جاس بۋىنعا جان-جاقتى ناسيحاتتاساق, تۇركى دۇنيەسىنىڭ بىرلىگىن نىعايتۋعا قوسىلعان ۇلكەن ۇلەس بولار ەدى", دەدى سەنات توراعاسى.
سونىمەن قاتار ول اباي مەن ناۋاي مۇرالارىنىڭ رۋحاني ساباقتاستىعىنا نازار اۋداردى.
"شىعىس شايىرلارىنىڭ دارا تۇلعاسى, ەجەلگى تۇركى ادەبيەتىنىڭ اتاسى الىشەر ءناۋايدىڭ ەڭبەگىن قازاق تىلىنە اۋدارۋدى ماڭىزدى وقيعا دەپ قابىلدايمىز. بۇل – قازاق ادەبيەتىنە قوسىلعان قۇندى ۇلەس. اباي ءناۋايدى ءوزىنىڭ رۋحاني ۇستازى ساناپ, ونىڭ ولەڭدەرىنەن تاعىلىم العانىن ءبارىمىز جاقسى بىلەمىز. وسى تۇرعىدان كەلگەندە, ەكى بىردەي كەمەڭگەردىڭ ەڭبەكتەرىن قاتار اۋدارۋدىڭ سيمۆوليكالىق ءمانى بار", دەگەن ماۋلەن اشىمباەۆ ناۋاي پوەزياسىنىڭ ماڭىزى مەن الەمدىك ادەبيەتتەگى ورنى تۋرالى دا ءسوز قوزعادى.
سالتاناتتى ءراسىم كەزىندە وزبەكستان ولي ءماجىلىسى سەناتىنىڭ ءتورايىمى تانزيلا نارباەۆا, وزبەكستاننىڭ قازاقستانداعى توتەنشە جانە وكىلەتتى ەلشىسى سايديكرام نيازحودجاەۆ, ءماجىلىس دەپۋتاتى ساۋىتبەك ابدراحمانوۆ جانە اقىن نەسىپبەك ايت ۇلى ءسوز سويلەپ, مۇنداي شارالار تۇركى الەمىنىڭ ىنتىماعىن نىعايتا تۇسەتىنىن ايتتى.
"حامسا" – الىشەر ءناۋايدىڭ ايگىلى بەس داستاننان تۇراتىن ەڭبەگى. قازاق تىلىندە جارىق كورگەن كىتاپقا ء"لايلى-ءماجىن" جانە "ەسكەندىر قورعانى" اتتى ەكى داستان ەنگەن. بۇل شىعارمالاردى كونە وزبەك تىلىنەن قازاقتىڭ بەلگىلى اقىنى نەسىپبەك ايت ۇلى اۋداردى. شالقار شابىتپەن, اسقان شەبەرلىكپەن تارجىمالانعان جاۋھار تۋىندىلار باۋىرلاس ەكى ەل اراسىنداعى ادەبي جانە مادەني بايلانىستاردىڭ التىن كوپىرىنە اينالارى ءسوزسىز.
اتالعان يگىلىكتى ىسكە حالىقارالىق تۇركى اكادەمياسى ۇيىتقى بولدى. وسى رەتتە اكادەميانىڭ مۇرىندىق بولۋىمەن بۇعان دەيىن دە بۇل باعىتتا بىرقاتار ماڭىزدى باستاما جۇزەگە اسىرىلعانىن اتاپ وتكەن ءجون.
