ەكولوگيا • 03 قاراشا، 2020

كەلەر جىلى دا سۋ جىبەرىلەدى

118 رەت كورسەتىلدى

كەشە رەداكتسيامىزعا پاۆلودار وبلىسىنىڭ قۇرمەتتى ازاماتى ابىلحاق تۇگەلباەۆ حابارلاسىپ، ءسۇيىنشى سۇرادى. وسى جىلدىڭ قىركۇيەك ايىندا «Egemen Qazaqstan» گازەتى كوتەرگەن ماسەلە جارتىلاي بولسا دا شەشىمىن تاۋىپتى. ول گازەت ۇجىمىنا، وسى ىسكە اتسالىسقان حالىق قالاۋلىلارىنا ءوڭىر حالقىنىڭ اتىنان العىس ايتتى.

ەستەرىڭىزدە بولسا، 2020 جىلدىڭ 23 قىر­كۇيەگىندە كەلەر جىلدان باستاپ ق.ساتباەۆ اتىنداعى ەرتىس-قاراعاندى كا­نا­لىنان شىدەرتى وزەنىنىڭ تومەنگى ارناسىنا سۋ جىبەرۋ توقتاتىلۋى مۇم­كىن ەكەنىن جازعان ەدىك. مۇنىڭ ءوڭىردىڭ ەكو­­لو­گياcى مەن ەكونوميكاسىنا قانشا­لىق­تى زيان اكەلەتىنىن دە تارقاتا ايتقانبىز.

ق.ساتباەۆ اتىنداعى كانالدىڭ سالىنۋىمەن ەكىباستۇز اۋىلدىق ايماعىنىڭ اۋماعىنداعى شىدەرتى وزەنىنىڭ اعىنى تابيعي جولمەن رەتتەلمەيتىن بولدى. وسىلايشا، شىدەرتى وزەنىنىڭ ارناسى ەرتىس سۋىن قاراعاندى قالاسىنا قاراي تاسىمالداۋعا پايدالانىلا باستادى. الايدا مۇنىڭ زيانى دا بار ەدى. كانال سالىنعان سوڭ شىدەرتى وزەنىنىڭ تومەنگى ارناسىنا تابيعي سۋ جىبەرىلمەيتىن بولدى. ءسويتىپ، اقتوعاي اۋدانىنىڭ جانە ەكىباستۇز اۋىلدىق اۋماعىنىڭ ءبىراز جەرىنە قاۋىپ ءتوندى. سول سەبەپتى تابيعي سۋ جايىلىمىنىڭ وتەۋى رەتىندە ەرتىس-قاراعاندى كانالىنان شىدەرتى وزەنىنىڭ تومەنگى ارناسىنا كومپەنساتسيالىق سۋ جىبەرۋ قاراستىرىلدى. ءار جىلدارداعى كىدىرىستەردى ايتپاعاندا، وسى كۇنگە دەيىن جىل سايىن 100 ملن تەكشە مەتر سۋ جىبەرىلىپ كەلدى. سونىڭ ناتيجەسىندە مال شارۋاشىلىعىمەن عانا اينالىساتىن ەلدى مەكەندەر بەرەكەلى كۇن كەشىپ وتىر.

قىركۇيەك ايىندا پاۆلودار ءوڭىرىنىڭ ءبىر توپ ازاماتى 2021-2023 جىلدارعا ارنالعان رەسپۋبليكالىق بيۋدجەتتە كانالدان سۋ جىبەرۋگە قارجى  قاراستىرىلماعانىن ايتىپ، ەل گازەتىنەن قولداۋ سۇراپ ەدى. 100 ملن تەكشە مەتر ءۇشىن شامامەن 3 ملرد تەڭگەگە جۋىق قارجى كەرەك ەكەن. وسى ورايدا، پارلامەنت سەناتى مەن ماجىلىسىندەگى پاۆلودارلىق دەپۋتاتتار «Egemen Qazaqstan» گازەتىنە شىققان ماقالانىڭ نەگىزىندە ۇكىمەتكە، قارجى مينيسترلىگىنە حات جولداپ، ماسەلەنىڭ ودان ءارى قاراي شەشىلۋىنە ىقپال ەتتى.

– 2021 جىلى ەرتىس-قاراعاندى كانالىنان شىدەرتى وزەنىنىڭ تومەنگى ارناسىنا 50 ملن تەكشە مەتر سۋ جىبەرىلەتىن بولىپتى. بۇل – جىلدا الىپ جۇرگەن سۋدىڭ جارتىسى. وسىنىڭ وزىنە شۇكىرشىلىك ەتىپ وتىرمىز. قارجى ۆيتسە-ءمينيسترى تاتيانا ساۆەلەۆا 2021 جىلدىڭ العاشقى توقسانىندا بيۋدجەتتى ناقتىلاۋ بارىسىندا سۋدىڭ قالعان كولەمىنە دە قارجى قاراستىرىلۋى مۇمكىن ەكەنىن ايتىپ، ءۇمىت وتىن ۇرلەپ قويدى. وسى ورايدا ماسەلەگە ارالاسىپ، ىقپال ەتكەن ەل گازەتى «Egemen Qazaqstan»-عا، سەنات دەپۋتاتتارى التىنبەك نۋح ۇلى مەن نۇرجان نۇرسيپاتوۆقا، ءماجىلىس دەپۋتاتتارى نۇرجان اشىمبەتوۆ، مەيرام پىشەمباەۆ، ايگۇل نۇركينا، الەكساندر سۋسلوۆقا، پاۆلودار وبلىسىنىڭ اكىمى ابىلقايىر سقاقوۆقا، سونداي-اق وسى ءىستىڭ باسى-قاسىندا جۇرگەن سۋ شارۋاشىلىعى سالاسىنىڭ ارداگەرلەرى الەكسەي باتالوۆ پەن مىرزاعالي ەرعاليەۆقا ءوڭىر حالقىنىڭ اتىنان ريزاشىلىعىمدى بىلدىرەمىن، – دەدى ابىلحاق تۇگەلباەۆ.

دەسە دە، كانالدان جىبەرىلەتىن 50 ملن تەكشە مەتر ەكى اۋدان ءۇشىن ءالى دە ازدىق ەتەدى. بۇل كولەم ەكىباستۇز اۋىلدىق ايماعىن عانا قامتۋعا جەتكىلىكتى. ال اقتوعاي اۋدانىنا سۋ جەتپەي قالۋ قاۋپى بار.

– سوندىقتان قالعان 50 ملن تەكشە مەتر سۋدى دا الۋ جايىن قاراستىرۋ كەرەك. جىلداعىداي 100 ملن تەكشە مەتر سۋ جايىلسا دەيمىز. سوندا بارلىق ەلدى مەكەن سۋدىڭ ىرىزدىعىن كورەر ەدى. بۇل ولكەگە سۋ جايىلماعان جىلداردا تۇرعىنداردىڭ دا، تابيعاتتىڭ دا قانداي زارداپ شەككەنىن جاقسى بىلەمىز. ۇكىمەت مۇنداي تابيعي اپاتتى قولدان جاساپ، قاراپ وتىرماسىنا سەنەمىز، – دەيدى سۋ شارۋاشىلىعى سالاسىنىڭ ارداگەرى مىرزاعالي ەرعاليەۆ.

«Egemen Qazaqstan» بۇل ماسەلەنى نازاردا ۇستايتىن بولادى.

سوڭعى جاڭالىقتار

اتىراۋ وبلىسىندا 77 براكونەر انىقتالدى

ايماقتار • 23 قىركۇيەك، 2022

نوۆاك دجوكوۆيچ قازاقستانعا كەلەدى

تەننيس • 23 قىركۇيەك، 2022

اتىراۋدا قوناقۇيدەن ءورت شىقتى

وقيعا • 23 قىركۇيەك، 2022

ۇقساس جاڭالىقتار