قايتا جاڭارتۋ اتىراۋ قالاسىنىڭ شەكاراسىنان قۇرمانعازى اۋدانىنداعى گانيۋشكين اۋىلىنا دەيىنگى اۋماقتا جۇرگىزىلۋدە. جوبا 4 ۋچاستكەگە بولىنگەن. جولشىلار جەر توسەمىن سالۋ, جاساندى قۇرىلىمدار مەن نەگىزدىڭ تومەنگى قاباتىن ورناتۋ بويىنشا جۇمىستاردى جۇرگىزىپ جاتىر.
جوبانىڭ مەردىگەرلەرى – "ليانكياران يول تيكينتي" ااق, "Todini Construzioni Generali S.p.A", Ant Insaat Maden Sanayi A.S. جانە "سينە ميداس ستروي" بك" جشس. قۇرىلىس ەۋروپا قايتا قۇرۋ جانە دامۋ بانكىنىڭ قاراجاتى ەسەبىنەن جۇرگىزىلۋدە. تەحنيكالىق باقىلاۋدى "Renardet S.A" بىرلەسكەن كاسىپورنى & Aarvee Associates Architects Engineers & Consultants Pvt. Ltd" & "ZS Engineering" جشس جۇزەگە اسىرۋدا.
جوبا بويىنشا 217 شاقىرىم ۋچاسكەدە 8 وتپەجول سالىنىپ, 63 سۋجۇرگىزۋ قۇبىرى ورناتىلماق. "اتىراۋ-استراحان" تاسجولىنىڭ 616-833 شاقىرىمىنداعى اۋماقتى رەكونسترۋكتسيالاۋ 2023 جىلى اياقتالادى.
ايتا كەتەيىك, استراحاننان اتىراۋعا دەيىنگى جولدىڭ ۇزىندىعى 277 شاقىرىمدى قۇرايدى. بىلتىر قۇرىلىس جۇمىستارى سونىڭ العاشقى 60 شاقىرىمىندا باستالعان بولاتىن. ونداعى قوزعالىس بيىلعى جىلدىڭ سوڭىنا دەيىن اشىلادى دەپ كۇتىلۋدە. 60 شاقىرىمدىق ۋچاسكەدەگى قايتا جاڭارتۋ جۇمىستارى رەسپۋبليكالىق بيۋدجەتتىڭ قاراجاتىنا جۇرگىزىلگەنىن ايتىپ ءوتۋ كەرەك.
قۇرىلىس جۇمىستارى تامامدالعان سوڭ, "اتىراۋ-استراحان" تاسجولى ەكى جولاقتى قوزعالىسى بار ەكىنشى تەحنيكالىق ساناتقا سايكەس بولادى. جوبا جولداعى ۋاقىتتى ايتارلىقتاي قىسقارتىپ, ءوڭىردىڭ ترانزيتتىك الەۋەتىن ارتتىرماق. بۇدان بولەك, جەرگىلىكتى تۇرعىندارعا جول بويىنداعى قىزمەتىن دامىتىپ, كاسىبىن دوڭگەلەتۋگە مۇمكىندىك بەرەدى.
