تاياۋدا قالا اكىمى باقىتجان ساعىنتاەۆ الاتاۋ اۋدانىن ارالاپ, قوعامدىق كەڭىستىكتەردىڭ اباتتاندىرىلۋ بارىسىمەن جانە ينفراقۇرىلىمدىق ماسەلەلەردىڭ قالاي شەشىلىپ جاتقانىمەن تانىستى. شاھار باسشىسى يەسىز بوس جاتقان جەرلەردىڭ ورنىندا پايدا بولعان بىرقاتار دەمالىس ورىندارىندا بولدى. «جۇمىسپەن قامتۋدىڭ جول كارتاسى» اياسىندا «اقبۇلاق», «شاپاعات», «قاراسۋ» شاعىن اۋداندارىندا سكۆەرلەر سالىندى جانە جوندەلدى. سونىمەن قاتار موڭكە بي كوشەسىندە ۆوركاۋت الاڭ ىسكە قوسىلدى.
وسى جۇمىس ساپارى تۋرالى قالا اكىمى ءوزىنىڭ Instagram پاراقشاسىندا «سپورتتىق جانە بالالار ايماعى بالدىرعاندارعا تولى بولسا, اللەيادا اقساقالدار سەرۋەندەپ ءجۇر. تۇرعىن ۇيلەردىڭ ماڭايى قاڭىراپ بوس تۇردى دەگەنگە سەنۋ قيىن. مۇنداعى تۇرعىندارمەن اڭگىمەلەسىپ, جاڭا قوعامدىق كەڭىستىكتەردى كۇتىپ ۇستاۋعا شاقىردىم», دەپ جازدى.
سونداي-اق قالا اكىمى 78 گەكتار جەرگە الەۋمەتتىك بەلسەندىلەر مەن ەكو-بەلسەندىلەردىڭ كۇشىمەن جىل باسىندا سالىنعان قاراعايلى ورماندى اباتتاندىرۋ بارىسىمەن تانىستى. جول كارتاسى شەڭبەرىندە وندا اباتتاندىرۋ جۇمىستارى جۇرگىزىلىپ, سۋارۋ جۇيەسى قاراستىرىلعان. جالپى, الاتاۋ اۋدانىندا جاسىل جەلەكتەردىڭ اۋماعى ەكى ەسەگە جۋىق كوبەيەدى, جاسىل جەلەكتەر سانى 355 مىڭعا جەتەدى, ونىڭ 176 مىڭى بيىل Jasyl Almaty باعدارلاماسى اياسىندا وتىرعىزىلادى.
سونىمەن قاتار باقىتجان ساعىنتاەۆ جول سالۋ جانە جوندەۋ ۋچاسكەلەرىن قاراپ شىعىپ, «ۇلجان» جانە «وجەت» شاعىن اۋداندارىندا ينجەنەرلىك جەلىلەر مەن سىرتقى جارىقتاندىرۋ جۇيەسىن سالۋ بارىسىمەن تانىستى.
وسىدان كەيىن قالا باسشىسى ارنايى بارعان «باقىتتى وتباسى» اۋداندىق كوپبالالى انالاردى الەۋمەتتىك قولداۋ ورتالىعىندا جىل ىشىندە جۇرگىزىلگەن وزگەرىستەردىڭ ناتيجەلەرى تانىستىرىلدى. ونىڭ ناتيجەسى كوپبالالى انالاردىڭ بەلسەندى ومىرگە ارالاسۋى دەسەك بولادى. جىل باسىنان بەرى 25 مىڭ ايەل «Isker ana» باعدارلاماسى بويىنشا نەگىزگى ترەنينگتەر مەن كۋرستاردان ءوتتى. 537 ايەل «بيزنەس باستاۋ» باعدارلاماسى بويىنشا وقىدى, ونىڭ 300-ءى گرانت الىپ, ءارتۇرلى باعىتتا ءوز كاسىبىن اشتى.
ەلەكتروكارلاردى تىركەۋ قىزمەتى ىسكە قوسىلدى
ساتىمەن باستالعان سارسەنبىدە قالالىق جاسىل ەكونوميكا باسقارماسى «مەدەۋ» مەن «شىمبۇلاق» تاۋ شاڭعىسى كۋرورتىنا كەدەرگىسىز جەتۋ ءۇشىن توقپەن جۇرەتىن كولىكتەردى تىركەيتىن ەلەكتروندى ونلاين سەرۆيستى ىسكە قوستى. بۇل قىزمەت كىرىپ-شىعۋعا مالىمەتتەر بازاسىنا ەنگىزۋ ءىس-ارەكەتىن جەڭىلدەتۋ ءۇشىن جاسالعان. بۇرىن ەلەكتروموبيلدەر يەسىنەن «مەدەۋ» ساياباعىنىڭ كەڭسەسىنە كەلىپ, ءتيىستى ءوتىنىش جازۋ تالاپ ەتىلەتىن, ال بۇل قولايسىزدىق تۋدىرادى.
جاڭا قىزمەتتە قاراپايىم فورمانى تولتىرۋ جەتكىلىكتى جانە قاراستىرعاننان كەيىن 1 جۇمىس كۇنى ىشىندە اۆتوكولىك ەلەكتروندى بازاعا ەنگىزىلەدى. مەدەۋدەگى شلاگباۋم اۆتوماتتى تۇردە مەملەكەتتىك تىركەۋ نومىرلىك بەلگىسىن وقىپ جۇمىس ىستەيدى. ونلاين-ءوتىنىمدى باسقارمانىڭ www.almatyeco.gov.kz رەسمي سايتىندا «ەلەكتروموبيلدەردى تىركەۋ» بولىمىندە قالدىرۋعا بولادى.
بۇل ارادا 2016 جىلدان بەرى قوزعالىس جۇكتەمەسىن جانە قورشاعان ورتاعا انتروپوگەندىك اسەردى ازايتۋ ماقساتىندا وسى اۋماقتا تۇراتىن جەكە جانە زاڭدى تۇلعالار مەن قىزمەت كورسەتەتىن قىزمەتكەرلەردەن باسقا, «شىمبۇلاق» تراكتىنىڭ ەرەكشە قورعالاتىن تابيعي ايماعىنا اۆتوكولىك قۇرالدارىنىڭ كىرۋىنە شەكتەۋ قويىلعانىن ەسكە سالا كەتۋ كەرەك. بىراق ەلەكتروموبيل يەلەرىنە ەرەكشە قورعالاتىن تابيعي اۋماققا شەكتەۋسىز كىرۋگە رۇقسات ەتىلەدى.
«سونىمەن قاتار ەرەكشە قورعالاتىن تابيعي اۋماقتاردا ەلەكتروموبيلدەر ءۇشىن بارلىق قاجەتتى ينفراقۇرىلىم بار ەكەنىن حابارلايمىن. «مەدەۋ» تابيعي ساياباعىندا 4 قۋاتتاندىرۋ ستانساسى, ال «شىمبۇلاق» تاۋ-شاڭعى كۋرورتىندا 3 قوندىرعى بار, ونىڭ ارقايسىسى 22 كۆت-تىق Type 2, Mode 3 ءتيپتى ەكى پورتپەن جابدىقتالعان», دەيدى قوعامدىق ناسيحات جانە جاسىل ەكونوميكا قىزمەتىنىڭ باسشىسى ا.رايىمباەۆ.
الماتى
