كورمەنىڭ اشىلۋ سالتاناتىندا ءسوز العان ۇلتتىق مۋزەيدىڭ ديرەكتورى ارىستانبەك مۇحامەدي ۇلى: «اباي شىعىس جانە باتىس مادەنيەتى مەن وركەنيەتىن جەتىك بىلگەن. ەكى الەمدى تەرەڭ زەرتتەگەن. ونىڭ فيلوسوفياعا تولى شىعارمالارى ءالى كۇنگە دەيىن وزەكتىلىگىن جوعالتقان ەمەس. اباي قانشالىقتى حالقىن ءسۇيىپ, جانى اشىسا, حالقى دا سونشالىقتى وعان ءىلتيپات ءبىلدىرىپ, شىعارمالارىن جاتقا ايتىپ, تۇمارداي ساقتاپ كەلەدى», – دەدى.
جيىن بارىسىندا ۇلتتىق اكادەميالىق كىتاپحانا ديرەكتورى, پەداگوگيكا عىلىمدارىنىڭ دوكتورى, پروفەسسور ءۇ.مۇڭالباەۆا, فولكلورتانۋشى, فيلولوگيا عىلىمدارىنىڭ دوكتورى, پروفەسسور ش.ىبىراەۆ, قازاقستان جازۋشىلار وداعى نۇر-سۇلتان قالاسى فيليالىنىڭ ديرەكتورى د.كاپ ۇلى ءسوز سويلەپ, قازاق ادەبيەتىنىڭ شوقتىعى بيىك ءىرى تۇلعاسى اباي قۇنانباي ۇلىنىڭ شىعارماشىلىعىنا كەڭىنەن توقتالىپ, ونداعى ايتىلعان ويلاردىڭ ءمانى مەن ماڭىزدىلىعىن اشىپ بەردى.
اتالمىش كورمە «ابايدىڭ ءومىر جولى», «اباي شىعارماشىلىعى» جانە «ابايتانۋ» دەپ اتالاتىن 3 بولىمنەن تۇرادى. وندا ابىز اقىننىڭ ءومىرى مەن شىعارماشىلىعىنا قاتىستى 2000-نان استام كىتاپتارمەن قاتار كوپتەگەن فوتو جانە بەينەماتەريالدار, تاريحي جادىگەرلەر قويىلعان.
ايتا كەتەيىك, «اباي جانە رۋحاني مۇرا» اتتى زاماناۋي يلليۋستراتسيالىق-كىتاپ كورمەسىن مۋزەي قوناقتارى ءبىر اي بويى تاماشالاي الادى.
