قازان ايىندا قالاداعى ىندەت جۇقتىرۋدىڭ ۇدەۋى كارانتين شارالارىن جەڭىلدەتۋگە مۇمكىندىك بەرمەيدى. وكىنىشكە قاراي تۇرعىندار ساقتىق شارالارىن ەسكەرە بەرمەيدى, ال اۋىرعان جاعدايدا بايلانىسقان ادامدارىن اشىق ايتپاي, فاكتىلەردى جاسىرادى.
«سوڭعى ۋاقىتتا كوروناۆيرۋس ينفەكتسياسىمەن اۋىراتىن ناۋقاستاردىڭ تۇرعىلىقتى جەرى مەن جۇمىس ورنى بويىنشا, سونداي-اق جاقىن بايلانىستا بولعاندار تۋرالى فاكتىلەردى جاسىرۋ جانە جالعان اقپارات بەرۋ جيىلەپ كەتتى. بۇل ەپيدەمياعا قارسى ءىس-شارالاردى ۋاقتىلى جۇرگىزۋگە كەدەرگى كەلتىرەدى», دەدى ج.پىراليەۆا.
سونداي-اق بيزنەس سۋبەكتىلەرى شەكتەۋ شارالارىن, سانيتارلىق نورمالار مەن كارانتين رەجىمىن ەلەمەي وتىر. بۇعان 27 جانە 28 قازاندا مونيتورينگتىك توپتار جۇرگىزگەن كۇندىزگى جانە تۇنگى رەيدتەردىڭ ناتيجەلەرى دالەل بولا الادى. تەكسەرىلگەن 290 نىساننىڭ 49-ىندا تالاپتاردىڭ ورىندالماعانى انىقتالدى.
«مەيرامحانالاردا كوپتەگەن ادام شاقىرىپ, وتباسىلىق ءىس-شارالار وتكىزۋ ءالى دە بار. مىسالى, 24 قازاندا تۇران داڭعىلى, №5 مەكەنجايىنداعى GRANDHALLASTANA مەيرامحاناسىندا 70-تەن اسا ادام بولدى. وندا «قىز ۇزاتۋ» تويى ءوتىپ, 50 ادام قاتىستى, ال تۋعان كۇن زالىندا 20 ادام بولدى», دەدى نۇر-سۇلتان قالالىق پد جەرگىلىكتى پوليتسيا قىزمەتى باسقارماسىنىڭ باستىعى گوسمان جاكين.
سونداي-اق ءموبيلدى توپ ماناس كوشەسىندەگى «پوشاشلىچيم» ءدامحاناسى مەن «جانىم-سول» كاراوكە-بارىندا جۇمىس كۇندەرى جانە دەمالىس كۇندەرى بەلگىلەنگەن جۇمىس كەستەسىن ساقتاماي, ءوز قىزمەتىن جۇزەگە اسىرعان تارتىپسىزدىكتى انىقتادى. تىيىم سالىنعان ۋاقىتتا تۇران داڭعىلى, 19 ۇيدەگى Fast425 تۇنگى كلۋبى دا جۇمىس ىستەدى.
«قۇرمەتتى ەلوردا تۇرعىندارى مەن قوناقتارى, اينالاڭىزداعى ادامداردىڭ دەنساۋلىعى مەن ومىرىنە قامقورلىقپەن قاراۋىڭىزدى سۇرايمىز. ول ءۇشىن تەك قاراپايىم ەرەجەلەردى ساقتاۋ كەرەك: مىندەتتى تۇردە مەديتسينالىق ماسكا تاعۋ, الەۋمەتتىك قاشىقتىقتى ساقتاۋ, ادامدار كوپ جينالاتىن جەرلەرگە بارماۋ كەرەك», دەدى باس سانيتارلىق دارىگەر.
