قاشىقتان وقىتۋ كەزىندەگى جيىنتىق باعالاۋ 2-11-سىنىپتاردا اپتاسىنا 2 جانە ودان دا كوپ اپتالىق جۇكتەمەسى بار وقۋ پاندەرى بويىنشا ءفورماتيۆتى باعالاۋ, ءبولىم بويىنشا جيىنتىق باعالاۋ (بجب) جانە توقساندىق جيىنتىق باعالاۋ (تجب) جۇرگىزىلەدى. 2-11-سىنىپتاردا اپتاسىنا 1 ساعات وقۋ جۇكتەمەسى بار وقۋ پاندەرى بويىنشا ءفورماتيۆتى باعالاۋ, بجب جۇرگىزىلەدى جانە ولاردىڭ نەگىزىندە جارتى جىلدىققا باعا قويىلادى, تجب جۇرگىزىلمەيدى.
1-سىنىپتا ءبىلىم الۋشىلاردىڭ وقۋ جەتىستىگى باعالانبايدى. جىلدىق باعا قويىلمايدى. بجب جانە تجب سانى ءبىر كۇندە ءۇش جيىنتىق باعالاۋدان اسپاۋى كەرەك. 2-4-سىنىپتاردا بجب جانە تجب ۋاقىتى رەتتەلمەيدى, ءار ءپان بويىنشا 2 تاپسىرمادان اسپايدى. ال 5-11-سىنىپتاردا 3 تاپسىرمادان ارتىق بەرىلمەيدى.
بجب جانە تجب كەستەسىن مەكتەپ اكىمشىلىگى ازىرلەيدى. بۇل بويىنشا تاپسىرمالاردى مۇعالىمدەر پاندەر بويىنشا سپەتسيفيكاتسياعا سايكەس وزدەرى دايىندايدى.
ءبىلىم جانە عىلىم مينيسترلىگىنىڭ مەكتەپكە دەيىنگى جانە ورتا ءبىلىم كوميتەتىنىڭ ءتورايىمى مايرا مەلدەبەكوۆا بجب مەن تجب جۇمىستارى وقۋ جىلىنىڭ سوڭىنا دەيىن تەك ەلەكتروندى تۇردە ساقتالاتىنىن مالىمدەدى.
«بارلىق مەكتەپتە جيىنتىق باعالاۋ جۇمىستارى ءبولىم بويىنشا ءوتتى. ەندىگى ماسەلە – وسى وقۋ جىلىنىڭ ءبىرىنشى توقسانىن قالاي قورىتىندىلايمىز, جيىنتىق باعالاۋدىڭ ناتيجەسىن قالاي شىعارامىز؟ جالپى, ءبىلىم بەرۋ ۇيىمدارىندا وقۋ پاندەرى كۇنى جانە ۋاقىتى تۇرعىسىندا ءاربىر مەكتەپتە ءوزىنىڭ كەستەسى بويىنشا جاسالادى. بجب مەن تجب جۇمىستارى وقۋ جىلىنىڭ سوڭىنا دەيىن تەك ەلەكتروندى تۇردە ساقتالادى. بۇل بويىنشا بىزگە كوپ سۇراقتار كەلىپ تۇسەدى. ءبىراز مەكتەپ اكىمشىلىكتەرى وسىنى قاعاز تۇرىندە شىعارىپ, سونى ساقتاپ قويۋعا نۇسقاۋ بەرەدى ەكەن. ونى ىستەۋدىڭ قاجەتى جوق. ەلەكتروندى تۇردە دايىنداعاننان كەيىن, سولاي عانا ساقتالۋى كەرەك», دەدى م.مەلدەبەكوۆا.
وقۋ جىلىنىڭ ەكىنشى توقسانىندا مەكتەپتە وقىتۋ فورماتتارى بويىنشا الدىن الا ەسەپتەۋلەر جۇرگىزىلدى. ەكىنشى توقساندا وقۋ فورماتتارى بويىنشا بالالاردىڭ بولجامدى سانى: قاشىقتان وقىتۋ فورماتىندا – 2,2 ملن, ءداستۇرلى فورماتتا – 1,2 ملن, ونىڭ ىشىندە كەزەكشى سىنىپتاردا (1-5-سىنىپ) – 800 مىڭنان اسا بالا, شاعىن جيناقتى 4 010 مەكتەپتە – 434 مىڭ وقۋشى, 13 حالىقارالىق مەكتەپتە 3 مىڭعا جۋىق وقۋشى (1-7 سىنىپ) ءبىلىم الادى.
