سۋرەتتى تۇسىرگەن التىنبەك قارتاباي
كوپشىلىكتىڭ كوكەيكەستى ماسەلەسى ءالى كۇنگە دەيىن سول كۇردەلى كۇيىندە قالىپ وتىر. قالادان 5-6 شاقىرىم عانا قاشىقتىقتا ورنالاسقان شاعىن اۋدان تۇرعىندارىنىڭ اتالعان ماسەلەلەردى كوتەرگەنىنە دە تالاي جىل بولعان.
ماسەلەن, جەرگىلىكتى تۇرعىنداردىڭ ايتۋىنشا, بيىل اتالعان شاعىن اۋدانعا گاز كىرگىزىلگەنىمەن, كوپشىلىك سول كوگىلدىر وتىننىڭ قۇجاتىن ءالى كۇنگە دەيىن راسىمدەي الماي وتىر ەكەن. سوندىقتان دا ولار گازدىڭ تولەمىن قايدا بارىپ تولەيتىنىن بىلمەي دال.
«گازدىڭ قۇجاتى بولماعاننان كەيىن ونىڭ تولەمىن قايدا بارىپ تولەيتىنىمىزدى بىلمەي وتىرمىز. ءتىپتى بۇل ارەكەتىمىز زاڭعا قايشى كەلىپ جاتقان جوق پا دەگەن دە قورقىنىش بار. سونىمەن قاتار «قىزىل اباد» شاعىن اۋدانىندا جارىق جۇيەلى تۇردە جانبايدى. اۋىز سۋ تارتىلماعان, جول سالىنباعان, قوعامدىق كولىك تە قاتىنامايدى. مۇندا ينتەرنەت جەلىسى دە ىسكە قوسىلماعان», دەيدى «قىزىل اباد» شاعىن اۋدانىنىڭ تۇرعىنى قالدىكۇل تۋعانباەۆا.
نەگىزىنەن اتالعان اۋدان تۇرعىندارىنىڭ جانايقايى – وسى. بۇل ماسەلەلەر تالاي جىلدان بەرى جەرگىلىكتى جۇرتشىلىق تاراپىنان ايتىلىپ تا كەلەدى. بىراق جىل وتكەن سايىن جاقسى جاڭالىقتان ءۇمىتتى تۇرعىنداردىڭ ءۇمىتى اقتالاتىن ەمەس. ءتىپتى تالاي جىلدان بەرى بۇل ماسەلەلەردىڭ شەشىمى تابىلماعان سوڭ, كوپشىلىك «جامبىل – ادالدىق الاڭى» جوبالىق كەڭسەسىنە دە شاعىمدانعان. بۇل ورايدا, سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى راۆيل تولەباەۆ «قىزىل اباد» تۇرعىندارىنىڭ كوتەرىپ وتىرعان ماسەلەلەرى بۇدان بىلاي دەپارتامەنتتىڭ نازارىندا بولاتىنىن ايتىپ, جاقىن ارادا كوگىلدىر وتىننىڭ قۇجاتتارى زاڭداستىرىلمايتىن بولسا, وندا تاپسىرىس بەرۋشى مەن مەردىگەردىڭ ماسەلەسى زاڭ شەڭبەرىندە قارالاتىنىن ەسكەرتكەن بولاتىن. بۇرىن مۇندا گاز جوق بولىپ تۇرعىندار ءبىر قينالسا, ەندى ونىڭ قۇجاتىن راسىمدەي الماي ەكى قينالىپ وتىر. دەسە دە, كوپشىلىك بۇل ماسەلەلەردىڭ شەشىمى تابىلاتىنىنان ءالى دە ءۇمىتتى.
الايدا قالا باسشىلىعىنىڭ ايتۋىنشا, بۇل ءبىر كۇننىڭ شارۋاسى ەمەس. وعان ءبىرىنشى كەزەكتە ۋاقىت پەن قاراجات كەرەك. تاراز قالاسى اكىمىنىڭ ورىنباسارى اسحات ەسەناليەۆتىڭ ايتۋىنشا, بۇگىندە «قىزىل اباد» شاعىن اۋدانىنا ماگيسترالدى گاز قۇبىرلارى تارتىلعان.
«كوكتەمدە اتالعان اۋدانعا ەلەكتر جانە سۋ جەلىلەرىن تارتۋ جۇمىستارى باستالادى. بۇل جوبا ەكى جىل بويىنا جۇرەدى. ءبىر عانا جارىق جەلىلەرىن تارتۋعا 2,5 ملرد تەڭگە قاجەت. ونى قالا بيۋدجەتى كوتەرە المايدى. رەسپۋبليكادان بەرىلۋى كەرەك. ال قوعامدىق كولىك ماسەلەسىنە كەلسەك, جالپى تاراز قالاسى بويىنشا 540 قوعامدىق كولىك بار. الايدا قازىرگى كارانتين تالاپتارىنا بايلانىستى تەك 228 قوعامدىق كولىك قانا قالا ىشىندە قاتىنايدى. سەنبى, جەكسەنبى كۇندەرى جۇرمەيدى. ايتپەسە وسى ۋاقىتقا دەيىن «قىزىل اباد» اۋدانىنا قوعامدىق كولىك بارىپ تۇرعان», دەيدى اكىمنىڭ ورىنباسارى.
ارينە, تۇرعىنداردى تەك گازدىڭ قۇجاتى مەن جارىق ماسەلەسى عانا تولعاندىرىپ وتىرعان جوق. ولار ءۇشىن اۋىز سۋ, جول ماسەلەلەرى دە وزەكتى. سوندىقتان دا ولار شاھار باسشىلىعىنىڭ اتالعان ماسەلەلەرگە نازار اۋدارىپ, ناقتى جاۋاپ بەرۋىن سۇرايدى.
«اۋىز سۋ ماسەلەسىنە كەلەتىن بولساق, اتالعان يىنگە سۋ تارتۋ ءۇشىن سمەتالىق قۇجاتتار وتكىزىلدى. الايدا ءتيىستى قاراجات رەسپۋبليكادان بولىنەتىندىكتەن, مۇندا اۋىز سۋ ماسەلەسى بيىل نەمەسە كەلەسى جىلى شەشىلەدى دەپ ناقتى ايتۋ قيىن. جارىق ماسەلەسى دە سولاي. سونىمەن قاتار شاعىن اۋدانعا گاز بەن اۋىز سۋ قۇبىرلارىن تارتىپ بىتپەي, كوشەلەرگە جول سالا المايمىز», دەيدى تاراز قالالىق تۇرعىن ءۇي-كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى ءبولىمىنىڭ باسشىسى زيات تۇرسىن ۇلى.
نەگىزىنەن, «قىزىل اباد» اۋدانىنا قوعامدىق كولىكتىڭ قاتىناۋىنا قالا اكىمدىگىنىڭ تاراپىنان شەكتەۋ قويىلماپتى. دەگەنمەن تاسىمالداۋشى كومپانيالار مۇنىڭ تيىمسىزدىگىن العا تارتىپ, اتالعان اۋدانعا قاتىناۋعا اسا ق ۇلىقتى بولماي وتىر. بۇل تۇرعىدا كوپشىلىكتىڭ ءبىر ماسەلەسىن بولسا دا شەشۋ ءۇشىن اكىمدىك تاسىمالداۋشى كومپانيالارعا سۋبسيديا بەرۋ جاعىن قاراستىرۋدا.
كەزىندە «قىزىل اباد» شاعىن اۋدانىنا كوگىلدىر وتىن جەكە ازاماتتار مەن «قازترانسگاز» اق جامبىل وبلىستىق فيليالىنىڭ اراسىنداعى كەلىسىمشارت نەگىزىندە جۇرگىزىلگەن. اتالعان فيليالدىڭ وندىرىستىك-تەحنيكالىق ءبولىمىنىڭ باسشىسى ابىل يۋسۋپوۆتىڭ ايتۋىنشا, مۇندا ەل ۇكىمەتى تاراپىنان 2022-2023 جىلدارى گاز تارتىلاتىن بولعاندىقتان, جاسالعان ۇسىنىس نەگىزىندە ولار ءوز قارجىسىنا گاز كىرگىزۋگە كەلىسكەن.
«بۇگىندە جوسپارلى جۇمىستىڭ نەگىزىن «بايزاقگازسەرۆيس» جشس اياقتاپ بولدى. ال بىزگە ءتيىستى قۇجاتتاردى مەردىگەر كومپانيا نەمەسە تۇرعىنداردىڭ وزدەرى وتكىزۋى كەرەك. جالپى, ءبىزدىڭ تاراپتان بارلىق ءتيىستى جۇمىس اتقارىلىپ بولدى», دەيدى ول. ايتا كەتەيىك, گاز ءبىر ۇيگە 310 مىڭ تەڭگەگە كىرگەن.
كەزىندە جامبىل اۋدانىنىڭ قۇرامىندا بولعان «قىزىل اباد» شاعىن اۋدانى 2010 جىلى تاراز قالاسىنا قوسىلدى. بۇگىندە مۇندا بار 170 ۇيدە 600-گە جۋىق ادام تۇرادى. «قىزىل اباد» ورنالاسقان ايماق تاراز قالاسىنىڭ №11 وكرۋگىنە قارايدى. مۇندا قازىرگى كەزدە «قىزىل اباد» سياقتى 7 شاعىن اۋدان, 28 ساياجاي بار. تاراز قالاسى اكىمىنىڭ №11 اۋماقتىق وكرۋگ بويىنشا باس ينسپەكتورى مارات اققۇليەۆتىڭ ايتۋىنشا, «قىزىل اباد» شاعىن اۋدانىنا العاش 2017 جىلى مەملەكەت تاراپىنان 693 ملن تەڭگەگە گاز تارتىلعان ەكەن. ال بۇگىندە «بايزاقگازسەرۆيس» جشس اتالعان جۇمىستى جالعاستىرۋدا. ياعني گاز ەكى كەزەڭمەن جۇرگىزىلۋدە. سول سياقتى اۋماقتىق ينسپەكتور دا جۋىردا مۇندا اۋىزسۋ, ەلەكتر جەلىلەرىنىڭ تارتىلاتىنىن ايتتى. ارينە, بارلىق ماسەلەنىڭ جىلدام شەشىلگەنى جاقسى. بىراق تارازدىڭ ىرگەسىندە وتىرىپ, كوپشىلىك وسىنداي كۇي كەشكەنىنە ناليدى. دەسە دە, ماسەلەلەردىڭ وڭ شەشىلەتىنىنەن ءۇمىتتى...
جامبىل وبلىسى
