پرەمەر-ءمينيستردىڭ ايتۋىنشا, بيىلعى روجدەستۆو دا بۇرىنعىدان وزگە بولماق. بەيسەنبىدەن باستاپ پابتار, مەيرامحانالار, سپورت زالدارى مەن كەيبىر دۇكەندەر 4 اپتاعا جۇمىسىن توقتاتادى. دەگەنمەن كوكتەمگى كارانتيننەن ءبىر ەرەكشەلىگى – مەكتەپ, كوللەدج بەن ۋنيۆەرسيتەتتەر جۇمىسىن جالعاستىرادى. جەلتوقساننىڭ 2-سىنەن كەيىن شەكتەۋلەر جەڭىلدەتىلىپ, ەسكى جۇيەگە قايتۋى كەرەك دەگەن جوسپار بار. «بيىلعى روجدەستۆو دا باسقا بولماق. مۇلدە باسقا مەرەكە كۇتىلۋدە. دەگەنمەن قازىر جاعدايدى قولعا الساق, وتباسىلاردىڭ بىرگە بولۋىنا جاعداي جاساي الامىز. جاۋاپكەرشىلىگى جوق ۇكىمەت قانا كۇن ساناپ ءوسىپ جاتقان ناۋقاستار سانىن ەلەمەس. قازىرگى جاعداي ساۋىردەگىدەن دە قيىن بولىپ تۇر», دەيدى ب.دجونسون.
سونىمەن بىرگە ازاماتتاردى جۇمىسپەن قامتىپ وتىرعان كومپانيالاردىڭ 80 پايىزى جۇمىسىن توقتاتاتىنىن ەسكەرتىپ, الدىن الا كەشىرىم سۇرادى. وعان قوسا دارىگەرلەردىڭ دە جۇمىسى قيىنداي تۇسەتىنىن حابارلادى. ولار ناۋقاستاردىڭ دەنساۋلىعىنا قاراپ, ودان ءارى ەمدى كوتەرە الاتىنىن تاڭداۋعا ءماجبۇر بولاتىنى تۋرالى ايتتى. ۇكىمەت باسشىسىنىڭ ايتۋىنشا, انگليا اۋرۋحانالارى ناۋقاستارعا لىق تولى. ءتىپتى ناۋقاس سانى از تىركەلگەن ەلدىڭ وڭتۇستىك-باتىسىندا دا بىرنەشە اپتا ىشىندە اۋرۋحانالار تولىپ قالعان.
