وسىنداي جاتتىعۋلار جەكە قۇرامنىڭ جاۋىنگەرلىك دايارلىعىن قولداپ, ارميا اۆياتسيالارىندا ۇشۋدى باسقارۋ, اۋە ناۆيگاتسيالارى مەن جاۋىنگەرلىك قولدانۋ تەحنيكالارىنىڭ داعدىلارىن جەتىلدىرۋگە ىقپال ەتەدى.
بۇل جاتتىعۋلاردى ورىندار الدىندا ۇشقىشتارمەن تاۋلى جەرلەردى باعدارلاۋ, جەردەگى ءىس-قيمىلدى پىسىقتاۋ جانە ولاردى اۆتوماتتاندىرۋعا كەلتىرۋ جونىندە ساباقتار وتكىزىلەدى. تاۋلى جەرلەردە ۇشاقتى باسقارۋدىڭ نەگىزگى ەرەكشەلىگى – شىعارىلعان اۋا. اتالعان وقۋ-جاتتىقتىرۋ ۇشۋلارى بارىسىندا بارىنشا كوپ ساندا ەكيپاجدار مەن تىكۇشاقتار قاتىستى.
ۇشقىشتار العاش رەت مي-35م تىكۇشاعىندا ۇشۋدى باسقارۋ داعدىلارىن مەڭگەرىپ, ماشىقتارىن بەكىتتى. ولار تاۋ بوكتەرىن اينالىپ شىعىپ, شاتقالداردان ءوتۋ تەحنيكاسى مەن 2500 مەتر بيىكتىكتە اسۋلاردى باعىندىرۋ, بيىك تاۋ ايماقتارىندا ۇشۋ جانە قونۋ تەحنيكالارىن پىسىقتادى, وسىلايشا ۇشۋلاردى جاۋىنگەرلىك قولدانىستا ورىنداپ شىقتى.
"ۇشۋ قۇرامى ءاردايىم, كەز-كەلگەن اۋا-رايىندا, كۇندىز-ءتۇنى جاۋىنگەرلىك دايارلىقتا بولۋى ءتيىس. ۇشقىش جەرلەردىڭ ءار قىرتىسىن ءبىلىپ, شاتقالدار مەن وزەن ارنالارىندا جاسىرىنۋعا, قاجەت كەزىندە ورمان شەتىندە بۇركەمەلەنىپ, سونىمەن قاتار جەكە نەمەسە توپتا قاجەتتى جاۋىنگەرلىك وپەراتسيالاردى ورىنداي ءبىلۋى قاجەت", دەدى ارميا اۆياتسياسىنىڭ ۇشقىش-نۇسقاۋشىسى پودپولكوۆنيك باۋىرجان ساعىندىقوۆ.
ۇشۋلار شاعىن بيىكتىكتەر شەگىندە كەنەتتەن بەرىلگەن سوققىلار ءۇشىن ارميا اۆياتسياسىن بارىنشا ءتيىمدى قولدانۋعا, شابۋىلدان كەتۋگە جانە قارسىلاستىڭ اۋە شابۋىلىنا قارسى قورعانىس جۇيەسىن بايقاۋعا مۇمكىندىك بەرەدى.
وسىنداي جاتتىعۋلاردى ورىنداۋعا 50-دەن 100 مەترگە دەيىن شاعىن بيىكتىكتەردە ۇشۋ تاجىريبەسى بار ۇشقىشتار جىبەرىلەدى.
