وقىرمانعا تۇسىنىكتى بولۋ ءۇشىن ويىن تۋرالى از-كەم ايتا كەتكەن ءجون شىعار. Total War Saga: Troy – انتيكالىق داۋىردەگى گرەكتەر ومىرىنە ارنالعان ستراتەگيالىق ويىن. وندا گومەردىڭ «يللياداسى» مەن «وديسسەيىندە» ايتىلاتىن باھادۇرلەر مەن ميفتىك جاراتىلىستىڭ ءبارى قامتىلعان. ماسەلەن, ويىنشىعا گرەك قاھارماندارى – احيلەس, وديسسەي, مەنەلاي, اگامەمنون نەمەسە ترويا وكىلدەرى – گەكتور, سارپەدون, ەنەي, ءپاريستىڭ ءبىرىن تاڭداۋ ەركىندىگى بەرىلگەن. وسىلايشا, ەل باسقارۋ تىزگىنى بەرىلىپ, دامۋ ستراتەگياسىن قۇرۋى كەرەك.
گرەكتەردىڭ مىندەتى – ترويانى قۇلاتۋ, ال ترويالىقتار گرەك باسقىنشىلىعىنان قۇتىلۋى قاجەت. بۇل ماقساتقا جەتۋ ءۇشىن ويىنشى اسكەر جاساقتاپ, قاراماعىنداعى قالالاردى دامىتىپ, ەكونوميكاسىن اياققا تۇرعىزۋى ءتيىس. سونداي-اق شەتەلدىك باسقىنشىلاردان قورعانىپ, ءوز كەزەگىندە ەلىنىڭ اۋماعىن سوعىسا ءجۇرىپ ۇلعايتۋى كەرەك. قىسقاسى, كادىمگى انتيكالىق ءداۋىردىڭ زاماننىڭ كومپيۋتەرلىك نۇسقاسى.
جالپى, جوعارىدا ايتىپ وتكەن The Creative Assembly كومپانياسى وسىنداي ەرەكشە كومپيۋتەرلىك ويىندار جاساۋمەن شۇعىلدانىپ كەلە جاتقانىنا 20 جىلعا جۋىقتاپتى. Total war سەرياسى اياسىندا كومپانيا ەڭ العاش رەت Shogun ويىنىن 2000 جىلى جاريالادى.
بۇل ويىن XV-XVII عاسىرلاردا جاپونيادا بيلىك قۇرعان سەنگوكۋ داۋىرىنە ارنالعان. قاناتقاقتى بۇل جوبانىڭ ءساتتى شىققانى سونشالىق, سول كەزەڭنىڭ وزىندە Shogun-دى ميلليونعا جۋىق ادام كوشىرىپ العان ەكەن. بۇل كومپيۋتەر ەندى-ەندى دامىپ جاتقان كەزەڭ ءۇشىن كەرەمەت كورسەتكىش ەكەنى تۇسىنىكتى.
وسىنداي ستراتەگيالىق ويىننىڭ حالىققا ۇنايتىنىن تۇسىنگەن كومپانيا وكىلدەرى مۇنىمەن توقتاپ قالعان جوق. ياعني ديپلوماتيالىق قارىم-قاتىناس جاساۋ, تاق مۇراگەرىن بەلگىلەۋ, پارتياىشىلىك تارتىس, حانزادالارعا قالىڭدىق اپەرۋ, حانشايىمداردى ۇزاتۋ, شپيون جىبەرۋ, ءوز ءدىنىن تاراتۋ سەكىلدى تاسىلدەر ۆيدەو ويىندار سالاسىنا جاڭا لەپ اكەلدى.
كەيىننەن ورتا داۋىرگە ارنالعان Medieval: Total War جارىق كوردى. بۇل ويىننىڭ ەرەكشەلىگى وقيعا جەلىسى ەۋروپا مەن تاياۋ شىعىسقا ارنالدى. ۇلى كرەست جورىعى, ريم يمپەرياسى مەن ۆيزانتيا يمپەرياسىنىڭ سوڭعى كەزەڭدەرى, تۇرىكتەردىڭ وسمان يمپەرياسىنىڭ داۋىرلەۋى سەكىلدى تاريحي ساتتەر قامتىلعان. ءتىپتى ويىن بارىسىندا موڭعول شاپقىنشىلىعى باستالىپ, التىن وردا تۋىن تىكتەيدى.
بۇدان كەيىنگى Total War سەريالارى دا تابىستى بولدى دەپ ايتۋعا تولىق نەگىز بار. ماسەلەن, Total War Rome II بۇعان دەيىن بولماعان رەكوردتىق ناتيجە كورسەتىپ, ميلليونداپ ساتىلدى. وسىلايشا, كومپانيانى قىرۋار پايداعا كەنەلتتى. كەيىننەن بۇل كورسەتكىشتى فانتاستيكالىق الەمگە ارنالعان Warhammer نۇسقاسى باسىپ وزدى.
وسى ورايدا ايتا كەتەرلىگى, ويىننىڭ ۇلى دالاعا قاتىستى ءبىر-ەكى ەلەمەنتى بار. Rome II نۇسقاسى ءبىزدىڭ داۋىرىمىزگە دەيىنگى كەزەڭدى قامتىعاندىقتان, ويىنشىعا باسقا دا فراكتسيالارمەن بىرگە ماسساگەتتەردى, روكسالانداردى تاڭداۋعا مۇمكىندىك بەرىلدى. سونداي-اق اقتاۋ قالاسى مەن ساراي قالاسى Total War قالالارىنىڭ قاتارىنا ەندى.
بۇدان بولەك, 2015 جىلى جارىق كورگەن Total War: Attila نۇسقاسى عۇن كوسەمى ەدىل پاتشاعا ارنالىپ, سول ءداۋىردى تولىقتاي قامتىعان. ماسەلەن, عۇن كوسەمدەرى ريم يمپەرياسىنا ءجيى-ءجيى شاپقىنشىلىق جاسايدى. وعان قوسا, ويىندا كوشپەندىلەردىڭ ءومىر سالتى, تاڭىرلىك ءدىنى ەسكەرىلگەن. قىسقاسى, عۇندارعا ارنالعان نۇسقاسى دا جۇرت تاراپىنان قولداۋعا يە بولىپ, العاشقى اپتادا 11 ميلليون داناسى ساتىلدى.
ۆيدەو ويىندار جانرىنداعى وسىنداي مالىمەتتەرگە قاراپ وتىرىپ ويعا قالاسىڭ. تاريحتى قوپارساڭ, ۇلى دالانىڭ وعلاندارى مىنگەن اتتىڭ تۇياعى قارت قۇرلىقتى دۇبىرگە تولتىرعانى ءمالىم. «بارار جەرىڭ – بالقان تاۋ, ول دا ءبىزدىڭ بارعان تاۋ», دەپ اتا-بابالارىمىز بەكەر ايتپاسا كەرەك. ەندەشە, تاريحي مالىمەتتەردى نەگىزگە الا وتىرىپ, التىن ورداعا نەمەسە قازاق حاندىعىنا قاتىستى كومپيۋتەرلىك ويىن جاساۋ ارتىق ەتپەس ەدى. جوعارىدا ايتىپ وتكەن The Creative Assembly كومپانياسىمەن كەلىسىپ, Total war سەرياسىنىڭ اياسىندا ءبىر نۇسقاسىن وسىعان ارناسا, ەلىمىز بەن وتكەنىمىزدى الەمگە تانىتۋعا مۇمكىندىك بەرەتىنى انىق. سول كەزدە الەم ءبىزدى ۇلى دالا ەلى دەپ بىلەر ەدى.
