"كەز كەلگەن جۇمىستىڭ جەمىستى بولۋى تەرەڭ عىلىمي نەگىز بەن سول باستاماعا شىن جاناشىر مامانعا بايلانىستى. سوندىقتان, بۇل ماسەلەلەرگە ۇلكەن كوڭىل بولىنەدى. وسىعان وراي, مينيسترلىك جانىنان ارنايى قوعامدىق دامۋ ينستيتۋتىنىڭ قىزمەتى جولعا قويىلدى. وعان باعدارلاماعا عىلىمي-ساراپتامالىق جەتەكشىلىك ەتۋ مىندەتىمەن قاتار, وڭىرلىك كەڭسەلەردەگى ماماندارعا ادىستەمەلىك-مەتودولوگيالىق كومەك كورسەتۋ جۇمىسى جۇكتەلگەن", دەدى ايدا بالاەۆا.
ءمينيستردىڭ اتاپ وتۋىنشە, وسى جىلدىڭ وزىندە ينستيتۋت كۇشىمەن 26 عىلىمي ءىس-شارا, 30 الەۋمەتتىك زەرتتەۋ, 5 ساراپتامالىق بايانداما دايىندالىپ, جاۋاپتى مەملەكەتتىك ورگاندارعا ۇسىنىلدى. ولكەلەردە 13 پراكتيكالىق سەمينارلار مەن 30-دان استام ۆەبينارلار وتكىزىلىپ, "رۋحاني جاڭعىرۋمەن" اينالىساتىن 500 مامان ءبىلىمىن شىڭدادى.
"ەڭ باستىسى – ەلباسى اتاپ كورسەتكەن رۋحاني جاڭعىرۋدىڭ نەگىزگى قۇندىلىقتارى ءتۇسىندىرىلىپ, كوپتەگەن ءىس-شارالاردىڭ تۇجىرىمداماسى وزگەردى", دەدى ول.
ايتا كەتەيىك, مەملەكەتتىك حاتشى قىرىمبەك كوشەرباەۆتىڭ توراعالىعىمەن وتكەن كوميسسيا وتىرىسىندا "رۋحاني جاڭعىرۋ" باعدارلاماسىن ودان ءارى تەرەڭدەتىپ ۇلتتىق جاڭعىرۋ كەزەڭىنە وتكىزۋدىڭ ارنايى جول كارتاسىن جاساۋ قاجەت دەگەن شەشىم قابىلداندى. بۇل قۇجات اسا ماڭىزدى ۇلتتىق جوبا رەتىندە جۇرگىزىلەدى. ۇلتتىق جاڭعىرۋ جوباسىنىڭ ەڭ باستى ءمانى – ۇلتتىڭ باسەكەگە قابىلەتتىلىگىن ارتتىرۋ. بۇل – ۇلتتىق جاڭعىرۋدىڭ ستراتەگيالىق ماقساتى بولىپ قالادى. جول كارتاسىندا مەملەكەتتىك ءتىل مارتەبەسىن ارتتىرۋ, ءبىلىم جانە عىلىمدى دامىتۋ, جوعارى ۇلتتىق جانە جالپىادامزاتتىق قۇندىلىقتار نەگىزىندە رۋحاني-ادامگەرشىلىك جانە پاتريوتتىق تاربيە بەرۋ, ەڭبەك ادامىن قالىپتاستىرۋ, اۋىلدى تۇلەتۋ سياقتى ت.ب كەشەندى ءىس-شارالار قامتىلادى. مەملەكەتتىك حاتشى وتىرىستى قورىتىندىلاي كەلە, "رۋحاني جاڭعىرۋ" باعدارلاماسىنىڭ باسىم باعىتتارى بويىنشا جۇمىستى ودان ءارى جانداندىرۋ بويىنشا ناقتى تاپسىرمالار بەردى.
