تاعايىنداۋ • 28 قازان، 2020

نۇرتورە ءجۇسىپ قازاقستان مەديا اليانسىنىڭ جاڭا جەتەكشىسى بولدى

327 رەت كورسەتىلدى

پارلامەنت سەناتىنىڭ دەپۋتاتى نۇرتورە ءجۇسىپ قازاقستان مەديا اليانسىنىڭ باسقارما توراعاسى بولىپ سايلاندى، دەپ حابارلايدى Egemen.kz 

كەشە "قازاقستان مەديا اليانسى" قوعامدىق بىرلەستىگىنىڭ قۇرىلتايشىلار جينالىسىندا باسقارما توراعاسى اۋىستى. بۇرىنعى جەتەكشى ارمانجان بايتاسوۆ بۇل قىزمەتتى ءۇش جىل اتقاردى.

"جاڭا جەتەكشىنىڭ كانديداتۋراسىن قما ءبىرىنشى سەزىندە-اق تالقىلاعان بولاتىنبىز، جاڭا توراعا – نۇرتورە ءجۇسىپ"، دەدى ا.بايتاسوۆ.

جينالىسقا قاتىسقان قۇرىلتايشىلار ارمانجان بايتاسوۆتىڭ باستاماسىمەن داۋىس بەرۋگە قاتىستى. قالىس قالعان ميحايل دوروفەەۆتەن باسقاسى قما جاڭا باسقارما توراعاسىنىڭ كانديداتۋراسىن قولداپ داۋىس بەردى. نۇرتورە ءجۇسىپ قازىرگى كەزدە قر پارلامەنتى سەناتىنىڭ دەپۋتاتى.

نۇرتورە بايتىلەس ۇلى 1961 جىلى 29 ساۋىردە قىزىلوردا وبلىسىنىڭ شيەلى اۋدانىنداعى كەردەلى كەنتىندە دۇنيەگە كەلگەن. اكەسى – بايتىلەس ءجۇسىپوۆ، اناسى – رابيعا بايدىلداەۆا. 1984 جىلى كيروۆ اتىنداعى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن.

2017 جىلدان باستاپ قازاقستان رەسپۋبليكاسى پرەزيدەنتىنىڭ جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ مۇشەسى. ء"بىز كىمنەن ازبىز؟" (2001)، "قازاق قىزى" (2004)، "ەلەس پەن بەلەس" (2006)، "مىڭ قۇمىرسقا جانە ءبىز" كىتاپتارىنىڭ اۆتورى. ەڭبەك جولىن پاۆلودار وبلىستىق "سارىارقا سامالى" گازەتىندە اگروونەركاسىپ بولىمىنەن باستادى. بۇل گازەتتە كولىك جانە كوممۋنيكاتسيا ءبولىمىنىڭ مەڭگەرۋشىسى، باس رەداكتوردىڭ ورىنباسارى بولىپ جۇمىس ىستەدى.

1990-1996 جىلدارى – "ەگەمەن قازاقستان" رەسپۋبليكالىق گازەتىنىڭ اعا ءتىلشىسى، باس رەداكتورىنىڭ ەكونوميكالىق ماسەلەلەر جونىندەگى ورىنباسارى.

1996-2002 جىلدارى – "جاس الاش"، "اق جول قازاقستان"، "ەگەمەن قازاقستان"، "استانا اقشامى" گازەتتەرىنىڭ باس رەداكتورى.

2008-2019 جىلدارى – "AIQYN" رەسپۋبليكالىق قوعامدىق-ساياسي كۇندەلىكتى گازەتىنىڭ باس رەداكتورى.

2019 جىلى 12 تامىزدا قر پرەزيدەنتىنىڭ جارلىعىمەن قازاقستان رەسپۋبليكاسى پارلامەنتى سەناتىنىڭ دەپۋتاتى بولىپ تاعايىندالدى.

"قازاقستاننىڭ ەڭبەك سىڭىرگەن قايراتكەرى" قۇرمەتتى اتاعىنىڭ يەسى; قازاقستان رەسپۋبليكاسى جۋرناليستەر اكادەمياسىنىڭ اكادەميگى; قازاقستان رەسپۋبليكاسى گۋمانيتارلىق عىلىمدار اكادەمياسىنىڭ اكادەميگى; قازاقستاننىڭ قۇرمەتتى ءجۋرناليسى، قازاقستان جۋرناليستەر وداعى ب. بۇلقىشەۆ اتىنداعى سىيلىقتىڭ لاۋرەاتى، قازاقستان جۋرناليستەر وداعى س. سادۋاقاسوۆ اتىنداعى سىيلىقتىڭ لاۋرەاتى; بۇقارالىق اقپارات قۇرالدارى سالاسىنداعى پرەزيدەنت سىيلىعىنىڭ لاۋرەاتى; "التىن ادام" ۇلتتىق سىيلىعىنىڭ لاۋرەاتى – جىل ادامى; قازاقستان جۋرناليستەر وداعى "التىن جۇلدىز" سىيلىعى، "قازاقستان رەسپۋبليكاسىنىڭ تاۋەلسىزدىگىنە 10 جىل" مەدالى، "قازاقستان رەسپۋبليكاسىنىڭ كونستيتۋتسياسىنا 10 جىل" مەدالى، قازاق جۋرناليستيكاسىنا سىڭىرگەن ەڭبەگى جانە بەلسەندى قوعامدىق قىزمەتى ءۇشىن قۇرمەت وردەنى; ء"تىل جاناشىرى" مەدالىمەن ماراپاتتالعان.

شيەلى اۋدانىنىڭ جانە قىزىلوردا وبلىسىنىڭ قۇرمەتتى ازاماتى.

سوڭعى جاڭالىقتار

ۇقساس جاڭالىقتار