پرەزيدەنت • 28 قازان، 2020

پرەزيدەنتكە ىندەتكە قارسى وتاندىق ۆاكتسينانىڭ ازىرلەنۋ بارىسى ايتىلدى

37 رەت كورسەتىلدى

مەملەكەت باسشىسى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ باس ديرەكتورى كۇنسۇلۋ زاكاريانى قابىلدادى، دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.

قاسىم-جومارت توقاەۆقا كوروناۆيرۋسقا قارسى وتاندىق ۆاكتسينانىڭ ازىرلەنۋ بارىسى تۋرالى اقپارات بەرىلدى.

كۇنسۇلۋ زاكاريانىڭ مالىمەتىنە سايكەس بۇگىنگى تاڭدا ينستيتۋتتىڭ بازاسىنداعى بەس پلاتفورمادا كوروناۆيرۋسقا قارسى ۆاكتسينالار دايىندالۋدا. ينستيتۋت ازىرلەگەن بەلسەندى ەمەس ۆاكتسينا دۇنيەجۇزىلىك دەنساۋلىق ساقتاۋ ۇيىمىندا ماقۇلدانىپ، كلينيكالىق زەرتتەۋلەردىڭ ءبىرىنشى كەزەڭىنەن ءوتتى جانە قازىرگى ۋاقىتتا ۇلتتىق عىلىمي فتيزيوپۋلمونولوگيا ورتالىعىندا زەرتتەۋدىڭ ەكىنشى كەزەڭى جۇرگىزىلىپ جاتىر.

كوروناۆيرۋس ىندەتىنە قارسى ازىرلەنىپ جاتقان وتاندىق ەكىنشى سۋببىرلىكتى ۆاكتسينا ددسۇ تاراپىنان ماقۇلدانىپ، كلينيكالىق زەرتتەۋلەردەن ءساتتى وتكەن. بۇل ۆاكتسينانىڭ ماتەريالدارى دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعىندا قارالىپ جاتىر.

پرەزيدەنتكە قازاقستاندا بۇرىن-سوڭدى بولماعان يممۋندىق پرەپاراتتار شىعاراتىن زاۋىت قۇرىلىسى تۋرالى دا مالىمەت بەرىلدى. عىلىمي-زەرتتەۋ ينستيتۋتىندا وتاندىق ۆاكتسينالار شىعاراتىن زاۋىت قۇرىلىسى جۇرگىزىلۋدە. زاۋىتتىڭ جوبالىق قۋاتى جىلىنا 60 ميلليون مولشەردە ۆاكتسينا شىعارۋعا جەتەدى. وسى ارقىلى وتاندىق نارىقتى عانا قامتىپ قويماي، ونى ەكسپورتتاۋعا دا مۇمكىندىك تۋادى. اتالعان زاۋىت ىسكە قوسىلعان كەزدە ەلىمىز يمپورتتىق تاۋەلدىلىكتەن ارىلادى. 

مەملەكەت باسشىسى عىلىمي-زەرتتەۋ ينستيتۋتىنىڭ قىزمەتكەرلەرىنە ارنالعان تۇرعىن ءۇي قۇرىلىسىنىڭ قارقىنىن ارتتىرۋ ۇسىنىسىن قولدادى. سونىمەن قاتار كەزدەسۋدە قىزمەتكەرلەردىڭ جالاقىسىن كوتەرۋ، اتالعان سالاعا جاس مامانداردى كوپتەپ تارتۋ، نورماتيۆتىك-قۇقىقتىق اكتىلەرگە ۆاكتسينانى ۋاقىتشا تىركەۋ تۇسىنىگىن ەنگىزۋ ماسەلەلەرى قوزعالدى.

كەزدەسۋ سوڭىندا قاسىم-جومارت توقاەۆ وتاندىق ۆاكتسينالاردى دايىنداۋ ىسىنە قاتىستى بىرقاتار ناقتى تاپسىرما بەردى.

سوڭعى جاڭالىقتار

ۇقساس جاڭالىقتار