قىزىلوردادا سالا ۇزدىكتەرى ماراپاتتالدى

ايماقتار • 28 قازان، 2020

قىزىلوردادا سالا ۇزدىكتەرى ماراپاتتالدى

18 رەت كورسەتىلدى

بۇگىن وبلىس اكىمى گۇلشارا ابدىقالىقوۆا ونلاين رەجيمدە وتكەن "التىن ءدان-2020" شاراسىنا قاتىستى، دەپ حابارلايدى Egemen.kz

مۇرات جەتپىسباەۆ

اۋىلشارۋاشىلىعى ماماندارى ماراپات يەلەنگەن شارادا ايماق باسشىسى مەملەكەتتىك قولداۋدىڭ ارقاسىندا سالا ءوندىرىسىنىڭ دامۋىندا وڭ ناتيجەلەر قالىپتاسقاندىعىن تىلگە تيەك ەتتى. بيىل ءوڭىر ديقاندارى سۋ تاپشىلىعىنا قاراماستان، باستى داقىلدىڭ ءار گەكتارىنان ورتاشا 61،8 تسەنتنەردەن ءونىم الىپ، 551 مىڭ توننادان استام سىر كۇرىشىن ەل قامباسىنا قۇيىپ، كەزەكتى رەكوردتىق كورسەتكىشكە قول جەتكىزدى.

وڭىردە اگرارلىق سالادا وندىرىلگەن ءونىم كولەمى 94،4 ملرد تەڭگەگە جەتىپ، وتكەن جىلدىڭ وسى كەزەڭىمەن سالىستىرعاندا 3،2 پايىزعا ارتقان. ال، اۋىل شارۋاشىلىعىنا سالىنعان ينۆەستيتسيا كولەمى 1،8، تاماق ونىمدەرىن وندىرۋگە سالىنعان ينۆەستيتسيا 1،6 ەسەگە ۇلعايعان.

جىل سايىنعى سۋ تاپشىلىعىن ەسكەرە كەلە، قىسقا مەرزىمدە اۋىل شارۋاشىلىعى ءوندىرىسىن، اسىرەسە، ەگىنشىلىك سالاسىن ءارتاراپتاندىرۋ باعىتى قولعا الىندى. بۇل رەتتە سوڭعى بەس جىلدا مال ازىقتىق داقىلدار 4 مىڭ گەكتارعا، كۇرىشتەن باسقا ءداندى داقىلدار 7،5 مىڭ گەكتارعا ارتقان.

وڭىردە ارتاراپتاندىرۋعا باعىتتالعان سويا، جۇگەرى جانە بيداي داقىلدارى ەگىسىنىڭ كولەمىن ۇلعايتىپ، اكۆاگەلدى پايدالانىپ ەگىلگەن 80 گەكتار كۇزدىك بيدايدىڭ ءار گەكتارىنان 18 تسەنتنەردەن ءونىم الىندى. سونداي-اق، الداعى كەزدە كۇرىشتىڭ ەگىس كولەمىن ازايتىپ 80-85 مىڭ گەكتارعا تۇراقتاندىرىپ، ورنىنا ديۆەرسيفيكاتسيالى داقىلدار ەگۋ كوزدەلىپ وتىر.

شارا بارىسىندا اۋىل شارۋاشىلىعى باعىتىندا نەگىزگى تابىس تۇسىرەتىن سەكتورلاردىڭ دامۋ پەرسپەكتيۆالارى ءسوز بولىپ، ءاربىر اۋداننىڭ ەرەكشەلىكتەرىنە قاراي ءونىم ءوندىرۋ ماسەلەسى ايتىلدى. كەلەسى جىلى قازالى اۋدانىندا جاڭبىرلاتىپ سۋعارۋ تاسىلىمەن 87 گەكتار جۇگەرى، جاڭاقورعان اۋدانىندا تومات پاستاسى ءوندىرىسىن اشۋعا باعىتتالعان 3 مىڭ گەكتار قىزاناق ەگىلمەك. ال شيەلى اۋدانىندا پايدالانىلعان اعىن سۋدى قايتا قولدانۋ ارقىلى جاڭبىرلاتۋ تاسىلىمەن 10 مىڭ گەكتارعا جوڭىشقا داقىلى ەگۋ قولعا الىنادى.

ءوڭىردىڭ ەكونوميكالىق كىرىسىن كوبەيتۋدە مال شارۋاشىلىعى باعىتىن دامىتۋ ماسەلەسى دە وزەكتى. ءمۇيىزدى ءىرى قارا 4،4%-عا، جىلقى 8،5%-عا، تۇيە 5،3%-عا كوبەيىپ، مال ونىمدەرىنىڭ ءوندىرىسى بويىنشا بۇگىنگى كۇنگە 26،3 مىڭ توننا ەت، 65،2 مىڭ توننا ءسۇت ءوندىرىلىپ، ەت ءوندىرىسى 2،5%-عا، ءسۇت ءوندىرىسى 2،6%-عا ارتقان. ايماقتىڭ ەكسپورتتىق الەۋەتى ارتىپ، اۋىل شارۋاشىلىعى تاۋار وندىرۋشىلەرىمەن 17 مەملەكەتكە 22،5 ملن اقش دوللارىن قۇرايتىن 66،1 مىڭ توننا اۋىل شارۋاشىلىعى ونىمدەرى ەكسپورتتالعان. ونىڭ ىشىندە، بيىل العاش رەت وبلىستان گەرمانياعا 421،5 توننا قامىس، ال قىتاي مەن اۋعانستانعا 391 توننا ماقسارى مايى جونەلتىلگەن.

ايماقتا اۋىل شارۋاشىلىعىنا قاجەتتى سۋ توراپتارىن قايتا قالپىنا كەلتىرۋ جۇمىستارى دا جولعا قويىلعان. ماسەلەن، "2020-2021 جىلدارعا ارنالعان جۇمىسپەن قامتۋدىڭ جول كارتاسى" باعدارلاماسى اياسىندا "جيدەلى سۋ قويماسىن قايتا جاڭعىرتۋ" جۇمىستارىنا 450 ملن تەڭگە، "ايتەك سۋ تورابىن قايتا جاڭعىرتۋ" جوبالارىنا 700 ملن تەڭگە قارجى قارالىپ، جۇمىستار ىسكە اسۋدا. ال، الداعى كەزدە جاز ماۋسىمىنداعى سۋ تاپشىلىعىن شەشۋ ماقساتىندا "قاراوزەك سۋ قويماسى" جانە شيەلى اۋدانىندا قىسقى كەزەڭدەگى تاسقىن سۋدى جيناپ ەگىستىككە پايدالاناتىن "كۇمىسكەتكەن" سۋ قويماسىن ىسكە اسىرۋ مىندەتى تۇر.

شارا سوڭىندا ايماق باسشىسى 27 نوميناتسيا بويىنشا ۇزدىك اۋداندار مەن اگروونەركاسىپ سالاسىنىڭ وزاتتارىن ماراپاتتادى. مۇنان بولەك، سالا ارداگەرلەرىنە اۋىل شارۋاشىلىعى مينيسترلىگىنىڭ "اۋىل شارۋاشىلىعى سالاسىنىڭ ۇزدىگى" جانە "ەڭبەك ارداگەرى" توسبەلگىسىن تابىستادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز