اقتوبە قالاسىنداعى اۋە قورعانىسى كۇشتەرى اسكەري ينستيتۋتىنىڭ ەكىنشى كۋرس كۋرسانتتارى العاش رەت اسپانعا وقۋ-جاۋىنگەرلىك تىكۇشاقتارمەن كوتەرىلدى. اسكەري اۆياتسيا فاكۋلتەتىنىڭ ەكىنشى كۋرس ستۋدەنتتەرىنىڭ ۇشۋ تاجىريبەسى ءبىر جىل بۇرىن باستالعان. بۇعان دەيىن كۋرسانتتارعا ەكىنشى وقۋ جىلىنان كەيىن تىكۇشاقتى باسقارۋعا رۇقسات ەتىلسە, ەندى ولار ەكىنشى كۋرستىڭ باسىنان باستاپ ۇشۋدى ۇيرەنەدى. بۇل ءبىلىم الۋشىلار ءۇشىن عانا ەمەس, وقىتۋشىلار ءۇشىن دە ەرەكشە ءسات. ينستيتۋتتىڭ قولباسشىلىعى مەن پروفەسسورلىق-وقىتۋشىلىق قۇرامىنىڭ پىكىرىنشە, بۇل ۇشۋ ساعاتتارى مەن بولاشاق ۇشقىشتاردىڭ تاجىريبەسىن ارتتىرۋعا ىقپال ەتەدى.
ۇشۋ تەوريادان باستالاتىنى بەلگىلى. ۇشقىش ورنىنا وتىرماس بۇرىن ءاربىر كۋرسانت اۆياتسيالىق تەحنيكانى, تىكۇشاقتى ۇشۋعا پايدالانۋ جونىندەگى نۇسقاۋدى جانە اۋەايلاق اۋدانىن جاقسى بىلەتىنىن راستايتىن سىناقتاردان وتەدى.
بۇل تاپسىرمانى ءبىرىنشى بولىپ ورىنداعان كۋرسانت جاسۇلان قۋانىشوۆ ۇشقىش بولۋىنىڭ بالالىق شاقتاعى قىزىعۋشىلىعىمەن تىعىز بايلانىستى ەكەنىن ايتادى.
«اۋە قورعانىس كۇشتەرىنىڭ اسكەري ينستيتۋتىنا تۇسپەس بۇرىن اۋە كەڭىستىگى مەنى قىزىقتىراتىن. بالا كەزىمنەن ءوزىمدى ۇشاقتىڭ ۇشقىشى رەتىندە ەلەستەتتىم. مەكتەپتە فيزيكا ءپانىن وقىپ, تىكۇشاقتىڭ جۇمىس ىستەۋ پرينتسيپىنە قىزىعۋشىلىق تانىتا باستادىم. بۇل پروتسەسس مەنى قاتتى قىزىقتىردى, سوندىقتان اسكەري اۋە كۇشتەرى ينستيتۋتىنا ءتۇسىپ, اسكەري اۆياتسيا فاكۋلتەتىن تاڭدادىم», دەدى كۋرسانت.
اۋە تەحنيكاسىن نۇسقاۋشى اسپانعا كوتەرەدى. كۋرسانتتاردىڭ سول ءساتتى ەستە ساقتاۋى كەرەك, ال ەلەمەنتتەردىڭ ءبىرىن باسقارۋدى تاجىريبەلى ۇشقىشتىڭ باسشىلىعىمەن جۇزەگە اسىرادى.
مي-8 تىكۇشاعى جەردەن بىرنەشە مەترگە كوتەرىلىپ, قاتىپ قالدى. ەندى كۋرسانت بايبولسىن ساعىندىقوۆ ۇشۋ جاتتىعۋلارىن پىسىقتاۋدى ۇيرەنۋى كەرەك. سىرتتان قاراعاندا تاپسىرما وڭاي سەكىلدى كورىنۋى مۇمكىن. الايدا ءىس جۇزىندە سالماعى جەتى تونناعا جۋىق تىكۇشاقتى دۇرىس قالىپتا ۇستاپ تۇرۋ وڭاي شارۋا ەمەس ەكەنىن وقىتۋشىلار مەن كۋرسانتتار دا ايتادى.
اۋەگە العاش كوتەرىلگەن كۋرسانت ب.ساعىندىقوۆ بۇل ءساتتىڭ اسەرلى بولعاندىعى سونشالىق, ءومىرىمدى وسى كاسىپكە ارناعىم كەلەتىنىن بىردەن ءتۇسىندىم دەيدى.
«بۇل – مەنىڭ ومىرىمدەگى العاشقى رەت ۇشۋىم. ءبىرىنشى رەت تىكۇشاققا جاقىنداپ, ونى اينالىپ ءوتىپ, ۇشۋ الدىنداعى تەكسەرۋدەن ءوتىپ, ۇشقىشتىڭ جۇمىس ورنىنا وتىردىم. ۇشۋ 15 مينۋتقا سوزىلدى, بۇل ۋاقىت مەن ءۇشىن ەرەكشە ءوتتى. كەۋدەمدى تولقىنىس سەزىمى كەرنەدى. كولىككە وتىرعاننان كەيىن ءوز ءومىرىمدى اۆياتسيامەن, اسپانمەن ماڭگى بايلانىستىراتىنىمدى ءتۇسىندىم», دەيدى كۋرسانت.
كۋرسانتتارمەن وقۋ-جاتتىعۋ ۇشۋلارىن وقىتۋدا كوپ جىلدىق تاجىريبەسى بار ءۇشىنشى سىنىپتى ۇشقىش, كاپيتان ۆلاديمير شالاي ورىندادى. ونىڭ ايتۋىنشا, العاشقى ۇشۋ تەك كۋرسانت ءۇشىن عانا ەمەس, نۇسقاۋشى ءۇشىن دە ماڭىزدى. كۋرسانتتىڭ ءبىرىنشى رەيستەگى كوڭىل كۇيى مەن ءىس-ارەكەتتەرى ونىڭ وزدىگىنەن ۇشا الاتىندىعىن بىردەن انىقتايدى ەكەن.
