Digital ماركەتينگ دەگەن نە؟
تسيفرلى ماركەتينگ بۇل ءارتۇرلى تسيفرلى تاكتيكانى, قۇرالداردى جانە بايلانىس ارنالارىن قولدانا وتىرىپ, الەۋەتتى تۇتىنۋشىلارمەن, ءوز ۋاقىتىنىڭ كوپ بولىگىن ينتەرنەتتە وتكىزەتىن ماقساتتى اۋديتوريامەن بايلانىسۋعا ارنالعان ماركەتينگتىك ءىس-شارالار جيىنتىعى. ال بۇل جيىنتىق بارلىق سالادا اۋاداي قاجەت ەكەنى دە زامان شىندىعى.
Digital ماركەتينگ تاقىرىبىنا ەنەتىن بىرقاتار تاكتيكا مەن قۇرال بار. بۇل كومپانيانىڭ ۆەب-سايتىنىڭ ءوزى جانە ماركەتينگتىڭ تسيفرلى ارنالارى, ينتەرنەت-جارناما جانە تۇتىنۋشىلاردى ساتىپ الۋ ارنالارى – SEO, ەلەكتروندى e-mail ماركەتينگى, ساتىلىم نۇكتەسى, كونتەنت-ماركەتينگ, تيزەر جارناماسى, SMM سياقتى ءمالىم دە بەيمالىم قۇرالداردان تۇرادى.
ءارتۇرلى تسيفرلى ماركەتينگتىك ارنالاردى قولداناتىن بيزنەس ماقساتتى اۋديتوريامەن اناعۇرلىم ءتيىمدى جانە ۋاقتىلى ءوزارا ارەكەتتەسۋ مۇمكىندىگىنە يە. سول ارقىلى جاڭا كليەنتتەردىڭ سانىن جانە برەندكە اۋديتوريانىڭ قىزىعۋشىلىعىن ارتتىرادى. بۇعان بايلانىستى حالىق اراسىندا «زاتتى قاراپايىم ادام ساتسا – تاۋار, ماركەتينگ جاساسا – توپ-تاۋار» دەگەن ءسوز دە ءجيى ايتىلىپ ءجۇر.
ىزدەۋ جۇيەسىن وڭتايلاندىرۋ (SEO)
بۇل ينتەرنەت ماركەتينگتەگى باستى قۇرال. ىزدەۋ جۇيەسىن وڭتايلاندىرۋ (seo optimization) تۇلعانىڭ, سايتتىڭ, كومپانيانىڭ, ءتىپتى الەۋمەتتىك جەلىدەگى جەكە اككاۋنتتى ىزدەۋ ناتيجەسىندە تىزىمدە ءبىرىنشى تۇرۋعا, جوعارى پوزيتسيالارعا يە بولۋعا كومەكتەسەدى. بۇل ترافيكتى ارتتىرادى. ال ترافيك – سۇرانىس پەن ساتىلىم كولەمىن ارتتىرادى.
SEO قۇرالدارى:
- ۆەب-سايتتار;
- بلوگتار;
- ينفوگرافيكا.
ماركەتينگ كونتەنتى
بۇل تەرمين برەندتىڭ تانىمالدىلىعىن ارتتىرۋ, ترافيكتىڭ ءوسۋى, ماقساتتى اۋديتوريامەن بايلانىس, جەتەكشى پوزيتسيالار تۋدىرۋ جانە جاڭا كليەنتتەردى تارتۋ ماقساتىندا جاسالاتىن كونتەنت قۇرۋدى جانە ىلگەرىلەتۋدى بىلدىرەدى. كونتەنت-ماركەتينگ – ينتەرنەتتەگى بيزنەستى العا جىلجىتۋدىڭ ەڭ ءتيىمدى جانە ءالى باعالانباعان قۇرالدارىنىڭ ءبىرى. ينستاگرام جەلىسىن اشا قالساڭىز, ء«ماتىن جازىپ بايىپ كەت» دەيتىن جارناماشىلاردىڭ كوبەيگەنى كونتەنت ارقىلى ماركەتينگ جاساۋدى ۇيرەتەمىز دەگەنى.
كونتەنت-ماركەتينگ ستراتەگياسىن جۇزەگە اسىرۋعا ارنالعان ارنالار:
- بلوگ جازبالارى;
-ەلەكتروندى كىتاپتار مەن ماقالالار;
- پودكاستتار;
- بلوگتار;
- ينفوگرافيكا;
- ونلاين كىتاپشالار مەن كاتالوگتار.
الەۋمەتتىك جەلىدەگى ماركەتينگ
الەۋمەتتىك جەلىگە بارلىعىمىز تىركەلگەنبىز. تاۋلىكتەگى ۋاقىتىمىزدىڭ باسىم بولىگى جەلىدە «جاسىل بەلگى» بەرىپ وتىرامىز. ال ماماندار وسى «پايداسىز» وتىرىستان دا پايدا تابۋعا بولاتىنىن ايتادى. ماركەتينگتىڭ بۇل ءتۇرى ءسىزدىڭ جەكە برەندىڭىزدى دە, بيزنەسىڭىزدى دە الەۋمەتتىك مەديادا جارنامالاۋعا باعىتتالعان. بۇل – وزگەلەردىڭ ءسىزدىڭ برەند تۋرالى حاباردار بولۋ اياسىن ارتتىرۋ, ترافيكتى كوبەيتۋ جانە جەتەكشى پوزيتسيالار جاساۋ ءۇشىن قولدانىلاتىن قۇرال. تۇپتەپ كەلگەندە جەلى قولدانۋشىلارى ءوز برەندى ءۇشىن جۇمىس ىستەپ جۇرگەنىن ءوزى بايقاماۋى دا مۇمكىن. ويتكەنى كۇن سايىن جاريالايتىن سۋرەتتى جازبالاردىڭ ءوزى دە دۇرىس قولدانا بىلگەنگە وراسان زور جارناما. تەك شەگىن ۇمىتىپ قالماۋ ماڭىزدى.
الەۋمەتتىك مەديا ماركەتينگ (SMM) پايدالاناتىن ارنالار:
- Facebook;
- Twitter;
- LinkedIn;
- Instagram;
- Snapchat;
- Pinterest.
- ينتەرنەت كەز كەلگەن بيزنەس ءتۇرىنىڭ ءوسۋى مەن دامۋىنا شەكسىز مۇمكىندىكتەر ۇسىنادى. ءتىپتى 100% وفلايندا جۇرگىزىلەتىندەي بولىپ كورىنگەن كاسىپتىڭ ءوزىن ينتەرنەت ارقىلى جانداندىرۋعا بولاتىنىنا كوپتەگەن دالەل بار.
ەگجەي-تەگجەيلى ساراپتاما جانە كەڭ اۋديتوريانى قامتۋ مۇمكىندىگى شەكسىز ساندىق ماركەتينگتىڭ جالپى ارتىقشىلىعى دا وسىندا. ءارتۇرلى سالالارداعى كومپانيالار مۇنى ءىس جۇزىندە دالەلدەپ كەلەدى. ماسەلەن, lafounder.com باسىلىمىنىڭ ماركەتولوگ ماماندارىنىڭ ايتۋىنشا, تسيفرلى ماركەتينگتىڭ نەگىزىن ءتۇسىنىپ, ونىڭ نە ەكەنىن ءبىلىپ, نەگىزگى تسيفرلى ماركەتينگتىك ارنالاردىڭ قالاي جۇمىس ىستەيتىنىنە كوز جەتكىزە وتىرىپ, كەز كەلگەن ادامعا ينتەرنەتتە ءوز بيزنەسىن ءتيىمدى ىلگەرىلەتۋگە كومەكتەسەتىن, وزىندىك برەند قالىپتاستىرىپ, سان قىرىنان تانىتا الاتىن ستراتەگيا جاساۋ وڭاي.
ولار حالىققا «وسى قۇرالداردى ءوز بيزنەسىڭىزدە ءالى قولدانبايتىن بولساڭىز, وندا تاسىلدەرىڭىزدى قايتا قاراۋ تۋرالى ويلانىپ, ءدال قازىر باستاڭىز», دەگەن ۇندەۋ دە تاستادى.
ماماندار تسيفرلى تەلەۆيزيا مەن كوشەدەگى جارناما باياعىداي اسەر ەتپەيتىنىن, ونىڭ ورنىن ديجيتال گادجەتتەردەگى سان مىڭ ماركەتينگتىك امالدار باساتىنىن, باسىپ تا قويعانىن ايتىپ ءجۇر.
دەسە دە, قالادا, جىلى ۇيدە وتىرعان ماركەتولوگتارعا ايتا سالۋ وڭاي شىعار؟ وعان شالعاي ەلدىمەكەندەردەگى وتانداستاردىڭ ينتەرنەتكە قولجەتىمدىلىگى قامتاماسىز ەتىلسە دەڭىز... ايتپەسە ءبارى بەكەر-اۋ؟!
