قوعام • 26 قازان، 2020

ۆولونتەرلەر دە رەيد جۇرگىزەدى

24 رەت كورسەتىلدى

ەلوردالىق ۆولونتەرلەر شتابى قازان ايىنان باستاپ پد، اكىمشىلىك جانە سەس قىزمەتكەرلەرىمەن بىرىگىپ، تۇراقتى تۇردە مونيتورينگ جۇرگىزىپ كەلەدى، دەپ حابارلايدى Egemen.kz

كارانتين شارالارى بويىنشا تالاپتار مەن شەكتەۋلەر قاداعالانادى. ولاردىڭ مىندەتى – قاۋىپسىزدىك تۋرالى قاجەتتى اقپاراتتى حالىققا جەتكىزۋ. جالپى رەيدتەر ادامدار كوپ جينالاتىن جەرلەردە اپتاسىنا بەس كۇن وتكىزىلەدى. 

"مونيتورينگتىك توپ كۇندەلىكتى ءوز جۇمىستارىن ۇزدىكسىز اتقارۋدا. نەگىزگى ماقساتىمىز – ۆيرۋستىڭ تارالۋىنىڭ الدىن الۋ جانە مەيلىنشە ەكىنشى تولقىننان جەڭىل ءوتۋ. مونيتورينگ بارىسىندا تاماقتانۋ ورىندارىنا، ساۋدا ورتالىقتارىنا، كوڭىل كوتەرۋ ورىندارى مەن ويىن كلۋبتارىنا بارىپ، سانيتارلىق تالاپتاردىڭ ورىندالۋىن قاداعالايمىز"، دەيدى نۇر-سۇلتان قالالىق جاستار ساياساتى باسقارماسىنىڭ ءبولىم باسشىسى اقۇلان تاستەمىر.

ۆولونتەرلەردىڭ ايتۋىنشا، تۇرعىندار قاراپايىم قاۋىپسىزدىك ەرەجەلەرى وزدەرىنىڭ عانا ەمەس، جاقىندارىنىڭ دا ءومىرىن ساقتايتىنىن تۇسىنبەي، كەي تالاپتارعا بەيجاي قارايدى.

"قالا تۇرعىندارىندا بوساڭسۋ بايقالادى. كوپ ءتارتىپ بۇزۋشىلىق كوبىنە تۇڭگى ۋاقىتتا بولادى: بي الاڭدارى، تاماقتانۋ، كوڭىل كوتەرۋ ورىندارى ۋاقىتقا قاراماي ءوز جۇمىستارىن جالعاستىرىپ جاتادى. ءتىپتى كومپيۋتەرلىك كلۋبتار "جابىلعان" سىڭاي تانىتىپ، ىشتە ەش تالاپتاردى ورىنداماي جينالىپ، ويىن ويناپ وتىرعان جاعدايلار دا كەزدەستى. مۇنداي جاعدايدا ءتيىستى شارالار قولدانىلادى. تۇرعىندارعا بارلىق تالاپتاردى ايتىپ، تۇسىندىرەمىز. كەي ازاماتتار بىزگە راحمەت ايتىپ، العىسىن ءبىلدىرىپ جاتادى"، دەيدى اقۇلان تاستەمىر.

"بىرقاتار تۇرعىن وزدەرىمەن بىرگە ماسكا الىپ جۇرەدى، بىراق ەرەجەگە سايكەس قولدانبايدى. ءبىزدىڭ ەرىكتىلەر ولاردى توقتاتىپ، ونىڭ قاۋىپتى ەكەنىن تۇسىندىرەدى. دەنى دەرەۋ قاتەلىكتەرىن تۇزەتىپ، كەيدە ءتىپتى قامقورلىق بىلدىرگەنىمىز ءۇشىن العىس ايتادى"، دەيدى "استانا جاستارى" كمم باسشىسى شىڭعىس تىلەۋلين.

ءموبيلدى توپتاردا بارلىعى ەكى جۇزگە جۋىق ۆولونتەر جۇمىس ىستەيدى.

ەسكە سالا كەتەيىك، ەلوردادا 14 قازاننان باستاپ كارانتين رەجيمى كۇشەيتىلدى. بيزنەس ورتالىقتار مەن ويىن-ساۋىق مەكەمەلەرىنىڭ جۇمىس ۋاقىتى قىسقارتىلدى. ادامدار ماسكا تاعىپ، قاشىقتىقتى ساقتاۋ كەرەك.

سوڭعى جاڭالىقتار

6 ءوڭىر «جاسىل» ايماقتا تۇر

كوروناۆيرۋس • كەشە

دەپۋتاتتى پىشاقتاپ كەتتى

الەم • 15 قازان، 2021

شەتەلدىك ۆاكتسينالار اقىلى بولادى

كوروناۆيرۋس • 15 قازان، 2021

ۇقساس جاڭالىقتار