كەشە قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە رەسمي وكىل التاي ابيبۋللاەۆتىڭ قاتىسۋىمەن اپتالىق بريفينگ ءوتىپ, وندا بىرقاتار ماڭىزدى شارالار جايى باياندالدى.
كەشە قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە رەسمي وكىل التاي ابيبۋللاەۆتىڭ قاتىسۋىمەن اپتالىق بريفينگ ءوتىپ, وندا بىرقاتار ماڭىزدى شارالار جايى باياندالدى.
بريفينگتى اشقان رەسمي وكىل 20 قاراشا كۇنى استانادا قازاقستان سۋديالارىنىڭ VI سەزى بولاتىنىن, وعان سوت ورگاندارىنان 700-دەن استام دەلەگات پەن 20-دان استام شەتەلدىك دەلەگاتسيا قاتىساتىنىن جەتكىزدى. «قازاقستان پرەزيدەنتى ءباسپاسوز قىزمەتىنىڭ حابارلاۋىنشا, سەزد جۇمىسىنا مەملەكەت باسشىسى نۇرسۇلتان نازارباەۆ قاتىسىپ, «قازاقستان-2050» ستراتەگياسىن جۇزەگە اسىرۋ شەڭبەرىندە سوت جۇيەسىن ودان ءارى دامىتۋ ماسەلەلەرى جانە V سەزدە العا قويىلعان مىندەتتەردىڭ ورىندالۋى بويىنشا ءسوز سويلەيدى», دەدى ا. ابيبۋللاەۆ.
سونىمەن قاتار, ول 20 قاراشادا سەرىك احمەتوۆتىڭ قاتىسۋىمەن سانكت-پەتەربۋرگ قالاسىندا تمد ەلدەرى ۇكىمەت باسشىلارىنىڭ كەڭەسى وتەتىنىن, وتىرىستا ساۋدا-ەكونوميكالىق جانە مادەني-گۋمانيتارلىق, ەنەرگەتيكا جانە قارجى سالاسىنداعى ىنتىماقتاستىقتى دامىتۋ ماسەلەلەرى تالقىلانىپ, بىرقاتار بىرلەسكەن قۇجاتتارعا قول قويىلاتىنىن اتاپ كورسەتتى. «تمد ەلدەرى ۇكىمەت باسشىلارىنىڭ كەڭەسى الاڭىندا پرەمەر-مينيستر سەرىك احمەتوۆ بىرقاتار ەكىجاقتى كەزدەسۋلەر وتكىزەدى, سونداي-اق رەسەي ۇكىمەتىنىڭ توراعاسى دميتري مەدۆەدەۆپەن كەلىسسوز جۇرگىزەدى. ال 22 قاراشادا قازاقستان پرەمەر-ءمينيسترىنىڭ «ساراپشى-200-قازاقستان» فورۋمىنىڭ جۇمىسىنا قاتىسۋى كوزدەلۋدە», دەدى ا.ابيبۋللاەۆ.
بۇعان قوسا, رەسمي وكىل 19-20 قاراشا كۇندەرى پرەمەر-ءمينيستردىڭ ورىنباسارى ەربول ورىنباەۆتىڭ جەتەكشىلىگىمەن «بيزنەستىڭ جول كارتاسى-2020» باعدارلاماسىن ىسكە اسىرۋ بويىنشا اۋىلدىق وكرۋگ اكىمدەرىنە ارنالعان رەسپۋبليكالىق سەمينار-كەڭەس وتەتىنىن جەتكىزدى. «ال 21-22 قاراشا كۇندەرى استانادا «قازاقستاننىڭ ونەركاسىپتىك ساياساتى» حالىقارالىق عىلىمي-تاجىريبەلىك كونفەرەنتسياسى وتەدى. كونفەرەنتسيا اياسىندا ەلىمىزدىڭ ونەركاسىپتىك ساياساتىن دامىتۋدىڭ نەگىزگى ماسەلەلەرى, ءبىرتۇتاس ەكونوميكالىق كەڭىستىك اياسىنداعى ونەركاسىپتىك بايلانىستار مەن قازاقستانداعى ونەركاسىپتىك ساياساتتى جەتىلدىرۋ شارالارىن تالقىلاۋ جوسپارلانۋدا», دەدى رەسمي وكىل بۇل ورايدا.
سونىمەن قاتار, رەسمي وكىل 22 قاراشا كۇنى توتەنشە جاعدايلار ءمينيسترى ۆلاديمير بوجكونىڭ, مينيسترلىك قىزمەتكەرلەرى مەن استاناداعى باسقا دا مەملەكەتتىك ورگانداردىڭ وكىلدەرىنىڭ قاتىسۋىمەن «قىس – 2013» رەسپۋبليكالىق كوماندالىق-شتابتىق جاتتىعۋى وتەتىنىنە, 21-22 قاراشا كۇندەرى اتىراۋدا پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆتىڭ, مەملەكەتتىك ورگانداردىڭ, ۇلتتىق كومپانيالار مەن حولدينگ وكىلدەرىنىڭ قاتىسۋىمەن ATYRAU INVEST-2013 حالىقارالىق بيزنەس-فورۋمى ۇيىمداستىرىلاتىنىنا توقتالدى.
رەسمي وكىل ەلىمىزدىڭ سىرتقى ساياسات ۆەدومستۆوسى باسشىسى ەرلان ىدىرىسوۆتىڭ قاتىسۋىمەن وتەتىن شارالارعا دا توقتالىپ ءوتتى.
ءلايلا ەدىلقىزى,
«ەگەمەن قازاقستان».
