قازاقستان پرەزيدەنتى جانىنداعى مەملەكەتتىك باسقارۋ اكادەمياسىندا وبلىستىق جانە ولارعا تەڭەستىرىلگەن سوتتاردىڭ قىلمىستىق ىستەردى قارايتىن سۋديالارى ءۇشىن بىلىكتىلىكتى ارتتىرۋ كۋرستارى باستالدى.
قازاقستان پرەزيدەنتى جانىنداعى مەملەكەتتىك باسقارۋ اكادەمياسىندا وبلىستىق جانە ولارعا تەڭەستىرىلگەن سوتتاردىڭ قىلمىستىق ىستەردى قارايتىن سۋديالارى ءۇشىن بىلىكتىلىكتى ارتتىرۋ كۋرستارى باستالدى.
قاراشانىڭ 20-سىندا سۋديالاردىڭ قۇرىلتايى وتەتىنى بەلگىلى. سوت جۇيەسىنە ەلباسى نۇرسۇلتان نازارباەۆ ارقاشاندا كوڭىل ءبولىپ, ونى بيۋروكراتيادان ارىلتۋ بارىسىن باستى نازاردا ۇستاپ كەلەدى. جانە دە ىستەردى قاراۋ پروتسەسىن بارىنشا جەڭىلدەتۋدى دە تاپسىرعانى ءمالىم. وسىعان وراي جوعارعى سوت توراعاسى قايرات ءمامي سوت جۇيەسىنە كادرلاردى دايارلاۋ ەڭ ماڭىزدى ماسەلەلەردىڭ ءبىرى رەتىندە قالىپ وتىرعانىن كولدەنەڭ تارتقان ەدى. مەملەكەتتىك باسقارۋ اكادەمياسىنىڭ رەكتورى بولاتبەك ءابدىراسيلوۆ ەلباسىنىڭ تاپسىرماسىمەن كەزىندە سوت تورەلىگى ينستيتۋتىندا ارنايى ماگيستراتۋرا اشىلعانىن, ونى 469 تۇلەك ءبىتىرىپ شىققانىن اتاپ كەتتى. رەكتور مالىمەتىنە قاراعاندا, سولاردىڭ 30 پايىزى سوت جۇيەسىنە بارعان. ۇستىمىزدەگى جىلى جوعارعى سوت توراعاسىنىڭ جانە مەملەكەتتىك باسقارۋ اكادەمياسى رەكتورىنىڭ وكىمىمەن جوعارعى سوت پەن اكادەميا اراسىندا سوت ءبىلىمى ماسەلەلەرى بويىنشا ءوزارا ءىس-قيمىل ەرەجەلەرى بەكىتىلگەن-ءدى. اتالعان ەرەجە ماگيستراتۋرانىڭ ءبىلىم باعدارلامالارى مەن بىلىكتىلىكتى ارتتىرۋ كۋرستارىنىڭ ساپاسىن ارتتىرۋعا, سونىمەن قاتار, ۇيىمداستىرۋ نىساندارىن ءبىرشاما جاقسارتۋعا ىقپال ەتكەنى ەرەكشە اتالدى.
بۇعان دەيىنگى وقىتۋلار لەكتسيا, نە سەمينارلار تۇرىندە بولىپ كەلسە, قازىر ترەنينگ ءتۇرىندە جۇزەگە اسىپ وتىر. اكادەميا رەكتورىنىڭ ايتۋىنشا, كۋرس تىڭداۋشىلارىنا جوعارعى سوت سۋديالارى مەن اكادەميانىڭ ۇستازدارى ءدارىس بەرەتىن بولادى. ەكى اپتا ىشىندە قوسىمشا ءبىراز ءىس-شارالار بۇۇ باعدارلاماسىمەن بىرىگىپ, ەقىۇ ماماندارىن تارتا وتىرىپ, بىرنەشە سەمينار وتكىزۋ دە قاراستىرىلعان. اتالعان سەمينارلاردى وتكىزۋگە ەڭ تانىمال دەگەن شەتەلدىك ساراپشىلار دا شاقىرىلعان. سەمينارلار ءناتيجەسى بويىنشا ەلەكتروندىق تەست الۋ جانە رەفەرات قورعاۋ كوزدەلگەن.
جوعارعى سوت توراعاسىنىڭ شاقىرۋىمەن سوت تورەلىگى ينستيتۋتىنىڭ بارلىق ماگيسترانتتارى مەن بىلىكتىلىكتى ارتتىرۋ كۋرسىنىڭ تىڭداۋشىلارى قازاقستان سۋديالارىنىڭ VI سەزىنە قاتىساتىنى بەلگىلى بولدى.
اسقار تۇراپباي ۇلى,
«ەگەمەن قازاقستان».
