قازىر جانارماي بەكەتتەرىندەگى ۇزىن-سونار كەزەكتەن كوز سۇرىنەدى. كۇنى بۇرىن تاللون العاندارعا عانا كوگىلدىر وتىن بوساتىلۋدا. قالعاندارى ايتەۋىر ءبىر كەلىپ قالار دەگەن دامەمەن توسۋدا.
– كەشە تۇندە باعا بىردەن ءوستى. اۋەلى ءليترى 57 تەڭگە بولعان, قازىر 80 تەڭگەدەن ساتىلۋدا, – دەيدى قالا تۇرعىنى باعلان ءامىرجانوۆ, – سونىڭ وزىندە تاپتىرمايدى. ايتسە دە, جانارمايدان ارزان عوي دەپ امالسىزدان الاسىڭ. ءدال وسىنداي قىسىلتاياڭ كەزدە پايدا تابۋدى كوزدەيتىن كاسىپكەرلەردىڭ پيعىلى الاڭداتادى.
كەيبىر جانارماي بەكەتتەرىندە گاز مۇلدەم جوق. ونداعى قىزمەتكەرلەر گاز ىزدەپ كەلگەن قالا تۇرعىندارىن كەرى قايتارىپ جاتىر. ءبىز سويلەسكەن قالا تۇرعىنى قونىس ەسەەۆتىڭ ايتۋىنا قاراعاندا, ۋاقتىلى اس-سۋ دايىنداۋدىڭ ءوزى مۇڭ بولىپ قالعان. اۆتوكولىگى گازبەن جۇرەتىندەردىڭ وكپەسى قارا قازانداي. وسىندايدا جورامال ايتاتىن «كورىپكەلدەردىڭ» پىكىرىنە قاراعاندا, گاز باعاسىن ءوسىرۋ ءۇشىن جاسالىپ جاتقان امال-مىس. گاز قۇيۋ بەكەتىندەگىلەر دە كوگىلدىر وتىننىڭ اياقاستىنان جوق بولىپ كەتۋىنىڭ ناقتى سەبەبىن تۇسىندىرە المايدى.
– جەڭىل اۆتوكولىكتەرگە الدىن الا تالون الىپ قويعاندارعا گاز قۇيۋعا مىندەتتىمىز, – دەيدى گاز قۇيۋ بەكەتىنىڭ وكىلى تالعات الىباەۆ, – ولار الدىن الا اقشاسىن تولەپ قويدى عوي, قۇيماۋعا حاقىمىز جوق. قازىر وبلىسقا كەلەتىن كوگىلدىر وتىننىڭ دەنى ەلەۆاتورلار مەن قويمالارعا استىق كەپتىرۋ ءۇشىن جونەلتىلىپ جاتىر. ول دا وتە ماڭىزدى شارۋا عوي.
ەگەر ماسەلە ۋاقتىلى شەشىمىن تاپپاسا, جاعدايدىڭ ۋشىعىپ كەتۋى دە مۇمكىن. جاۋاپتى مەكەمە باسشىلارى ءبىر-بىرىمەن ۋادەلەسىپ قويعانداي ءبىر عانا جاۋاپ ايتۋدا.
– جاعدايدىڭ وسىلاي قالىپتاسۋىنا زاۋىتتارداعى جوندەۋ جۇمىستارىنىڭ سوزىلىپ كەتۋى سەبەپ بولىپ وتىر. قىركۇيەك ايىندا باستالعان جۇمىس ءالى دە جالعاسۋدا. قاشان اياقتالاتىنى بەلگىسىز, – دەيدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ ءبولىم مەڭگەرۋشىسى جاسقايرات سادىقوۆ.
كوپشىلىكتى اۋرە-سارساڭعا سالعان كوگىلدىر وتىن تاپشىلىعى قاشان جويىلاتىندىعىن ەشكىم تاپ باسىپ ايتا المايدى. ونسىز كوسەگەمىزدىڭ كوگەرمەيتىنى بەلگىلى بولىپ وتىر.
كوكشەتاۋ
