پرەزيدەنت • 22 قازان، 2020

مەملەكەت باسشىسى: تاۋەلسىزدىكتىڭ ۇرپاعى – وتانىمىزدىڭ ەرتەڭى

1870 رەت كورسەتىلدى

ۇلتتىق قوعامدىق سەنىم كەڭەسىنىڭ IV وتىرىسىندا مەملەكەت باسشىسى قاسىم-جومارت توقاەۆ تاۋەلسىزدىك ەڭ اسىل، ەڭ قىمبات، ەڭ كيەلى قۇندىلىعىمىز ەكەنىن ايتىپ ءوتتى، دەپ حابارلايدى Egemen.kz

"30 جىل ىشىندە ءبىز ەلباسىنىڭ سارابدال ساياساتى ارقاسىندا بەدەلدى الەۋەتى مول مەملەكەت قۇردىق. جەتىستىكتەرىمىز از ەمەس. مۇنى بۇكىل الەم مويىنداپ وتىر. دەگەنمەن، الدىمىزدا اۋقىمدى مىندەتتەر مەن بيىك ماقساتتار تۇر. ونىڭ بارلىعىنا جوسپارلى تۇردە قول جەتكىزە بەرەمىز. مەن ايتقانىمداي، كەلەسى جىلى تاۋەلسىزدىگىمىزدىڭ 30 جىلدىعىن اتاپ وتەمىز. تاۋەلسىزدىكتىڭ ۇرپاعى – وتانىمىزدىڭ ەرتەڭى. ەلىمىزدىڭ ودان ءارى دامۋىنىڭ قوزعاۋشى كۇشى – سولار. تاۋەلسىزدىكتىڭ 30 جىلدىعى – ەگەمەندىكتىڭ بىزگە بەرگەن يگىلىگىن سارالاۋ جانە قۇندىلىعىن باعالاۋ مۇمكىندىگى. ءبىز بارلىق تابىسقا ازاتتىقتىڭ ارقاسىندا قول جەتكىزدىك"، دەيدى مەملەكەت باسشىسى.

سونداي-اق پرەزيدەنت تاۋەلسىزدىك ەڭ اسىل، ەڭ قىمبات، ەڭ كيەلى قۇندىلىعىمىز ەكەنىن ايتىپ ءوتتى.

ءسوز سوڭىندا مەملەكەت باسشىسى: "قازىرگىدەي الماعايىپ كەزەڭدە مەملەكەتتەر مەن ۇلتتار السىرەپ، ەگەمەندىگىنەن دە وڭاي ايىرىلىپ قالۋى مۇمكىن. بۇعان كەشەگى تاريح، بۇگىنگى الەم بەدەرىندە مىسالدار جەتكىلىكتى. وتانىمىزدىڭ ءوسىپ وركەندەۋى ءۇشىن قاستەرلى تاۋەلسىزدىگىمىزدى قورعاۋ جانە نىعايتۋ – ءاربىر قازاقستان ازاماتىنىڭ جانە بارلىق ساياسي كۇشتەردىڭ ابىرويلى مىندەتى. بارشاڭىزعا راقمەت"، دەپ كەڭەس وتىرىسىن اياقتادى.

سوڭعى جاڭالىقتار

ۇقساس جاڭالىقتار