قىلىشىن سۇيرەتكەن قىس تا قىر استىنا كەلىپ قالدى. وبلىستا قىسقا دايىندىق پىسىقتالىپ, سوڭعى تەكسەرىستەر ءجۇرىپ جاتىر. ەڭ الدىمەن الەۋمەتتىك نىسانداردىڭ, كوپقاباتتى تۇرعىن ۇيلەردىڭ, سونداي-اق كوممۋنالدىق جەلىلەر مەن قۇرىلعىلاردىڭ جىلىتۋ ماۋسىمىنا دايىندىعى وتە ماڭىزدى.
ورال قالاسىنىڭ اكىمى ابات شىنىبەكوۆتىڭ حابارلاۋىنشا, وبلىس ورتالىعىندا جوسپارلانعان جاڭارتۋ, جوندەۋ جۇمىستارىنىڭ ءبارى تولىعىمەن اتقارىلعان, قالاىشىلىك جىلۋ جەلىلەرى 100% دايىن. بيىل ورال قالاسىندا جىلۋ جىلداعىداي 15 قازاننان ەمەس, ودان ءبىر اپتا بۇرىن بەرىلدى.
وڭىردەگى ەكىنشى ءىرى ەلدى مەكەن – اقساي قالاسىندا دا دايىندىق جوسپارعا ساي جۇرگىزىلگەن. جىلۋ جۇيەلەرى ۋاقتىلى سىناقتان ءوتىپ, تەكسەرىلگەن.
وبلىستى ەلەكتر قۋاتىمەن قامتيتىن «باتىس قازاقستان رەك» اكتسيونەرلىك قوعامى بيىل جوسپارلانعان 2510,6 كم جەلىنىڭ 93%-ى جوندەلگەنىن مالىمدەدى. جاقىن كۇندەرى بۇل جۇمىستار تولىق اياقتالماق. كۇردەلى جوندەۋ ءۇشىن سۆ-105 ماركالى تەمىربەتون باعانانىڭ 656 داناسى, سۆ-95 ماركالى تەمىربەتون باعانانىڭ 215 داناسى ساتىپ الىنعان.
ارينە, قىسقا دايىندىق دەگەندە الدىمەن الەۋمەتتىك نىسانداردىڭ ازىرلىگى ءسوز بولادى. ءدال قازىر وڭىردەگى دەنساۋلىق ساقتاۋ نىساندارى ساقاداي ساي. ءبىلىم بەرۋ نىساندارىنىڭ دايىندىعى 97%-دى قۇراعان. بۇل جەردە 19 نىساندا كۇردەلى جوندەۋ ءجۇرىپ جاتقانىن ەسكەرۋ كەرەك. مادەنيەت نىساندارىنىڭ دايىندىعى 99% بولعان. بۇل سالادا دا 4 نىساندا كۇردەلى جوندەۋ ءجۇرىپ جاتىر.
ورال قالاسىندا – 1196 ءۇي, اقساي قالاسىندا 113 كوپقاباتتى تۇرعىن ءۇي ورتالىقتاندىرىلعان جىلۋ جەلىسىنە قوسىلعان.
باتىس قازاقستان وبلىسى تابيعي گازبەن بارىنشا تولىق قامتىلعان ءوڭىر سانالادى. كومىر نەمەسە مازۋت جاعاتىن الەۋمەتتىك نىساندار ساۋساقپەن سانارلىق. دەگەنمەن شالعاي اۋىلداردا قالعان مۇنداي نىساندار ءۇشىن 2,8 مىڭ توننا كومىر, 175 توننا سۇيىق وتىن قاجەتتىگى ەسكەرىلىپ, تولىق جەتكىزىلگەن. كوگىلدىر وتىن قۇبىرىنا قوسىلماعان تۇرعىندارعا قاجەت بولسا, «تالاپ» اكتسيونەرلىك قوعامىنىڭ قويماسىندا 700 تونناداي كومىر ساقتاۋلى تۇر.
– باتىس قازاقستان وبلىسىندا ءبىلىم سالاسىندا 627 مەملەكەتتىك نىسان بار. سونىڭ 520-سى كوگىلدىر وتىنعا قوسىلعان. ال 12 نىسان سۇيىق وتىنمەن, 71 عيمارات كومىرمەن, 15-ءى ەلەكتر قۋاتىمەن جىلىتىلادى. 2020-2021 جىلىتۋ ماۋسىمىنا تولىق دايىنبىز, – دەيدى وبلىستىق ءبىلىم باسقارماسىنىڭ باسشىسى ايگۇل مىڭباەۆا.
قازىرگى تاڭدا وبلىس تۇرعىندارىنىڭ 96,1%-ى تابيعي گازبەن قامتىلعان. بيىل ەلدى مەكەندەردى گازداندىرۋ ءۇشىن بيۋدجەتتەن بولىنگەن 910 ملن تەڭگەگە تەرەكتى اۋدانىنىڭ 10 اۋىلىنا, اقجايىق اۋدانىنىڭ 11 ەلدى مەكەنىنە گاز قۇبىرى تارتىلىپ جاتىر. بۇل اۋىلداردا بارلىعى 6 مىڭداي ادام تۇرادى. بۇل جۇمىس مارەسىنە جەتكەندە وبلىس تۇرعىندارىن تابيعي گازبەن قامتۋ كورسەتكىشى 96,7%-عا جەتپەك.
باتىس قازاقستان وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى اسقار عابيدۋللين «ەلدى مەكەندەردى گازداندىرۋ» جوباسى بويىنشا 2020 جىلى رەسپۋبليكا بيۋدجەتىنەن 176 ملن 211 مىڭ تەڭگە, وبلىس بيۋدجەتىنەن 783 ملن 518 مىڭ تەڭگە بولىنگەنىن, بۇل قارجى بيىلعى 1 قاراشاعا دەيىن تولىق يگەرىلەتىنىن جەتكىزدى.
باتىس قازاقستان وبلىسى
