ءبىرىنشى ماسەلە بويىنشا وبلىستىق جۇمىلدىرۋ دايىندىعى باسقارماسىنىڭ باسشىسى مەدەت ۋساين حابارلاما جاسادى.

جالپى الداعى 2020-2021 جىلدارداعى ىقتيمال سۋ تاسقىنىنا دايىندىق شارالارى بويىنشا وزەن بويى قورعانىس بوگەتتەرىنىڭ تۇسى قاۋىپتى 56 سۋ باسۋ ايماقتارىنا ءبولىنىپ،  وعان 122 جاۋاپتى مەكەمە بەكىتىلگەن. ولاردا 1491 ادام، 432 ارنايى تەحنيكا بار.

قازىرگى تاڭدا وبلىس بويىنشا سۋ تاسقىنىنا قارسى جۇمىستارعا پايدالانىلاتىن ماتەريالدىق-تەحنيكالىق قوردا 76،7 توننا جانار-جاعار ماي قورى جانە 99 540 دانا قاپ بار. سونداي-اق، 27 750 باۋ قامىس، 5 600 دانا پاشىن جانە 6 552 قارابۋرا مەن ت.ب. قاجەتتى ماتەريالدار قورلارى جاساقتالعان.

بيىل سۋ تاسقىنىنىڭ الدىن الۋعا  643،5 ملن. تەڭگە قارجى قارالدى. ونىڭ ىشىندە قورعانىس بوگەتتەرىن نىعايتۋ، مۇز جارۋ جۇمىستارى مەن قاپ ساتىپ الۋ، تىكۇشاق قىزمەتىن پايدالانۋ قاراستىرىلعان.

2020 جىلعا جالپى ۇزىندىعى 70،5 شاقىرىمدى قۇرايتىن وزەن بويىنداعى قورعانىس بوگەتتەرىنىڭ 11 ۋچاسكەسىندە جوندەۋ، ارنانى قازۋ جۇمىستارى جۇرگىزىلەدى دەپ جوسپارلانعان.

"ەندى 2 اي شاماسىندا وزەن ارناسىندا مۇز قاتا باستايدى. وبلىستىق جۇمىلدىرۋ دايىندىعى باسقارماسىنا وسى ماقساتتا بولىنگەن قارجىنىڭ مەرزىمىندە يگەرىلۋىن جانە جۇمىستىڭ ساپالى اتقارىلۋىن قاتاڭ باقىلاۋعا الۋدى تاپسىرامىن. شۇعىل تۇردە قارماقشى اۋدانى ابىلا ەلدى مەكەنى تۇسىنداعى تويىمبەت كانالىنا 2 كوزدى جانە جاڭاقورعان اۋدانىنداعى وزگەنت كولىنە 1 كوزدى سۋ توسپالارىن سالۋ قاجەت. قازالى اۋدانىنىڭ تاسارىق، قىزىلقۇم ەلدى مەكەنىن سۋ باسۋدان قورعاۋ ماقساتىندا قۋاڭداريا كانالىنا 3 كوزدى سۋ توسپاسىن سالۋ جۇمىستارىنىڭ جوبا سمەتالىق قۇجاتتارى ازىرلەنىپ، قۇرىلىسىنا قارجى بولۋگە بيۋدجەتتىك ءوتىنىم جولدانسىن"، - دەدى وبلىس اكىمى.

سونىمەن قاتار، ءتيىستى سالا باسشىلارىنا سۋ باسۋ ايماقتارىنا جاقىن اۋماقتارعا قاجەتتى جۇمىستاردى ۇيىمداستىرۋدى جانە شاردارا سۋ قويماسىنان كۇز-كوكتەم ايلارىندا سىرداريا وزەنىنىڭ تومەنگى اعىسىنا تۇسىرىلەتىن سۋ كولەمىنىڭ بەكىتىلگەن كەستەگە سايكەس بوساتىلۋىنا ۇنەمى باقىلاۋ جاساۋدى جۇكتەدى.

وبلىس اۋماعىنداعى ەپيزووتيالىق احۋال تۋرالى وبلىستىق ۆەتەريناريا باسقارماسىنىڭ باسشىسى ەرسۇلتان اپەتوۆ باياندادى.

ۇستىمىزدەگى جىلى وبلىس كولەمىندە اۋىل شارۋاشىلىعى جانۋارلارى اراسىندا اۋرۋ وشاقتارىن بولدىرماۋ، الدىن الۋ، ەپيزووتيالىق تۇراقتىلىقتى ساقتاۋ ماقساتىندا اسا قاۋىپتى 14 ءتۇرلى جۇقپالى اۋرۋلارعا رەسپۋبليكالىق بيۋدجەت ەسەبىنەن قارالعان 5542،4 مىڭ دوزا ۆەتەريناريالىق پرەپارات جەتكىزىلدى.

وبلىس بويىنشا جوعارى پاتوگەندى قۇس تۇماۋى اۋرۋىن الدىن الۋ ماقساتىندا اۋرۋعا قارسى 96،8 مىڭ دوزا ۆەتەريناريالىق پرەپاراتتار جەتكىزىلىپ، ءۇي قۇستارىنا الدىن الا ۆاكتسينا ەگىلدى.

ايماق باسشىسى جوعارى پاتوگەندى قۇس تۇماۋى اۋرۋىنىڭ الدىن الۋ، بولدىرماۋ ماقساتىندا تۇرعىلىقتى حالىق اراسىندا ءتيىستى تۇسىندىرمە جۇمىستارىن تۇراقتى تۇردە جۇرگىزۋ قاجەت ەكەنىن ەسكەرتىپ، وبلىس كولەمىندە اسا قاۋىپتى جۇقپالى اۋرۋلاردى بولدىرماۋ ماقساتىندا ۆەتەريناريالىق ءىس-شارالاردىڭ ۋاقىتىلى جۇرگىزىلۋىنە باقىلاۋدى كۇشەيتۋدى جۇكتەدى.

كۇن تارتىبىندەگى ءۇشىنشى ماسەلە تۋرالى وبلىستىق دەنساۋلىق ساقتاۋ باسقارماسىنىڭ باسشىسى سابيت پازىلوۆ پەن وبلىستىق باس مەملەكەتتىك سانيتاريالىق دارىگەر ءاليا ابدىقايىموۆا بايانداما جاسادى.

بۇگىنگى كۇنگە، كوروناۆيرۋس ينفەكتسياسى بويىنشا ايماعىمىزداعى ەپيدەميولوگيالىق جاعداي تۇراقتالدى. وبلىستا 210 ينفەكتسيالىق توسەك ورىن بار. 18 ناۋقاس ستاتسيونارلىق رەجيمدە، 1 ناۋقاس جانساقتاۋ بولىمىندە ەم الۋدا. ەپيد ماۋسىم باستالعالى ءىس-شارالارعا تارتىلعان بارلىق  13 380 قىزمەتكەرگە 2 573،9 ملن تەڭگە تولەندى.

مەديتسينالىق قۇرالدارمەن جابدىقتالۋ 10 ايدىڭ قورىتىندىسىمەن 88،5% قۇرادى. ينفەكتسيالىق ستاتسيونارلاردىڭ رەانيماتسيا بولىمىندە بۇل كورسەتكىش 75%-دان 85،06%-عا دەيىن جوعارىلادى.

قازىرگى تاڭدا وبلىسىمىزدا 244 يۆل اپپاراتتارى جۇمىس جاساۋدا. ودان بولەك، وڭىرىمىزدەگى مەديتسينالىق ۇيىمدارعا گۋمانيتارلىق كومەك ارقىلى 658 وتتەگى كونتسەنتراتورلارى جەتكىزىلدى. سونىمەن قاتار، وبلىستا 518 وتتەگىمەن قامتاماسىز ەتىلگەن توسەك ورىندار دايىن.

وبلىستا 24 مونيتورينگتىك توپ جۇمىس ىستەيدى. بارلىق اۋداندار مەن وبلىس ورتالىقتارىندا تۇراقتى تۇردە مونيتورينگ جۇرگىزىلۋدە. رەيدتىك تەكسەرۋمەن قامتىلعان وبەكتىلەر سانى - 2942.  كەزەڭ-كەزەڭمەن ىسكە قوسىلعان وبەكتىلەرگە جۇرگىزىلگەن مونيتورينگ بارىسىندا 631 زاڭ بۇزۋشىلىق انىقتالىپ،  ايىپپۇلدار سالىندى.

بۇگىنگى كۇنى 4 زەرتحانا جۇمىس جاساپ جاتىر، قاجەتتىلىككە بايلانىستى قوسىمشا 4 زەرتحانا ىسكە قوسىلۋعا دايىن.

"ماۋسىم-شىلدە ايلارىنداعى جاعداي قايتالانباس ءۇشىن ءتيىستى جۇمىستاردى ۋاقىتىلى جۇرگىزۋ قاجەت. وتباسىلىق ءىس-شارالار جاساپ جاتقان تۇرعىندارعا، كافە، مەيرامحانا يەلەرىنە قانشاما ەسكەرتۋ بەرىلسە دە، ايىپپۇل سالىنسا دا جۇمىستارىن توقتاتپاي وتىر. ءتىپتى مەملەكەتتىك مەكەمەلەردەگى ساقتىق شارالارى قىزمەتكەرلەر اراسىندا تولىق ساقتالمايدى. تالاپ ورتاق، كارانتين شارالارىنىڭ ءتيىمدى ىسكە اسۋىنا ءبارىمىز جاۋاپتىمىز"، - دەدى وبلىس اكىمى.

مۇنىمەن قوسا، جوسپارلانعان توسەك ورىنداردىڭ دايىندىعىن جانە ناۋقاستاردى وتتەگىمەن قامتاماسىز ەتۋ بويىنشا ءتيىستى جۇمىستاردى جۇرگىزۋ،  باستاپقى مەديتسينالىق-سانيتارلىق جانە ستاتسيونارلىق كومەك نىساندارىنىڭ قاجەتتى رەسۋرستارمەن تولىعىمەن جابدىقتالۋىن قامتاماسىز ەتۋ كەرەكتىگىن اتاپ ءوتتى.