قازىرگى ۋاقىتتا سالادا 96 كاسىپورىن جۇمىس ىستەيدى, ولاردىڭ 33-ءى دارىلىك زاتتار, 41 مەديتسينالىق بۇيىمدار جانە 22 كاسىپورىن مەديتسينالىق تەحنيكا شىعارادى. كاسىپورىنداردىڭ باسىم بولىگى رەسپۋبليكانىڭ ءتورت ايماعىندا – الماتى, شىمكەنت قالالارىندا, سونداي-اق الماتى جانە قاراعاندى وبلىستارىندا شوعىرلانعان.
بۇل وڭىرلەردە عىلىمي-تەحنيكالىق ورتالىقتاردىڭ, دامىعان كولىك ينفراقۇرىلىمىنىڭ جانە جەكە وسىمدىك شيكىزاتىنىڭ بولۋى كاسىپورىنداردىڭ باسەكەلەستىك ارتىقشىلىقتارىن قامتاماسىز ەتتى.
مىسالى, "Dolce-Pharm" قازاقستاندىق فارماتسەۆتيكالىق كومپانياسى 22 جىل ىشىندە ءبىر رەتتىك مەديتسينالىق بۇيىمداردى ءوندىرۋ سالاسىندا جوعارى كورسەتكىشتەرگە قول جەتكىزدى. كومپانيانىڭ ونىمدەرى ەلىمىزدىڭ مەديتسينالىق مەكەمەلەرىندە عانا ەمەس, وزگە شەت مەملەكەتتەردە دە سۇرانىسقا يە. بۇگىنگى تاڭدا زاۋىت مەديتسينالىق ماقساتتاعى 250-دەن استام اتاۋ شىعارادى, ونىڭ ىشىندە مەديتسينالىق بەتپەردەلەر مەن قولعاپتار, باحيلالار, ستەريلدى وپەراتسيالىق جيىنتىقتار جانە ءبىر رەتتىك جايمالار. وندىرىستىك كەشەن الماتى وبلىسى, ىنتىماق كەنتىندە ورنالاسقان, وندا 355 ادام ەڭبەك ەتەدى.
زاۋىتتا 6 وندىرىستىك تسەح بار: ستەريلدى جانە ستەريلدى ەمەس قولعاپتار ءوندىرۋ تسەحى; "ۋلترا-ادسورب" ساۋدا ماركاسىمەن بەلسەندىرىلگەن كومىر ءوندىرۋ تسەحى; مەديتسينالىق ماقساتتاعى بۇيىمدار (حالاتتار, بەتپەردەلەر, قالپاقتار, جيىنتىقتار) ءوندىرىسى; ءتورتىنشى تسەح ماقتا مەن پلاستيكادان جاسالعان بۇيىمدار وندىرۋگە دايىندالعان; ەتيلەن وكسيدىمەن ستەريلدەۋ تسەحى جانە پلاستيكتەن جاسالعان بۇيىمدار (كەسەك اينا, ەيەر شپاتەل, فولكمان قاسىعى) ءوندىرىسى تسەحى. بيىل كاسىپورىن شىعارىلاتىن بەتپەردەلەر قاتارىن كەڭەيتتى جانە گينەكولوگيالىق اينالار, ماسكا-رەسپيراتورلار, فيش-ماسكالار, سي-ماسكالار جانە بالالارعا ارنالعان "باتتەرفلياي" ماسكالارى, سونداي-اق سۋرەتپەن بەزەندىرىلگەن بەتپەردەلەردى شىعارا باستادى.
بۇگىندە كومپانيا ءوز ونىمدەرىن قىرعىزستان, وزبەكستان, تۇركمەنستان, تاجىكستان جانە رەسەي ەلدەرىنە ەكسپورتتايدى. بولاشاقتا شيكىزاتتى قاراما-قارسى جەتكىزۋدى قامتاماسىز ەتۋ شارتىمەن قىتايمەن ىنتىماقتاستىق ورناتۋ كوزدەلگەن.
سونىمەن قاتار, كاسىپورىن توقىلماعان ماتا وندىرەتىن زاۋىت سالۋدى جوسپارلاپ وتىر, سونداي-اق لەيكوپلاستىر ءوندىرىسىن ۇيىمداستىرۋ كوزدەلۋدە. توقىلماعان ماتا ءوندىرۋ جونىندەگى جوبانى ىسكە اسىرۋ جەكە قورعانۋ قۇرالدارىن شىعارۋ ءۇشىن وتاندىق كاسىپورىنداردى ءوز شيكىزاتىمەن قامتاماسىز ەتەدى.
