ايماقتار • 20 قازان، 2020

شىعىسقازاقستاندىقتار قاريالاردى قۋانتتى

129 رەت كورسەتىلدى

ۇلكەنگە قۇرمەت، كىشىگە ىزەتپەن قارايتىن ەلدىڭ ۇرپاعى قارتتارعا قامقورلىق جاساۋدان جالىققان ەمەس. جۋىقتا سەمەي قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ وقۋشىلارى قالاداعى قارتتار ۇيىنە بارىپ، قاريالاردى قۋانتىپ قايتتى، دەپ حابارلايدى Egemen.kz

قارتتار ءۇيى نەگىزىنەن "حان ءتاڭىرى" شاڭىراعىمەن الەۋمەتتىك سەرىكتەس. نازارباەۆ زياتكەرلىك مەكتەبىنىڭ ىشىنەن قۇرىلعان "حان ءتاڭىرى" شاڭىراعىنىڭ شاكىرتتەرى ءداستۇرلى تۇردە ۇيىمداستىرىلاتىن "قارتتارعا قامقورلىق" اتتى جوباسىنىڭ اياسىندا اق جاۋلىقتى اجەلەر مەن اقساقالدارعا سىي-سىياپات جاسادى.

– ەكىجاقتى مەموراندۋم اياسىندا جۇمىس ىستەپ كەلەمىز. بۇل جولى ءبىز قاريالارىمىزدىڭ سۇراۋى بويىنشا شىتىرمان وقيعالى 43 دانا كوركەم ادەبيەت كىتاپتارىن سىيعا تارتتىق. بۇدان بولەك، ىسمەر اجەلەرىمىزگە توقىما ءجىبىن اپاردىق، – دەيدى "حان ءتاڭىرى" شاڭىراعىنىڭ جەتەكشىسى، پەداگوگ-ۇيىمداستىرۋشى-كۋراتور اقليما مەلسقىزى.    

قارتتار ءۇيى باسشىلىعىمەن اقىلداسا وتىرىپ، الداعى ۋاقىتتا قاي باعىتتا جۇمىس ىستەيتىندىكتەرى دە شەشىلدى. ەندىگى جوسپارعا 30 ءتۇپ گۇل كوشەتتەرىن وتىرعىزۋ مەن ونلاين كونتسەرت قويۋ ەنگىزىلدى. سونداي-اق جىلدىڭ ءار مەزگىلىندە قارتتار ءۇيىنىڭ اۋلاسىنا سەنبىلىك جاساۋ سىندى جۇمىستار دا ويعا الىندى. وقۋشىلار قانداي كومەك قولىن سوزسا دا كارانتيندىك تالاپتاردىڭ بارلىعىن ساقتاي وتىرىپ، جۇزەگە اسادى.

وقۋشىلاردىڭ مەيىرباندىق تانىتىپ، ۇلكەندەرگە قۇرمەت كورسەتىپ جاتقاندارىنا قارتتارمەن قاتار مەكەمە باسشىلىعى دا ريزا بولدى.  

– سىزدەرمەن الەۋمەتتىك سەرىكتەس بولعانىمىزعا وتە قۋانىشتىمىز. بىزدەگى اتا-اجەلەرىمىز كىتاپ وقىعاندى ەرەكشە جاقسى كورەدى. سىزدەر تارتۋ ەتكەن جاڭا كىتاپتار ولاردى ۇلكەن قۋانىشقا بولەيتىنىنە ءسوز جوق.  ال توقىما جىپتەرمەن بالالار ءۇيىنىڭ تاربيەلەنۋشىلەرىنە توقىما بۇيىمدارىن ازىرلەيتىن بولامىز، –  دەدى قارتتار ءۇيى ديرەكتورىنىڭ ورىنباسارى لاريسا يساەۆا.

بالالاردىڭ كولدەي كوڭىلدەرىنە ريزاشىلىعىن بىلدىرگەن اجەلەردىڭ ءبىرى ءوز قولىنان شىققان توقىما بۇيىمىن سىيعا تارتتى.

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار