ورداباسى اپب كەزەكشى بولىمىنە جەرگىلىكتى تۇرعىن اعاسىنىڭ “مازدا-626” اۆتوكولىگىمەن جۇمىستان شىعىپ, ءالى كۇنگە دەيىن ۇيگە قايتىپ كەلمەگەنى تۋرالى ارىزدانعان. ءىز-ءتۇسسىز جوعالعان ادامدى ىزدەۋ شارالارى بارىسىندا جوعالعان ادامنىڭ اۆتوكولىگى شىمكەنت قالاسىنىڭ شەتىنەن تابىلعان. كەيىننەن پوليتسەيلەر جۇرگىزۋشىنىڭ ورتەنگەن ءمايىتىن ورداباسى اۋدانى شۇبارسۋ اۋىلىنىڭ ماڭىنان تاپتى.
اۋىر قىلمىستى اشۋ ماقساتىندا كريمينالدىق پوليتسيا مەن تەرگەۋدىڭ تاجىريبەلى قىزمەتكەرلەرىنەن تۇراتىن جەدەل-تەرگەۋ توبى قۇرىلدى. جەدەل ۋاكىلدەر قىلمىس ورنىن مۇقيات تەكسەرىپ, ولتىرىلگەن ادامنىڭ تانىستارىن, ولارمەن قارىم-قاتىناسى مەن ءومىر سالتىن زەرتتەيدى. جاقىن ماڭداعى اۋماقتاردى ارالاپ, كۋاگەرلەرمەن سۇحباتتاسىپ, قاجەتتى اقپاراتتاردى جيناقتادى.
ءبىر اپتادان كەيىن جەدەل-ىزدەستىرۋ ءىس-شارالارىنىڭ ناتيجەسىندە تۇركىستان وبلىسىنىڭ پد كريمينالدىق پوليتسيا قىزمەتكەرلەرى, ورداباسى اپب جانە “بۇركىت” ارنايى جاساعىمەن بىرگە ىشىندەگى ادامداردىڭ وسى قىلمىسقا قاتىسى بار دەگەن كۇدىكپەن جامبىل وبلىسىنان كەلە جاتقان “ۆاز” اۆتوكولىگىن ۇستادى.
ولار بۇرىن بىرنەشە رەت سوتتالعان تۇركىستان وبلىسى مەن شىمكەنت قالاسىنىڭ تۇرعىندارى بولىپ شىقتى. تورتەۋى دە جاس جىگىتتەر. تەرگەۋ بارىسىندا كۇدىكتىلەردىڭ ەكەۋى شىمكەنت قالاسى كوشەلەرىنىڭ بىرىندە جابىرلەنۋشىنىڭ كولىگىن توقتاتىپ, بەلگىلى ءبىر مەكەنجايعا اپارىپ تاستاۋدى سۇراعانى, دىتتەگەن مەكەنجايعا كەلگەننەن كەيىن قاسكۇنەمدەردىڭ جۇرگىزۋشىگە پايداكۇنەمدىك ماقساتتا شابۋىل جاساپ, تۇنشىقتىرىپ, ونىڭ ۇيالى تەلەفونىن الىپ كەتكەنى, ال ءمايىتتى دالاعا شىعارىپ ورتەگەنى انىقتالدى.
قاسكۇنەمدەر بۇل قىلمىسىمەن توقتاپ قالماي, تاعى ەكى سەرىكتەسىمەن بىرگە ورداباسى اۋدانىنداعى تاس جولدا “ۆاز” اۆتوكولىگىنىڭ جۇرگىزۋشىسىنە شابۋىل جاساپ, 45 مىڭ تەڭگەلىك بارسەتكانى كۇشپەن تارتىپ العان.
قازىرگى ۋاقىتتا اتالعان فاكتىلەر بويىنشا قر قك-ءنىڭ 99-بابى (ادام ءولتىرۋ) جانە 191-بابى (توناۋ) بويىنشا سوتقا دەيىنگى تەرگەۋ امالدارى جۇرگىزىلۋدە. كۇدىكتىلەر قاماۋعا الىندى. پوليتسيا قىزمەتكەرلەرى ۇستالعانداردىڭ باسقا دا وسىنداي قىلمىستارعا قاتىسى بار-جوعىن انىقتاپ جاتىر.
