مەنشىك يەلەرىنىڭ بىرلەستىگىن مەملەكەتتىك تىركەۋ جانە ونىڭ ءتيىمدى اتقاراتىن قىزمەتى تۋرالى ANTIKOR LIVE جوباسى اياسىندا «شىعىس – ادالدىق الاڭى» جوبالىق كەڭسەسىنىڭ ۇيىمداستىرۋىمەن وتكەن ەفيردە شىعىس قازاقستان وبلىسى ادىلەت دەپارتامەنتىنىڭ تىركەۋ قىزمەتى سالاسىنداعى ادىستەمەلىك قامتاماسىز ەتۋ جانە باقىلاۋ ءبولىمىنىڭ باسشىسى سەرجان مۇحامەدجانوۆ ايتىپ بەردى.
– 2019 جىلدىڭ 26 جەلتوقسانىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي-كوممۋنالدىق شارۋاشىلىق ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويىلدى. اتالعان زاڭ وسى جىلدىڭ 7 قاڭتارىنان باستاپ كۇشىنە ەندى. زاڭدا تكش-نى باسقارۋدىڭ جاڭا تەتىكتەرى قاراستىرىلعان. ەڭ باستى قاعيدا: ءبىر ءۇي – ءبىر بىرلەستىك – ءبىر ەسەپشوت. ءاربىر كوپپاتەرلى ءۇيدىڭ تۇرعىندارى ارنايى جينالىستا بىرلەستىك نەمەسە قاراپايىم سەرىكتەستىك قۇرۋ تۋرالى شەشىم قابىلدايدى. مەنشىك يەلەرىنىڭ بىرلەستىگى – زاڭدى تۇلعا رەتىندە كوممەرتسيالىق ەمەس ۇيىم. ول تۇرعىنداردىڭ ءوز ىشىنەن قۇرىلادى. تۇرعىندار جينالىسىندا ءۇش جىل مەرزىمگە كوپپاتەرلى تۇرعىن ءۇي كەڭەسى جانە رەۆيزيالىق كوميسسيا سايلانادى. سونداي-اق ءبىر جىل مەرزىمگە بىرلەستىك توراعاسى بەلگىلەنەدى. زاڭ كۇشىنە ەنگەن كۇننەن باستاپ ءبىر جىل ىشىندە كوپپاتەرلى تۇرعىن ءۇي يەلەرى جينالىس وتكىزۋلەرى ءتيىس. جينالىسقا تۇرعىنداردىڭ كەمىندە 51%-نىڭ قاتىسۋى مىندەتتى. ياعني تۇرعىن ۇيدە 100 پاتەر بار دەپ ەسەپتەسەك, جينالىسقا كەمىندە 51 پاتەر يەسى قاتىسۋى كەرەك جانە قابىلدانعان شەشىمدى كەمى 26 مەنشىك يەسى قولداۋى ءتيىس. جوعارىدا ايتىپ وتكەنىمدەي, جينالىستا ءۇي كەڭەسى, رەۆيزيالىق كوميسسيا, بىرلەستىك توراعاسى جانە باسقارۋ فورماسى انىقتالادى, – دەيدى سەرجان مۇحامەدجانوۆ.
قازىرگى تاڭدا شىعىس قازاقستان وبلىسى بويىنشا جالپى 6 مەنشىك يەلەرىنىڭ بىرلەستىگى قۇجات تاپسىرعان, الايدا ولاردىڭ قولدانىستاعى زاڭعا قۇجاتتارى سايكەس كەلمەگەندىكتەن, تىركەۋدەن باس تارتىلدى. كەشە قۇجاتتارى قولدانىستاعى زاڭعا سايكەس كەلەتىن العاشقى مەنشىك يەلەرىنىڭ بىرلەستىگى قۇرىلىپ, مەملەكەتتىك تىركەۋدەن ءوتتى. ونىڭ اتاۋى «استانا كوشەسى, 6» مەنشىك يەلەرىنىڭ بىرلەستىگى دەپ اتالادى.
سونىمەن قاتار سەرجان مۇحامەدجانوۆ پاتەر يەلەرى كووپەراتيۆتەرى بويىنشا ماسەلەگە توقتالدى:
– پاتەر يەلەرى كووپەراتيۆتەرى ءبىر كۇن ىشىندە جابىلىپ قالمايدى. پاتەر يەلەرى الدىنداعى مىندەتتەرىن قاناعاتتانارلىق دارەجەدە اتقارعان, تۇرعىنداردىڭ كوڭىلىنەن شىققان پاتەر يەلەرى كووپەراتيۆتەرىنىڭ جۇمىسىن جالعاستىرۋعا مۇمكىندىگى بار. بىراق ول كووپەراتيۆتەر 2022 جىلدىڭ 1 شىلدەسىنە دەيىن عانا جۇمىس ىستەيدى. ال ودان كەيىن بۇل كووپەراتيۆتەر باسقارۋشى كومپانيا نەمەسە سەرۆيستىك ۇيىم رەتىندە قايتا قۇرىلىپ, قىزمەتىن جالعاستىرا الادى.
