باسقارما باسشىسى ايتقانداي, بۇگىندە باس قالادا ەپيدەميالىق احۋال تۇراقتى. ستاتسيونارلاردا 87 ناۋقاس ەم قابىلداسا, امبۋلاتورلىق جاعدايدا 60 ناۋقاس مەديتسينا قىزمەتكەرلەرىنىڭ باقىلاۋىندا تۇر. ولاردىڭ كەيبىرىندە اۋرۋ بەلگىلەرى بىلىنبەگەن. نۇر-سۇلتاندا جاعداي تۇراقتى بولعانىمەن, اۋرۋ ءورشىپ تۇرعان سولتۇستىك كورشىگە جاپسارلاس جاتقان سولتۇستىك قازاقستان وبلىسىنىڭ بىرنەشە اۋدانىندا ولاي بولماي تۇر. سوندىقتان دا وزگەرمەلى دۇنيەدە قامسىز وتىرماي, الدىن الا دايىندالعان ءجون. ەلورداداعى بارلىق ەمحانادا فيلتر كابينەتتەرى ىسكە قوسىلعان. ونىڭ نەگىزگى مىندەتى – جرۆي جۇقتىرعان ناۋقاستاردى انىقتاپ, ولاردى وقشاۋلاپ, ناۋقاستاردى پتر تەستەن وتكىزۋ.
– ۆيرۋس انىقتالعان جاعدايدا امبۋلاتورلىق باقىلاۋ جانە ەمدەۋ جۇرگىزىلەدى. ءبىزدىڭ باستى ماقساتىمىز – ناۋقاستى پنەۆمونيا سياقتى اۋىر جاعدايعا تۇسىرمەۋ, – دەگەن باسقارما باسشىسى پاتسيەنتتەردىڭ وزگە ادامدارمەن بايلانىسىن ازايتۋ ءۇشىن ۇيگە بارىپ قىزمەت كورسەتىلەتىنىن دە جەتكىزدى. – بارلىق ناۋقاس بازاعا ەنگىزىلەدى. ەگەر ولاردىڭ بىرىنەن كوروناۆيرۋس انىقتالسا, ولارمەن بايلانىستا بولعان ادامدار نازاردا بولادى. ولاردىڭ ۇيىنە بارىپ, پتر تەستىلەۋدەن وتكىزۋىمىز مۇمكىن. بۇل ءۇشىن ءموبيلدى بريگادالار قۇرىلدى. ال فيلتر-كابينەتكە تەك بەلگىلى ءبىر سەبەپتەرمەن ەمحاناعا بارا المايتىندار كەلەدى», دەدى ول.
سونداي-اق ت.مۇراتوۆ ەلورداداعى ەمدەۋ مەكەمەلەرىنىڭ ەكىنشى تولقىنعا دايىن ەكەنىن ايتتى. بىراق بۇل اۋرۋ جۇقتىرعانداردىڭ سانىنا بايلانىستى بولاتىنى تۇسىنىكتى. ەگەر قالا تۇرعىندارى مەن مەيماندارى الەۋمەتتىك اراقاشىقتىقتى ساقتاپ, بەتپەردە تاقپاسا, ناۋقاستاردىڭ سانى ارتادى. قازىر قالانىڭ دەنساۋلىق ساقتاۋ جۇيەسى 5 600 ورىنمەن جانە 434 ءوجت اپپاراتتارىمەن جانە باسقا دا جابدىقپەن قامتۋعا قاۋقارلى. الايدا ساقتىقتى ۇستانىپ, ازاماتتار ءوز دەنساۋلىعى مەن ماڭايىن اۋرۋدان ساقتايمىن دەپ قورعاناتىن بولسا, سىرقاتتار سانى بۇعان جەتپەۋى دە مۇمكىن.
– ءبىز اۋرۋ سانىن وسىرۋگە جول بەرمەۋىمىز كەرەك. ءار ازامات اۋىرماس ءۇشىن بارىن سالىپ, جاۋاپكەرشىلىكپەن كەلسە, بارلىق ءتيىستى ەرەجەنى ساقتاسا, ەكىنشى تولقىننىڭ ءبىزدى اينالىپ ءوتۋى مۇمكىن, – دەيدى ول.
بۇگىندە COVID-19 ساقتىق قامىن ۇعىنىپ, كارانتين قاتاڭ ساقتالعان ەلدەردە عانا بەلەڭ الماي تۇر. وعان الىستا ەمەس, ەلىمىزبەن شەكارالاس قىتاي ەلىندەگى احۋال دالەل.
ء«بىزدىڭ ەمحانادا ەكى كىرۋ توبى بار. بالالارعا جانە ەرەسەكتەرگە بولەك ەسىكتەر قاراستىرىلىپ, ونىڭ ارقايسىسىنا تەپلوۆيزورلار قويىلدى. كىرە بەرىستە ادامنىڭ قىزۋى ولشەنەدى. ەگەر قىزۋ انىقتالسا, ولار بىردەن فيلترگە جونەلتىلەدى. سول سياقتى فيلتردە دە 3 باعىت بويىنشا قىزمەت كورسەتىلەدى», دەيدى №10 قالالىق ەمحانانىڭ ديرەكتورى گۇلنار الپىسبەكوۆا.
86 مىڭ ادامعا قىزمەت كورسەتەتىن ەمحانادا ءۇش ءتۇرلى, ياعني بالالارعا, ەرەسەكتەرگە جانە اياعى اۋىر ايەلدەرگە ارنالعان كابينەتتەر قاراستىرىلعان ەكەن. وعان قوسا پتر زەرتتەۋ جۇرگىزۋگە ارنالعان بيوماتەريال جينايتىن قوسىمشا تاعى ءبىر بولمە بار. پاتسيەنتتەر سانى وسسە, تاعى ەكى كابينەت اشىلماق, ال قازىر وعان قاجەتتىلىك جوق. ەمحانا باسشىسىنىڭ ايتۋىنشا, قالاداعى ءار امبۋلاتورلىق-ەمحانالىق ۇيىمداردا قۇرىلعان ءموبيلدى بريگادالار وسىندا دا جۇمىس ىستەيدى. بريگادالار اۋرۋ جۇقتىرعان ناۋقاستاردى باقىلاۋدا ۇستايدى, نورماتيۆ بويىنشا ءاربىر ءموبيلدى بريگادا 5 مىڭ تۇرعىنعا كومەك كورسەتەدى. بۇگىندە ەمحانادا 17 ءموبيلدى توپ قۇرىلعان. بۇدان بولەك وتتەگى كونسەنتراتتارى, قوسىمشا پۋلسوكسيمەترلەر ساتىپ الىندى. ءدارى-دارمەكپەن تولىق قامتاماسىز ەتىلگەن. قازىر ەمحاناعا كۇنىنە 40-قا جۋىق ادام جۇگىنەدى. ونىڭ 20-سى ەرەسەك ادام بولسا, 20-سى – بالا.
