قاپتاما قالدىقتارىن جيناۋ جانە قايتا وڭدەۋ سالاسىنىڭ كورسەتكىشتەرىن تالداۋ, سونداي-اق بيزنەستىڭ وتىنىشتەرىن قاراۋ نەگىزىندە وكم وپەراتورىنىڭ ماماندارى شاعىن جانە ورتا كاسىپكەرلىك سۋبەكتىلەرىن قولداۋدىڭ قوسىمشا تەتىكتەرىن ازىرلەدى. قالدىق وڭدەۋدەگى جالپى رەسپۋبليكالىق كورسەتكىشكە قول جەتكىزۋ ءۇشىن قاپتاما قالدىقتارىن جيناۋدى جۇزەگە اسىراتىن ءاربىر ۇيىم جيناۋ كولەمىن جىل سايىن 5-10%-عا ءوسىرىپ وتىرۋ مىندەتتەمەلەرىن الادى. سونىمەن قاتار تۇسەتىن وتىنىمدەر بويىنشا (كەمىندە 20 كيلو) قايتالاما شيكىزات جيناۋدى جۇزەگە اسىرادى.
اتالعان شارالاردى جۇزەگە اسىرۋ كەشەندى تۇردە قالدىقتارمەن جۇمىس ىستەۋ سالاسىنىڭ ينۆەستيتسيالىق تارتىمدىلىعىن ارتتىرۋعا, قاپتاما قالدىقتارى مەن اۆتوكومپونەنتتەردى جيناۋ گەوگرافياسىن كەڭەيتۋگە مۇمكىندىك بەرەدى جانە ەكولوگيالىق ماسەلەلەردى شەشۋگە ىقپال ەتەدى. 2020 جىلى قاپتاما قالدىقتارىن جيناۋدىڭ جوسپارلى كولەمى 130 مىڭ توننانى, اۆتوكومپونەنت قالدىقتارى 102 مىڭ توننانى قۇرادى.
«وكم» وپەراتورى» جشس اتالعان سالانى دامىتۋدىڭ وزىندىك ۇلگىسىن ۇسىنىپ وتىر. جاڭا مودەلگە سايكەس سالا قاتىسۋشىلارىن تەندەر ۇعىمىنان باس تارتىپ, نەگىزدەمەلىك كەلىسىمشارت قاعيداسىنا سايكەس جۇمىس ىستەۋگە شاقىرادى. وسىلايشا مامانداندىرىلعان كاسىپورىندارمەن ىنتىماقتاستىق ورناتۋ ارقىلى جاڭا بەلەستەردى باعىندىرۋ كوزدەلىپ وتىر. العاشقى كەزەڭدە بىلىكتىلىك تالاپتارعا سايكەس, ىرىكتەۋ جۇرگىزىلمەك.
– ماڭعىستاۋ وڭىرىندە جۇمىس ىستەپ جاتقان بارلىق كونتراگەنتتەردى «وندىرۋشىلەردىڭ كەڭەيتىلگەن مىندەتتەمەلەرى وپەراتورى» جشس قويان-قولتىق جۇمىس ىستەۋگە شاقىرامىز. وسىلايشا دەمەۋقارجى, كومەكقارجى جانە كولىك جونەلتپە قۇجاتىنا جۇمىسالاتىن شىعىنداردى جەڭىلدەتۋگە مۇمكىندىك بەرىلەدى. بۇگىندە ەكولوگيا, گەولوگيا جانە تابيعي رەسۋرستار مينيسترلىگىنىڭ مالىمەتىنشە, تۇرمىستىق قاتتى قالدىقتاردىڭ بار بولعانى 15%-ى عانا سۇرىپتالادى, ال قالعان 85%-ى كومىلىپ جاتىر. نەگىزىنەن بۇل دۇرىس ەمەس. بۇدان بىلاي ءبىزدىڭ مەكەمەمەن كەلىسىم جاساۋدىڭ قاجەتتىلىگى جوق, تەندەر دەگەندى دە ۇمىتۋ كەرەك. ءبىز نەگىزدەمەلىك كەلىسىمشارت ۇسىنامىز, بۇل تاۋلىك بويى جۇمىس ىستەيتىن جاڭا مەحانيزم. قازىرگى تەندەرلىك تارتىپكە سايكەس 27 قۇجات تالاپ ەتىلەدى, ال ءبىز بار بولعانى 3 قۇجات سۇرايمىز. بۇل الدەقايدا ءتيىمدى. جاڭا جىلدان باستاپ تسيفرلى جۇيەگە كوشەتىن بولامىز, ياعني بارلىق اكىمشىلىك كەدەرگىلەر جويىلادى. ءبىزدىڭ تۇپكىلىكتى ماقساتىمىز – ەلىمىزدىڭ ءاربىر ازاماتىنا قوقىستى تابىس كوزىنە اينالدىرۋدى ۇيرەتۋ», – دەيدى «وكم وپەراتورى» جشس باسقارما توراعاسى م.قۇمارعاليەۆ.
«وكم وپەراتورى» جشس ماڭعىستاۋ وبلىسىنىڭ سالالىق كاسىپورىندارىمەن ىنتىماقتاستىقتى نىعايتۋعا نيەتتى. ال ۇسىنىلعان شارتتار شاعىن جانە ورتا بيزنەس وكىلدەرىنە الدەقايدا ءتيىمدى.
– بۇگىندە ماكۋلاتۋرا جيناعانى ءۇشىن وتەماقى تولەمى 26 تەڭگەنى قۇرايدى. سونىمەن قاتار قاعاز ءۇشىن قايتا وڭدەۋ تولەمىنىڭ مولشەرى 9 ەسە از, كيلوسىنا – 3 تەڭگە. وزگەرىستەر تۇتاستاي العاندا قالدىقتاردى جيناۋ, وڭدەۋ جانە كادەگە جاراتۋ باعىتىنىڭ دامۋىنا وڭ اسەرىن تيگىزەدى, – دەدى «Kazweste» قالدىقتاردى باسقارۋ جونىندەگى قازاقستاندىق قاۋىمداستىقتىڭ باسقارما توراعاسى شىنبولات بايقۇلوۆ.
«وكم وپەراتورى» ينستيتۋتى قۇرىلعانعا دەيىن ەلىمىزدە قالدىقتاردى قايتا وڭدەۋ دەڭگەيى 2%-دى قۇراسا, بيىل بۇل كورسەتكىش 15%-عا جاقىندادى. سونىمەن قاتار قالدىقتاردى قايتا وڭدەۋ ۇلەسى 8 ەسەگە ءوستى.
ماڭعىستاۋ وبلىسى
