"جاس قىران" ستاديونىندا وتكەن كەزدەسۋ الماتىلىقتار ءۇشىن وڭايعا سوققان جوق. ءبىرىنشى تايمدا دميتري وگايدىڭ شاكىرتتەرى 2:0 ەسەبىمەن العا شىقتى. الدىمەن "قايراتتىڭ" قورعاۋشىسى ايبول ابىكەننىڭ قاتەلىگىنەن كەيىن پەدرو ەۋجەنيو 7-مينۋتتا ەسەپ اشتى.
ون مينۋتتان كەيىن عافۋرجان سۇيىمباەۆتىڭ ارتقا بەرگەن دوبىن دۇرىس توقتاتا الماعان ستاس پوكاتيلوۆ ءوز قاقپاسىنا گول وتكىزىپ الدى. كوپ ۇزاماي 30-مينۋتتا «قايراتتىڭ» شابۋىلشىسى ابات ايىمبەتوۆ ەسەپتى قىسقارتتى. ەكىنشى تايمدا 50-مينۋتتا ۆاگنەر لاۆ 11 مەترلىك ايىپ دوبىن قاقپادان الدەقايدا جوعارى تەپتى. دەگەنمەن 57-مينۋتتا ا.ايىمبەتوۆ تارازى باسىن تەڭەستىردى.
ىلە-شالا ءوز ايىپ الاڭىندا ادەرينسولا ەسەولانى شالىپ قۇلاتقان "جەتىسۋ" قورعاۋشىسى مەيرام ساپانوۆ ەكىنشى ەسكەرتۋىن الىپ, الاڭنان قۋىلدى. بىراق ا.ەسەولانىڭ 11 مەترلىكتەن دوبىن تالدىقورعاندىق كلۋبتىڭ قاقپاشىسى اندرەي شابانوۆ قاقشىپ الا ءبىلدى.
بىراق ول 76-مينۋتتا دەنيس پولياكوۆتىڭ تەپكەن دوبىن قايتارا المادى. ەكىنشى تايمدا "قايرات" ساپىندا العاش رەت الاڭعا شىققان 19 جاستاعى دانيار ۇسەنوۆ 94-مينۋتتا ءوزىنىڭ ءبىرىنشى گولىن سوعىپ, ەسەپتى 4:2-گە جەتكىزدى.
بۇل ماتچتا ورەسكەل قاتەلىككە جول بەرگەن قازاقستان ۇلتتىق قۇراماسىنىڭ قاقپاشىسى ستاس پوكاتيلوۆتى ەكىنشى تايمدا دانيل ۋستيمەنكو الماستىردى.
ويىننىڭ ەكىنشى كەزەڭىندە الاڭعا شىققان "جەتىسۋ" فۋتبولشىسى اسلان داراباەۆ ەكى مارتە ەسكەرتۋ الىپ, ول دا قۋىلىپ تىندى. وسىلايشا 32 ۇپاي جيناعان الەكسەي شپيلەۆسكيدىڭ شاكىرتتەرى "استانادان" 11 ۇپايعا ۇزاپ كەتتى. دەگەنمەن بۇل تۋرعا قاتىسپاعان ەلوردالىقتاردىڭ ءبىر ويىنى كەم. ەسكە سالا كەتەيىك, بۇدان بۇرىن فۋتبولدان قازاقستان چەمپيوناتى قايتا جالعاسقانىن جازعان بولاتىنبىز.
