وقيعا بۇگىن, 16 قازان كۇنى تاڭعى ساعات 08.40. شاماسىندا بولعان. ابىلقايىر حان داڭعىلى بويىنداعى تسيولكوۆسكي ايالداماسىندا №22 جانە №1 اۆتوبۋستار سوقتىعىسقان. وقيعا ورنىنا «جەدەل جاردەم» شاقىرىلىپ, دارىگەرلەر 5 ادامدى شۇعىل تۇردە اۋرۋحاناعا الىپ كەتتى. ەرتەمەن حالىق جۇمىسقا اسىعاتىن قاربالاس شاقتا بولعان جول وقيعاسىنان جەڭىل اۆتوكولىك تە زارداپ شەگىپتى. ويتكەنى قاقتىعىستان قاشىپ, باعىتىن كىلت بۇرعان №22 اۆتوبۋس «Volkswagen» ماركالى كولىكتىڭ جانىن سىرىپ وتكەن.
- «جەدەل جاردەم» قىزمەتىنە قوڭىراۋ تۇسكەن سوڭ 5 مينۋت وتكەندە دارىگەرلەر وقيعا ورنىنا جەتتى. زارداپ شەككەن 5 ادامنىڭ ءبىرى – 16 جاستاعى ءجاسوسپىرىم. وعان الدىن الا قويىلعان دياگنوز – جابىق باس-مي جاراقاتى, ميى شايقالۋ, كەۋدەنىڭ الدىڭعى جاعى زاقىمدانعان. 50 جاستاعى ايەل مەن 37 جاستاعى ەكى ەر ادام دا باسىنان جاراقاتتانعان, «ميى شايقالعان» دەگەن قاۋىپ بولدى. جىگىتتىڭ ءبىرى كەۋدە تۇسىنان ومىرتقاسى زاقىمدانعان. ال 30 جاستاعى ءبىر ايەلدىڭ اياعى اۋىر ەكەن, دارىگەرلەر تۇسىك قاۋپىنەن الاڭدادى, - دەيدى وبلىستىق دەنساۋلىق ساقتاۋ باسقارماسى ءباسپاسوز حاتشىسى ساۋلە زاعيدۋللينا.
جاراقات العانداردىڭ ءبارى دە وبلىستىق كوپبەيىندى اۋرۋحاناعا جەتكىزىلىپ, دياگنوزى ناقتىلاندى. ءبىر ءتاۋىرى, زارداپ شەككەندەردىڭ ەشقايسىسىنىڭ ميى شايقالماعان بولىپ شىقتى. كوبىندە باستىڭ جۇمساق قۇيقاسى جاراقاتتانعان. 1983 جىلى تۋعان جىگىتتىڭ ارقاسىندا سىرىلعان جاراقات بار. ال 1989 جىلى تۋعان كەلىنشەكتىڭ جۇكتىلىگى 13-14 اپتا ەكەن. وعان ء«ىشتىڭ الدىڭعى جاعىن ۇرىپ الۋ» دەگەن دياگنوز قويىلدى. جاراقات العانداردىڭ بارىنە دە العاشقى مەديتسينالىق كومەك كورسەتىلىپ, امبۋلاتوريالىق ەم تاعايىندالعان.
ايتا كەتەيىك, قالانىڭ بۇل ايماعىندا ورال «سەرۆيس» تەحنولوگيالىق كوللەدجى, «جايىق» بازارى سياقتى نىساندار ورنالاسقان.
باتىس قازاقستان وبلىسى
