سەنات دەپۋتاتتارى بجزق مەن مەملەكەتتىك ورگانداردىڭ وكىلدەرىمەن جينالىس وتكىزىپ, سالىمشىلاردىڭ زەينەتاقى جيناقتارىنىڭ ءبىر بولىگىن پايدالانۋ جانە ولاردى ءوزىن-ءوزى باسقارۋ, سونداي-اق بجزق قاراجاتىنىڭ ساقتالۋىن قامتاماسىز ەتۋ تەتىكتەرىن قاراستىردى.
كەزدەسۋدە قاۋىمداستىق وكىلدەرى "جەتكىلىكتىلىك شەگى" مولشەرىنىڭ الدىن-الا ەسەبى بويىنشا بجزق-دا ەسەپشوتىندا 5 ملن 586 مىڭى بار 59 جانە ودان جوعارى جاستاعى ازامات زەينەتاقى جيناقتارىن كورسەتىلگەن مولشەردەن اسىرا الا الاتىندىعىن ايتتى. بولاشاقتا سالىمشى بيۋدجەتتەن تولەنەتىن بازالىق زەينەتاقى تولەمىمەن بىرگە ەڭ تومەنگى زەينەتاقىنى الا الادى دەپ بولجانۋدا.
"قولدانىستاعى زاڭناماعا سايكەس 59 جاستاعى ەرلەرگە ارنالعان زەينەتاقى اننۋيتەتىنىڭ قۇنى 10 ميلليون تەڭگەنى, ايەلدەر ءۇشىن 12 ميلليون تەڭگەنى قۇرايدى. سالىمشىلارعا ارنالعان زەينەتاقى اننۋيتەتتەرىنىڭ قۇنىن تومەندەتۋ ءۇشىن زەينەتاقى اننۋيتەتى شارتى بويىنشا تولەمدەر مولشەرى دە مەملەكەتتىك بازالىق زەينەتاقى تولەمىنىڭ ەڭ تومەنگى مولشەرىنەن كەم بولماۋى كەرەك.
سونىمەن قاتار, سالىمشىعا ءوز جيناقتارىن پايدالانۋدىڭ ءارتۇرلى تەتىكتەرى اراسىندا تەڭ تاڭداۋ جاساۋ ءۇشىن, زاڭناماعا 40 جاستان باستاپ زەينەتاقى اننۋيتەتى شارتىن جاساۋعا مۇمكىندىك بەرۋ ءۇشىن تۇزەتۋلەر ەنگىزۋ قاجەت. ال ەگەر ساقتاندىرۋ ۇيىمىنان تولەنەتىن تولەمدەر ءومىر بويىنا كىرىستى قامتاماسىز ەتسە, سالىمشى زەينەتكەرلىك جاسقا تولعان كەزدە بجزق-دا قالعان جيناق اقشاسىن الىپ, ونى ءوز قالاۋى بويىنشا پايدالانۋعا قۇقىلى بولۋى كەرەك", دەدى افو وكىلدەرى ۇسىنىسىندا.
