سۋرەتتى تۇسىرگەن نۇربەك ورازاي
تەرەكتى اۋدانىنىڭ پودستەپنوە اۋىلىندا ورنالاسقان «Diesel Energy KZ» جەكە كاسىپكەرلىگىن وسى وڭىردەگى شارۋا كاسىپكەرلەر جاقسى بىلەدى. ءتىپتى كولىگى ديزەل وتىنىمەن جۇرەتىن ەڭگەزەردەي «دجيپ» يەلەرى دە مۇراتتىڭ الدىنا مۇقتاج بولىپ كەلەدى. ويتكەنى مۇرات بايمۇحامبەتوۆ ەكىنىڭ ءبىرىنىڭ قولىنان كەلە بەرمەيتىن سيرەك كاسىپتىڭ يەسى. «Diesel Energy KZ» مەكەمەسىنىڭ ۇياداي شاعىن شەبەرحاناسىندا ديزەل وتىنىمەن جۇرەتىن تەحنيكالاردىڭ ەلەكتروندى فورسۋنكالارى جوندەلەدى.
- فورسۋنكا – ديزەلدىك موتورلاردىڭ ەڭ نەگىزگى قۇرامىنىڭ ءبىرى. فورسۋنكاسى دۇرىس جاساماسا, كولىك وڭبايدى. مۇنى ديزەل ينجەكتورى دەۋگە بولادى. وسى فورسۋنكاعا وسى جەردە باستان-اياق كۇردەلى جوندەۋ جاسايمىز: قاقپاقتارىن اۋىستىرامىز, بۇرىككىشىن الماستىرامىز. مىنە, ءدال قازىر «ماز» جۇك كولىگىنىڭ فورسۋنكاسىن جاساپ جاتىرمىن. ستەند-اپپاراتقا سالىپ, اقاۋىن انىقتادىم, ەندى قوسالقى بولشەگىن اۋىستىرۋىم كەرەك. بۇل «ماز» كولىگى «ەۋرو-4» ستاندارتىنا سايكەس كەلەدى. جالپى ءبىز قازىر ەكولوگيالىق تازا ەۋرو-5, ەۋرو-6 ستاندارتتارىنا سايكەس كولىكتەردى دە قاراپ, جوندەي الامىز, - دەيدى بىزگە مۇرات تاپتىشتەپ ءتۇسىندىرىپ.
تەرەكتى اۋدانى – باتىس قازاقستان وبلىسىندا ءوندىرىسى دامىعان, ەگىن شارۋاشىلىعىنا قولايلى وڭىرگە جاتادى. سوندىقتان مۇندا كۇردەلى اۋىل شارۋاشىلىق تەحنيكالارى دا كوپ. شەبەر جىگىتتىڭ ايتۋىنشا, جاز بويى تاپسىرىستىڭ كوپتىگىنەن سىڭبىرۋگە مۇرشاسى بولماعان. «كۇنىنە 2 توپتاما فورسۋنكا جوندەپ ءجۇردىم. ءبىر توپتامادا 6-8 فورسۋنكا بولادى. بۇل از جۇمىس ەمەس. ءبىر ءوزىم ۇلگەرمەيتىن بولعان سوڭ جانىما كومەكشى-شاكىرت الدىم» دەيدى مۇرات.
مۇراتتىڭ شارۋاسى وسىدان ءبىر جىل بۇرىن اۋىل شارۋاشىلىعىن قارجىلاي قولداۋ قورىنان «كاسىپكەر» باعدارلاماسى بويىنشا 6 ملن تەڭگە نەسيە الىپ, ەلەكتروندى فورسۋنكانىڭ اقاۋىن تەكسەرەتىن زاماناۋي قوندىرعى ساتىپ العالى ەرەكشە العا باسقان.
- بۇرىن بۇل اپپارات بولماعان كەزدە قيىن ەدى. بۇل بولماسا, جۇمىسىڭنىڭ ساپاسىن تەكسەرىپ, كەپىلدىك بەرە المايسىڭ. ول اپپاراتتى ءوزىم ساتىپ الۋعا جاعداي جوق. ءسويتىپ جۇرگەندە اۋىل شارۋاشىلىعىن قارجىلاي قولداۋ قورى تۋرالى, «كاسىپكەر» باعدارلاماسى تۋرالى ەستىدىم. بۇل نەسيەنىڭ شارتتارى بىزگە وتە قولايلى ەكەن: ءوسىمى تومەن, نەبارى 6 پايىز, ءبىر جىلداي كانيكۋلى بار. مۇنىڭ ءبارى قاراپايىم كاسىپكەرلەردىڭ اياعىن نىق باسىپ, كاسىبىن جولعا قويۋىنا مۇمكىندىك بەرەدى, - دەيدى مۇرات.
بۇگىندە ورال قالاسىندا ءدال وسىنداي ءۇش-اق اپپارات بار. ولار ءبىر-بىرىمەن حابارلاسىپ, اقىلداسىپ وتىرادى ەكەن. باسەلەسپىز دەپ باستەسۋ جوق. ويتكەنى كليەنت كوپ, جۇمىس باستان اسادى.
- بولاشاقتا ءوندىرىسىمدى كەڭەيتكىم كەلەدى. ويتكەنى مەنىڭ قىزمەتىمە سۇرانىس بار. اسىرەسە اۋىلداردا كونە تەحنيكا وتە كوپ. ولاردىڭ قاراپايىم سورعىسى مەن فورسۋنكالارىن دا جوندەۋگە كىرىسۋدى ويلاپ ءجۇرمىن, - دەيدى شەبەر جىگىت.
مۇراتتىڭ مۇنتازداي شەبەرحاناسىن, تياناقتى جۇمىسىن كورىپ, ول ماقساتىنا دا جەتەتىنىنە ءشۇبا كەلتىرمەدىك. ويتكەنى مەملەكەت تاراپىنان كاسىپ باستايمىن, ءىس جاسايمىن دەگەن ادامعا ناقتى كومەك, قارجىلاي قولداۋ بار.
باتىس قازاقستان
