قازاقستان قۇراماسىنىڭ باس باپكەرى ميحال بيلەك قىركۇيەكتە وتكەن ويىنعا قاراعاندا بۇل جولى نەگىزگى قۇرامعا ازداعان وزگەرىس جاساعانىن بايقادىق. ءبىرىنشى ماتچتا بيلەك 3-4-3 تاكتيكاسىن قولدانىپ, كوبىرەك شابۋىلعا كوڭىل بولگەن ەدى. ال كەشەگى ويىن الدىندا نەگىزگى قۇرامنىڭ ءتىزىمىن جاريالاعاندا چەح مامانى كەرىسىنشە, قورعانا وتىرىپ شابۋىلعا شىعاتىنىن اڭعارتتى. ويتكەنى سىرت الاڭداعى ويىندا 5-3-2 تاكتيكاسىن ۇستاندى. باس باپكەردىڭ قورعانىسقا بەس فۋتبولشىنى قويعانىن ەسكەرسەك, بەلارۋس ەلىنە جەڭىس ءۇشىن ەمەس, ەڭ قۇرىعاندا تەڭ ناتيجە كورسەتۋگە بارعان سىڭايلى. الايدا ونىڭ بەلارۋسكە قولدانعان تاكتيكاسى ناتيجە بەرمەدى.
جالپى بيلەك وسى ەكى تاكتيكانى ءجيى قولداناتىنىن جاقسى بىلەمىز. ويتكەنى كەيىنگى ءتورت ماتچتاعى ويىن جۇيەسىن قاراساڭىز, ول ۇنەمى وسى ەكى تاكتيكانى كەزەك-كەزەك وزگەرتىپ وتىرعان. ونىڭ تەك ەكەۋى عانا ناتيجە بەردى. ءبىرىنشىسى – العاشقى تۋردا سىرت الاڭدا ليتۆامەن (2:0), ەكىنشىسى – ءوز الاڭىمىزدا البانيامەن (0:0) وتكەن ويىن. ليتۆادا 3-4-3 تاكتيكاسىمەن جەڭىسكە جەتكەنىن بىلەمىز. ال الماتىداعى كەزدەسۋدە 5-3-2 جۇيەسىن قولدانىپ, البانيامەن تەڭ تۇسكەن ەدى.
بىراق بەلارۋسپەن وتكەن كەزدەسۋدە بيلەكتىڭ ءبىرىنشى كەزەكتە قورعانىسقا كوبىرەك ءمان بەرۋدەن باسقا امالى قالماعان-دى. سەبەبى البانيامەن وتكەن ويىنعا دەيىن دە, كەيىن دە نەگىزگى قۇرامداعى بىرنەشە فۋتبولشىمىز قاتاردان شىعىپ قالدى. اتاپ ايتار بولساق, قورعاۋشىلار يان ۆوروگوۆسكي مەن ءنۇرالى الىپتەن كوروناۆيرۋس ىندەتى تابىلسا, سول قاپتالداعى قورعاۋشى عافۋرجان سۇيىمباەۆ سارى قاعازىنىڭ كوپتىگىنە بايلانىستى قۇراماعا كومەكتەسە المادى. سونداي-اق جاراقاتىنا بايلانىستى كوماندا كاپيتانى باۋىرجان يسلامحان, يۋري پەرتسۋح, شابۋىلشىلار الەكسەي ششيوتكين جانە وتباسىلىق سەبەپپەن ماكسيم فەدين بەلارۋسكە بارعان جوق.
ماتچتا بەس قورعاۋشىمەن ويناعان قازاقستان قۇراماسى كەزدەسۋدى جاقسى باستادى. كوپ شابۋىلدى ەكى قاپتال ارقىلى ۇيىمداستىرىپ, قارسىلاستاردى ەكى جاقتان قىسپاققا الدى. العاشقى قاۋىپتى شابۋىلدى سول قاپتالدان تيمۋر دوسماعامبەتوۆ ۇيىمداستىرىپ, كومانداعا ايىپ دوبىن ورىنداۋعا مۇمكىندىك جاسادى. الايدا اسحات تاعىبەرگەننىڭ تەپكەن دوبى قاقپادان دا, ءبىزدىڭ فۋتبولشىلاردان دا الدەقايدا بيىك كەتتى. كەزدەسۋدىڭ 9-مينۋتىندا جەرلەستەرىمىز بۇرىشتاما دوبىن ورىنداۋعا مۇمكىندىك الدى. جالپى قازاقستاندىق فۋتبولشىلار گولدى ويىن ساتىندە ەمەس, وسىنداي ستاندارتتى جاعدايدا ءجيى سوعاتىنىن جاقسى بىلەمىز. ايتكەنمەن, بۇل ويىندا جەرلەستەرىمىزگە ستاندارتتى جاعداي بىلاي تۇرسىن, گول سوعۋ باقىتى بۇيىرمادى. 15-مينۋتتا ب.زاينۋتدينوۆتىڭ گول سوعاتىن تاماشا مۇمكىندىگى بولىپ ەدى. الايدا الىستان شىرەنە تەپكەن دوبى بەلارۋس قاقپاشىسىنا ەش قيىندىق تۋدىرا قويعان جوق. رەسەيدىڭ تسسكا كلۋبىندا وينايتىن فۋتبولشىمىزدىڭ بۇدان بولەك تە گول سوعاتىن ءساتى بولعانىمەن, ەشبىرىن جۇزەگە اسىرا المادى.
ويىن بۇدان كەيىن ەكى ۇجىمنىڭ الما-كەزەك شابۋىلىمەن ءوربىدى. سونداي ءساتتىڭ بىرىندە قازاقستاندىق قورعاۋشىلاردىڭ نازارىنان تىس قالعان بەلارۋس فۋتبولشىسى ەۆگەني يابلونسكي گول سوعىپ كەتتى. الاڭدا جۇرگەن 5 قورعاۋشىمىزدىڭ بەسەۋى دە يابلونسكيدىڭ گول سوعۋىنا كەدەرگى كەلتىرە المادى. بالكىم, بەلارۋسپەن وتەتىن كەلەسى ويىنداردا 6 قورعاۋشىمەن ويناۋ كەرەك شىعار!
2 تايمدا دا قازاقستاندىق فۋتبولشىلار بەلارۋس قۇراماسىنىڭ قاقپاسى الدىندا بىرنەشە قاۋىپتى شابۋىل ۇيىمداستىرعانىمەن, شابۋىلدى تۇيىندەيتىن بىردە-ءبىر فۋتبولشىنىڭ تابىلماعانى قىنجىلتتى. ايتپەسە, اسحات تاعىبەرگەن, ابات ايىمبەتوۆ, باقتيەر زاينۋدتينوۆتاردا گول سوعاتىن ءبىر ەمەس, بىرنەشە مۇمكىندىك بولدى. وسىدان كەيىن فۋتبولداعى «سەن سوقپاساڭ, ساعان سوعادى» دەگەن قاعيدانى ۇستانعان الاڭ يەلەرى 93-مينۋتتا ويىنداعى ەكىنشى گولىن سالىپ كەتتى. بۇل جولى رومان يۋزەپچۋك بەلارۋس جانكۇيەرلەرىنە قۋانىش سىيلادى. قورىتىندى ەسەپ – 2:0.
تابلوداعى كورسەتكىش كوڭىلىمىزدى تۇسىرگەنىمەن, ءبىزدىڭ جىگىتتەر ناشار وينادى دەپ ايتا المايمىز. ءبىر-بىرىنە پاس اسىرىپ دوپ ۇستاۋ, كومبيناتسيالىق شابۋىل ۇيىمداستىرۋ جاعىنان دا قارسىلاسىمىزدان كەم تۇسكەن جوق. تەك شابۋىلدى سوڭىنا دەيىن جەتكىزىپ, گول سوعاتىن فۋتبولشى تابىلمادى. قاقپاشى ستاس پوكاتيلوۆتىڭ دا ەڭبەگىن اتاپ وتپەۋگە بولماس. كەزدەسۋ بارىسىندا بىرنەشە سەيۆ جاساپ, قاقپامىزدى گولدان امان ساقتاپ قالدى. ايتپاقشى, كەشەگى ويىندا بەلارۋستىڭ «رۋح» كومانداسىندا ونەر كورسەتەتىن جەرلەسىمىز ۆلاديسلاۆ ۆاسيلەۆ ۇلتتىق قۇراماداعى العاشقى ويىنىن وتكىزدى. دەبيۋتتى ماتچى بولعان سوڭ با, ۆاسيلەۆ ازداپ قوبالجىپ, كۇتكەندەگىدەي كوزگە تۇسە العان جوق. بالكىم, الداعى ويىنداردا ءوزىن جاقسى قىرىنان كورسەتىپ قالار دەپ ۇمىتتەنەمىز.
قورىتا ايتقاندا, بەلارۋس قازاق فۋتبولشىلارى ءۇشىن الىنباس قامالعا اينالدى. بۇگىنگە دەيىن ەكى ۇجىم جاسىل الاڭدا بەس رەت كەزدەستى. تورتەۋىندە «اقورىستار» جەڭىس تويىن تويلاسا, ءبىر كەزدەسۋدە تەڭ وينادىق. ونىڭ ءوزى رەسمي ەمەس, جولداستىق كەزدەسۋ بولاتىن.
توپتاعى ەكىنشى ويىندا ليتۆا ءوز الاڭىندا البانيا قۇراماسىن قابىلداپ, 0:0 ەسەبىمەن تەڭ تارقاستى. تەك قازاقستانعا عانا جول بەرگەننەن كەيىن بالتىق جاعالاۋى ەلىنىڭ وكىلى قالعان ماتچتارىن ءتاۋىر وتكىزىپ ءجۇر. كەيىننەن البانيانى سىرت الاڭدا جەڭسە, كەيىنگى ەكى كەزدەسۋدە (بەلارۋس, البانيا) تەڭ ءتۇستى. ناتيجەسىندە تۋرنير كەستەسىندەگى سوڭعى ورىننان ەكىنشى ساتىعا كوتەرىلىپ الدى. البانيا فۋتبولشىلارى ۇلتتار ليگاسىن ءساتتى باستاعانىمەن, كەيىنگى ويىنداردا ۇپاي جوعالتىپ ءجۇر. سايكەسىنشە تۋرنير كەستەسىندە ءۇشىنشى ورىنعا ءتۇسىپ قالدى.
ال ءتورت ويىننىڭ تەك بىرەۋىندە عانا جەڭىلىپ, قالعان ءۇش ويىندا ۇپاي يەلەنگەن بەلارۋس قۇراماسى توپتا جەكە-دارا كوش باستادى. ءتورتىنشى تۋرعا دەيىن ءبىرىنشى ورىندا تۇرعان قازاقستان كەشەگى جەڭىلىستەن سوڭ سوڭعى ورىنعا ءبىر-اق سىرعىدى. ءالى الدا ەكى تۋر بار. ەگەر ەكى ويىندا دا جەرلەستەرىمىز جەڭىسكە جەتە الماسا, كەلەسى جىلى جوعارى توپقا قوسىلۋدىڭ ورنىنا, بىلتىر عانا ونەر كورسەتكەن D ليگاسىنا ءتۇسىپ قالۋى ابدەن مۇمكىن.
