ەلوردا • 16 قازان، 2020

استاناعا اجار قوسقان ىلكىمدى ىستەر

34 رەت كورسەتىلدى

ىندەت قاۋپى تونگەلى اينالامىزداعى اعايىننىڭ اماندىعى ءۇشىن ءبىر-بىرىمىزدەن ىرگە­مىزدى اۋلاق سالىپ، الەۋمەتتىك اراقاشىقتىق ساقتاۋدى قاپەردە ۇستاپ كە­لە­مىز. كارانتين رەجىمى كەزىندە ەمىن-ەركىن ءجۇرىس-تۇرىسىمىز اجەپتاۋىر شەك­تەلگەنىمەن، تازا اۋادا تىنىستاۋعا تىيىم سالىنبادى. سوندىقتان قالا حال­قىنا قولايلى جاعداي جاساۋ ءۇشىن اۋلا، تىنىمباق، گۇلزار سياقتى تىنىس كە­ڭەي­تەر ورىنداردىڭ كوركى دە كوز قۋانتاتىنداي بولۋىنا باسا ءمان بەرىلىپ جاتىر.

 

اباتتانعان اۋلا تۇرعىنداردىڭ كوڭىلىن اۋلايدى

كارانتين شارالارى ەنگىزىلگەننەن كەيىن اشىق اسپان استىنداعى اۋاسى كەڭ قوعامدىق ورىندارعا سۇرانىس ارتا ءتۇستى. تۇرعىندار تازا اۋادا سەرۋەندەۋگە كوبىرەك كوڭىل بولە باستادى. وسىنى ەسكەرگەن نۇر-سۇلتان قالاسىنىڭ اكىم­دى­گى كوكتەمنەن باس­­تاپ اۋلالاردى، سايا­باق­تاردى، جەلەكجولداردى اباتتاندىرۋ بويىنشا اۋقىمدى جۇمىس جۇرگىزىپ كەلە­­دى. بۇل باعىتتاعى جۇمىس بارلىق اۋدان­دا بەلسەندى جۇر­گىزىل­گەنىمەن، قالا­نىڭ ەسكى بولىگىنىڭ اجا­رىن اشۋعا باسىم­دىق بەرىلدى. اتاپ ايتقاندا، بيىل باي­قوڭىر اۋدانىندا – 50، سارىارقادا – 40، الماتىدا – 33، ەسىل اۋدا­نىندا 20 اۋلا اباتتاندىرىلدى.

اۋلالاردى جانعا جايلى، كوزگە تارتىمدى ەتىپ قايتا جاڭارتۋ بارىسىندا تۇر­عىنداردىڭ دا تىلەگى ەسكەرىلىپ جاتىر. ويتكەنى تۇرعىنداردىڭ قالاۋىمەن جان­دانعان اۋلانىڭ اينالاعا قولايلى بو­لارى ءسوزسىز. بۇل رەتتە «بيۋدجەتكە قا­تىسۋ» باعدارلاماسى تۇرعىنداردىڭ تا­لاپ-تىلەگىن جۇزەگە اسىرۋعا سەپتىگىن تيگىزۋدە.

«حالىق سانىنىڭ ءوسۋىن ەسكەرە وتىرىپ، ءىرى گاباريتتى اۋلالار، گۇلباقتار مەن جەلەكجولدار قۇرىلىسىنا باسىمدىق بەرىپ جاتىرمىز. اۋدانداردى جۇرتقا قولايلى ەتىپ جاساقتاۋ ىسىندە تۇرعىنداردىڭ تىلەگىن ەسكەرۋسىز قالدىرمايمىز. مىسالى، جەل­توق­سان كوشەسىندەگى №2-ءۇيدىڭ تۇر­عىن­دارى ەسەپ بەرۋ كەزدەسۋىندە اۋلانى ابات­تاندىرۋ ماسەلەسىن كوتەردى. ءبىز ونى «بيۋد­جەتكە قاتىسۋ» باعدارلاماسى بو­­­يىنشا اباتتاندىردىق. تۇرعىندار اۋدان اكىمدىكتەرىنە ءوتىنىم بەرىپ، اۋلا كورىنىسىن ۇسىنادى. سودان سوڭ قانداي ايماقتار سالۋ قاجەت، قانداي سپورت الاڭى كەرەك دەگەن سياقتى بىرقاتار ماسەلە شەشىمىن تاۋىپ جاتىر. تۇرعىندارمەن كەزدەسكەن كەزدە باسقا دا ماڭىزدى ماسەلەلەردى تالقىلايمىز. ايتالىق، «قاۋىپسىز اۋلا» باعدارلاماسى بويىنشا اۋلاىشىلىك اۋماقتاردا كامەرالار ورناتامىز. بۇل تاجىريبە كورسەتىپ وتىرعانداي، قاۋىپسىزدىك دەڭگەيىن ارتتىرادى. سونىمەن قاتار جەدەل قىزمەت ماشينالارى تۇرعىن ءۇي اۋماعىنا كەدەرگىسىز كىرۋ ءۇشىن «اقىلدى شلاگباۋمدار» اتتى جاڭا جوبا ىسكە قوسىلدى»، دەيدى نۇر-سۇلتان قالاسىنىڭ اكىمى التاي كولگىنوۆ.

سونىمەن قاتار تۇرعىندارعا جايلىلىق سىيلاۋ ءۇشىن بوس جاتقان جەرلەر مەن قاراۋسىز قالعان ۋچاسكەلەردى دەمالاتىن قوعامدىق ورىندارعا اينالدىرۋ دا ماڭىزدى. بۇعان قوسا اپاتتىق جاعدايداعى ۇيلەر دە بۇزىلىپ، ورنىنا جاڭا ويىن-ساۋىق الاڭدارى سالىنىپ جاتىر.

قالادان شەتكەرى ورنالاسقان ءوندىرىس تۇرعىن الابىنداعى قاراۋسىز قالعان ۋچاسكەنىڭ ءبىرى بۇگىندە تۇرعىنداردىڭ سۇيىكتى ورنىنا اينالعان. وسى ماڭدا تۇراتىن تىلەۋلەس جاڭابايقىزى جاڭا­دان سالىنعان شاعىن ساياباق ءۇشىن ريزا­شى­لىعىن ءبىلدىردى. «بۇل جەر قاراۋسىز، بوس جاتقان ەدى. ءبىز ودان اينالىپ وتە­تىن­بىز. ال ەندى قازىر ءبىزدىڭ جەكە شا­عىن ساياباعىمىز بار. بالالارعا ۇناي­دى. اعاشتار وتىرعىزىلدى. ءبىز ريزامىز، ويتكەنى بالالار وتە قۋانىشتى. ءتونىپ تۇرعان ىندەتتىڭ قاۋپىن ەسكەرسەك، دەن­ساۋ­لى­عىمىزعا كوبىرەك ۋاقىت ءبولۋ ما­ڭىز­دى. دەمەك، اشىق اۋادا سپورتپەن شۇ­عىل­دانۋ كەرەك. مۇندا فيتنەس ايماعى دا بار، بالالار فۋتبول دا ويناي الادى»، دەيدى ول.

ءوندىرىس تۇرعىن الابىنداعى اقبيداي كوشەسىندە فۋتبول الاڭى بار اۋلا جاسالدى، تايبۋرىل كوشەسىندە شاعىن ساياباق اشىلدى. مۇندا 1950 جىلى سا­لىن­عان جاپسارلاس ۇيلەر بولعان ەدى. قازىر بۇل جەر سپورتتىق ترەناجەرلەر ايماعى، بالالارعا ارنالعان ويىن الا­ڭى، فۋتبول جانە باسكەتبول الاڭى بولىپ بىرنەشە ايماققا ءبولىندى. تاعى ءبىر جاڭالىق – بۇل ايماقتا تۇرعىنداردىڭ ءوتىنىشى بويىنشا جىلى ايالداما ورناتىلدى. سونداي-اق پرەزيدەنتتىڭ تاپسىرماسىنا سايكەس №23 مەكتەپتىڭ جاڭا كورپۋسىنىڭ قۇرىلىسى باستالدى. ەڭسەلى دەنە شىنىقتىرۋ-ساۋىقتىرۋ كەشەنىنىڭ قۇرىلىسىن جۇرگىزىپ جاتىر.

مۇنداي يگىلىكتى الماتى اۋدانىنىڭ تۇرعىندارى دا كورىپ جاتىر. ع.مۇسىرەپوۆ كوشەسىندەگى №10/3-ءۇيدىڭ ماڭى بۇرىن باتپاق جەر بولدى. وسى ماسەلەمەن اكىمدىككە اۋدان تۇرعىندارى جۇگىندى. ناتيجەسىندە جاڭا اۋلا پايدا بولدى. ءدال وسىنداي ماسەلەمەن قاجىمۇقان، پەتروۆ، ش.قۇدايبەردى ۇلى كوشەلەرىندە اۋلالار سالىندى. الداعى ۋاقىتتا اۋداندا تاعى دا بىرقاتار تىنىمباقتى اباتتاندىرۋ جوسپارلانىپ وتىر.

جالپى، بيىل نۇر-سۇلتاندا 150 اۋلا مەن 50 قوعامدىق ورىن اباتتاندىرىلدى. بۇل 300 مىڭنان اسا ادامنىڭ سالاماتتى ءومىر سالتىن ۇستانىپ، سپورتپەن اينالىسۋىنا قولايلى جاعداي جاسايدى. وسىناۋ اۋقىمدى جۇمىسقا «جۇمىسپەن قامتۋدىڭ جول كارتاسى» بويىنشا جۇمىسشىلار تارتىلدى.

 1

كوپىر استى كورىكتى ورىنعا اينالدى

دەمالىس ءۇشىن جايلى ايماقتار قۇرۋ – قالا باسشىلىعىنىڭ ۇنەمى نازارىندا تۇرعان ماسەلە. بۇل باعىتتاعى وڭتايلى شەشىمنىڭ ءبىرى كوپىر استىنداعى كەڭىستىكتى كوپشىلىكتىڭ بوس ۋاقىتىن وتكىزەتىن ورىن­عا اينالدىرۋ بولدى.

وسىنداي كورىكتى ورىن ل.ن. گۋميلەۆ اتىنداعى ەۇۋ جانىنداعى كوپىردىڭ استىنان سالىندى. مۇندا ستريتبول، سكەيتۆورد، ۆوركاۋت جانە ستريت-ارت الاڭدارى اشىلىپ، تەننيس ۇستەلدەرى قويىلدى. بۇل ايماق بولاشاقتا ودان ءارى دامىماق. قازىر نۇر-سۇلتان قالاسىنىڭ ۋربانيستيكا ورتالىعى ايگىلى چەمپيوندار جاقسىلىق ۇشكەمپىروۆ پەن دەنيس تەنگە ارنالعان گراففيتي سالۋ ءۇشىن قولايلى ورىن قاراستىرىپ جاتىر.

ەلوردادا بالالارعا ارنالعان ۇلكەن ەكو-الاڭنىڭ ءبىرى سارايشىق كوشەسىندەگى كوپىردىڭ استىندا اشىلدى. بۇل جاڭا قوعامدىق كەڭىستىك پرەزيدەنت جانە تريات­لون ساياباقتارىن بايلانىستىرادى. ويىن الاڭىنىڭ جالپى اۋدانى – 1 088 شارشى مەتر. اتالعان كەڭىستىكتە ەكى باسكەتبول، ەكى فۋتبول الاڭى، بالالار الاڭى، كولەڭكەلى شاتىرلار، جاتتىعۋ ايماعى، 13 پيكنيك ايماعى جابدىقتالدى. م-1 كوپىرىنىڭ باعاندارى گراففيتيمەن بەزەندىرىلىپ، دەكوراتيۆتى جارىعى ۇيىمداستىرىلدى. تاماقتانۋ ورنى دا بار. سونداي-اق وزەن جاعاسىندا جاياۋجولدار جانە ۇزىندىعى شامامەن 4 شاقىرىمعا جەتەتىن ۆەلوسيپەد جولى سالىندى.

«بۇل – حالىقارالىق دەڭگەيدەگى ينفراقۇرىلىم. قاراڭىزشى، قانشا ادام باسكەتبول، فۋتبول، ۆولەيبول ويناپ، ءماز-مەيرام بولىپ ءجۇر. ستريت-ۆوركاۋتقا ارنالعان تاماشا جابدىقتار بار. شىن مانىندە، كەرەمەت جوبالار، تاڭعالارلىق ديزاين بىردەن كوزگە تۇسەدى. ءبىزدىڭ سۋرەتشىلەر سالعان بۇل قابىرعا سۋرەتتەرى دە كەرەمەت. مۇنداي الاڭدار بۇكىل ەلدە كوپ بولعانىن قالايمىن»، دەيدى ەلوردالىق ءانۋار عازيز.

ىندەت قوس وكپەدەن قىسقان قىسىلتاياڭ شاقتا كوپىر استىنداعى وسىنداي كەڭىس­تىك­تەر قالا تۇرعىندارىنىڭ كوڭىلىن كوتەرىپ تاستاعانى راس. مۇندا جاستارمەن قاتار، سەرۋەندەپ جۇرگەن ۇلكەن كىسىلەردى دە ءجيى بايقايمىز.

«الدىمەن مەن ستريت-ۆوركاۋتپەن اينالىساتىن جاستار اتىنان وسىنداي الاڭدار ءۇشىن قالا اكىمدىگىنە ريزا­شى­لى­عىم­دى بىلدىرگىم كەلەدى. بۇكىل الەمدەگى جاعدايدى ەسكەرسەك، بۇگىندە مۇنداي جوبالار وتە قاجەت. ءبىز تازا اۋادا جاتتىعامىز. بارلىعى كاسىبي تۇرعىدا دايىندالعان، جاعداي جاسالعان. ەڭ باستىسى، جاستار ۋاقىتىن بىرگە، پايدالى وتكىزەدى»، دەيدى قالا تۇرعىنى ايتىم جاقىپوۆ.

بۇل ايماققا ءالى دە شاعىن ساۋلەت فورمالارى قويىلادى. ەكسترەمالدى سپورت اۋەسقويلارى ءۇشىن پاركۋر-الاڭ قۇرۋ جوسپارلانىپ وتىر. شاھارداعى مۇنداي تارتىمدى ورىنداردى جاساۋ جۇمىستارى «نۇر-سۇلتان – جايلى قالا» تۇجى­رىمداماسى اياسىندا جۇزەگە اسىرىلىپ جاتىر.

ايالدامالار، سپورت الاڭدارى، ارت-نىساندار، ينستاللياتسيالار مەن جارىق كوم­پوزيتسيالارى – زاماناۋي مەگا­پو­ليستىڭ ەرەكشە سيپاتى. بۇگىندە قالا كوشەلەرىندە نازار بۇرىپ قارايتىن اجارلى ارت-نىساندار دا كوپتەپ كوزگە شالىنادى. ەلوردانىڭ كوشەلەرى مەن دەمالىس ورىندارى كوشە كومپوزيتسيالارىمەن، ينستاللياتسيالارمەن بەزەندىرىلگەن. ولاردىڭ تاقىرىبى وتباسى قۇندىلىعىن ارتتىرۋدى، ۇلتتىق مادەنيەتتى دامىتۋدى ناسيحاتتايدى.

«نۇر-سۇلتان»، «ارۋ» ينستاللياتسيا­لا­رى، گۇل پيراميدالارى مەن تەك­شە­لە­رى، ساندىك ورىندىقتار، اباي مەن ءال-فارابي بەينەلەنگەن جازىق مۇسىندەر، شريفت كومپوزيتسياسى مەن گۇل ءورىسى، جارىقتاندىرىلعان اعاشتار، ورىندىقتار جانە باسقا دا ارت-نىساندار استانانىڭ اجارىن اشىپ، اجىراماس بولىگىنە اينالدى.

 

جاسىل جەلەك – جانعا سايا

استانانىڭ اجارىن اشا ءتۇسۋ ءۇشىن اباتتاندىرۋ جۇمىستارىمەن قاتار كوگالداندىرۋعا ايرىقشا كوڭىل بولىنەتىنى ءسوزسىز. بۇل رەتتە ەڭ الدىمەن ەلوردانىڭ جاسىل بەلدەۋىن ودان ءارى دامىتۋعا ءمان بەرىلەدى. قالا باسشىسى التاي كولگىنوۆ كوگالداندىرۋ جۇمىسىنا دا ەرەكشە ەكپىن سالىپ وتىر.

«ەلوردانىڭ جاسىل بەلدەۋى قالانىڭ تىنىس الۋ ورگانى ىسپەتتەس. ورمان ءوسىرۋ ەلباسىنىڭ باستاماسىمەن قولعا الىنعان بولاتىن. وسى ۋاقىت ارالىعىندا جاسىل بەلدەۋ ايتارلىقتاي كەڭەيدى. جىل سا­يىن مىڭداعان تال-تەرەك وتىرعىزىلادى. جاسىل بەلدەۋ قالانىڭ ەكولوگياسى مەن كليماتتىق جاعدايىن جاقسارتۋعا سەپتىگىن تيگىزىپ كەلەدى. بيىل 330 مىڭعا جۋىق جاپىراقتى، قىلقان جاپىراقتى كوشەت جانە قوسىمشا تاعى 3 مىڭنان اسا كوشەت وتىرعىزامىز. جالپى، اۋماقتا 10،2 ملن تال مەن 1،8 ملن قاراقات، ىرعاي، دەرەن ءوسىپ جاتىر. كوكتەمدە جاسىل بەلدەۋدىڭ سوقپاق جول جەلىسىن قايتا قۇرۋعا كىرىستىك. اۋماقتا بەلسەندى ۋاقىت وتكىزۋگە ارنال­عان سكەيتبوردينگ الاڭى، روليكپەن سىر­عاناي­تىن شاعىن الاڭدار سالۋ جۇمىستارى جۇرگىزىلىپ جاتىر. جاياۋ سەرۋەندەۋگە جانە كروسس-كانتري ساباقتارىنا ارنالعان جولدار سالىنادى. سونداي-اق بالالارعا ارنالعان ويىن الاڭدارىن، فۋتبول جانە تەننيس الاڭدارىن جاسايمىز. جاسىل بەلدەۋدە بۇگىندە قويان، قارساق، تۇلكى، قىرعاۋىل جانە باسقا دا جانۋارلار مەن قۇستار مەكەندەيدى. جاسىل بەلدەۋدەگى قۇستاردىڭ سانىن ارتتىرۋ بويىنشا دا جۇمىس اتقارىلىپ جاتىر»، دەيدى اكىم.

قازىرگى جاسىل بەلدەۋدىڭ جانىندا ورنالاسقان يپپودرومدا يپپوتەراپيا­­مەن اينالىسۋعا ارنالعان ات-سپورتى كەشەنىنىڭ قۇرىلىسى اياقتالۋعا تاياۋ. ەرەكشە قاجەتتىلىكتەرى بار بالالاردى وڭالتۋمەن ارنايى وقىتىلعان ادامدار اينالىسادى. يپپودروم بازاسى ۇلتتىق جانە كلاسسيكالىق سپورت تۇرلەرىن وتكىزۋ جانە ولارعا دايىندىق، تۋريستىك مارشرۋت باعىتتارى بويىنشا دامىتىلادى. يپپودرومنان ۇركەر ەلدى مەكەنىنە دەيىن ۆەلوجول توسەلدى. ەندى ۆەلوسيپەد، شاڭعىلاردى جالعا بەرۋ ءۇشىن بازا سالىنباق. بۇل جۇمىس جىل سوڭىنا دەيىن اياقتالادى.

«ەلوردانىڭ بارلىق اۋداندارىندا كوگالداندىرۋعا نازار اۋدارىپ كەلەمىز. بيىل 30 مىڭ ءتۇپ اعاش وتىرعىزامىز. اۋلالاردى، ساياباقتاردى، تىنىمباقتار مەن جەلەكجولداردى اباتتاندىرۋ كەزىندە كوشەتتەر وتىرعىزامىز. ارينە، وعان كۇتىم جاساۋ ماڭىزدى. وتىرعىزىلعان تال-تەرەكتەر مەن گۇلدەردى كۇتىپ-باپتاۋ ءۇشىن كوكتەمنەن باستاپ سۋارۋ جۇيەسىن 20%-دان 90%-عا دەيىن قالپىنا كەلتىردىك. پرەزيدەنت حالىققا جولداۋىندا ەكولو­گيا­ل­ىق تۋريزم مادەنيەتىن بەلسەندى دامىتۋ ماڭىزدى مىندەت ەكەنىن اتاپ ءوتتى. بۇل ءۇشىن ەلوردادا قالا تۇرعىندارى مەن قوناقتارىنا ارنالعان ەكوپاركتەر قۇرۋ بويىنشا جۇمىستار جۇرگىزىلىپ كەلەدى»، دەيدى ا.كولگىنوۆ.

سونىمەن وسى جىلى استانادا وتىر­عىزىل­عان تال سانى 30 مىڭداي بولسا، بارلىق ەگىلگەن جاسىل-جەلەك 80 مىڭعا جەتەدى. مۇنىڭ كولەمىن جىل سايىن ارتتىرۋ ماڭىزدى مەجە رەتىندە بەلگىلىنگەن.

اكىمنىڭ ايتۋىنشا، وسىمدىكتەردى قور­عاۋ ماقساتىندا جاسىل كوشەتتەردى كۇتۋ ءارى قورعاۋ ەرەجەلەرى كۇشەيتىلدى. بۇرىن كەسىلگەن ءبىر اعاشتىڭ ورنىن تول­تى­رۋعا بەس اعاش ەگىلەتىن. ەندى ءبىر اعاش كەسىلسە، ونىڭ ورنىنا ون اعاش وتىرعىزۋ كەرەك بولادى.

1

 

يگىلىكتى ءىس جالعاسىن تابادى

ەلوردانىڭ تىنىسىن كەڭەيتەتىن جۇمىستاردىڭ بۇدان ءارى جاندانا تۇسەتىنى انىق. مىسالى، الداعى جىلى «جەرۇيىق» ساياباعىنىڭ بوس جاتقان جەرلەرىن اباتتاندىرۋ جوسپاردا تۇر. مۇنداي يگىلىكتى ءىس جالعاسىن تاۋىپ، م.تولەباەۆ كوشە­سىن­دەگى ۋچاسكەدە جاڭا قوعامدىق كەڭىستىك قۇرىلادى. بۇقارالىق سپورتتى دامىتۋ ماقساتىندا تەننيس كورتتارىن، باسكەتبول الاڭدارىن، سكەيتپارك، پيكنيككە ارنالعان ايماقتاردى ورنالاستىرۋ جوسپارلانىپ وتىر. ساۋدا پاۆيلوندارى مەن گاماكتارى بار ويىن الاڭى پايدا بولادى.

ۋربانيستيكا ورتالىعى بەرگەن مالى­مەت بويىنشا جۇگىرۋگە ارنالعان جول­دار جانە ۆەلوجولدار قاراستىرىلعان. كوگالداندىرۋ الاڭى – 13 939،8 شارشى مەتر، اللەيا – 12 053،1 شارشى مەتر، جۇگىرۋ جولىنىڭ ۇزىندىعى 1 951 مەتر اۋماقتى قامتيدى.

«پرەزيدەنت حالىققا جولداۋىندا بۇ­قارالىق سپورتتى دامىتۋعا ەرەكشە نازار اۋداردى. وڭىرلەردە سپورت سەك­تسيا­لارىن اشۋعا جانە بالالاردىڭ سپورتتىق جانە شىعارماشىلىق الەۋەتىن دامىتۋعا باسىمدىق بەرىلەدى. بۇل باعىتتا جۇمىستار جۇرگىزىلىپ جاتىر. ەلوردادا 3 دەنە شىنىقتىرۋ-ساۋىقتىرۋ كەشەنىنىڭ قۇرىلىسى باستالدى، تاعى بىرەۋى كەلەسى جىلى سالىنادى»، دەپ مالىمدەدى نۇر-سۇلتان قالاسى ساۋلەت، قالا قۇرىلىسى جانە جەر قاتىناستارى باسقارماسىنىڭ باسشىسى نۇرلان ۇرانحاەۆ.

سونىمەن قاتار شاھاردا تاعى ءبىر اربات سالىنادى. جاياۋ جۇرگىنشىلەر پرومەنادى قۇرىلىسى بويىنشا جۇمىس جۇرگىزىلىپ جاتىر. جاڭا قوعامدىق كەڭىستىك وماروۆ كوشەسىنىڭ رەسپۋبليكا داڭعىلىنان ق.قۋانىشباەۆ اتىنداعى تەاترعا دەيىنگى بويىندا ورنالاسادى. جاياۋ جۇرگىنشىلەر پرومەنادى ەكى تەاتر اراسىنداعى اۋماقتى بايلانىستىرادى.

رەسپۋبليكا داڭعىلى جاعىنداعى سۋبۇرقاقتى قايتا قۇرۋ جۇمىسى قولعا الىنادى. بۇل جىلعاعا قاراي اعادى. ال سول جىلعا بويىندا بالالارعا ارنالعان سۋمەن وينايتىن ەلەمەنتتەر ورناتىلماق. بۇعان قوسا اربات اۋماعىندا اسپالى اتكەنشەك قويىلادى. بالالار ءۇشىن سپورت جانە ويىن الاڭدارى، تىنىش اۋماقتار، كوۆوركينگ-ورتالىق سىندى تەگىن سەمينارلار مەن ءتىل ساباقتارىن وتكىزۋگە ارنالعان جەكە ايماقتار جاسالادى. كوپىر استى كەڭىستىگى اۋماعىندا بالالارعا ارنالعان ەكو-الاڭ مەن اسپالى ساياباق سالىنادى. سونداي-اق بەيبىتشىلىك كوشەسىنەن رەسپۋبليكا داڭعىلىنا دەيىن ۆەلوجول پايدا بولادى.

ەلوردا اكىمى التاي كولگىنوۆ Instagram-داعى پاراقشاسىندا «وتكەن جىلى ءبىز ءبى­رىنشى كەزەكتە اباتتاندىرۋدى قاجەت ەتەتىن اۋلالاردىڭ ءتىزىمىن جاسادىق. ولاردىڭ قاتارىنا قاراۋسىز قالعان ۋچاس­كە­لەر، باتپاق جانە بوس قالعان جەرلەر ەنگىزىلدى. باسىمدىق وڭ جاعالاۋعا جاسالدى. سونداي-اق اپاتتى ۇيلەر سۇرىلگەن جەرلەردە، قۇرىلىس جۇمىستارى قارقىندى ءجۇرىپ جاتقان جەرلەردە شاعىن پاركتەر پايدا بولدى. اباتتاندىرۋ بويىنشا اۋقىمدى جۇمىستارعا بيىلعى كوكتەمنەن باستاپ كىرىستىك. قازىر كەلەسى جىلى اباتتاندىرىلاتىن اۋلالار مەن قوعامدىق كەڭىستىكتەردىڭ ءتىزىمىن دايىنداپ جاتىرمىز»، دەپ جازدى.

 

سوڭعى جاڭالىقتار

اراق ساتىلمايتىن اۋدان

ايماقتار • بۇگىن، 21:11

ەرلىككە تولى سۋرەتتەر

رۋحانيات • بۇگىن، 13:05

كيىكتەردىڭ تولدەۋ كەزەڭى باستالدى

فوتوگالەرەيا • بۇگىن، 12:07

ۇقساس جاڭالىقتار