مەملەكەت باسشىسى قازاقستان حالقىنا بيىلعى جولداۋىندا ۋچاسكەلىك پوليتسيا ينسپەكتورلارىنا قويىلاتىن تالاپتاردىڭ كۇشەيتىلەتىنىن جانە ولارعا مەملەكەت تاراپىنان جاعداي جاساۋ قاجەتتىلىگى تۋرالى ايتقان بولاتىن. الماتى وبلىسىنىڭ ورتالىعى تالدىقورعان قالاسىنداعى 11 ۋچاسكەلىك پوليتسيا پۋنكتىنىڭ التاۋى ءتارتىپ ساقشىسىنا ارنالعان تۇرعىن ۇيمەن جاپسارلاسا سالىنعان.
“تۇرعىن ۇيمەن جاپسارلاسا سالىنعان ۋچاسكەلىك پوليتسيا پۋنكتى ءوزىنىڭ ءتيىمدى ەكەنىن تالاي مارتە دالەلدەدى. ءاربىر پوليتسيا پۋنكتىنە “نيۆا” ماركالى قىزمەتتىك كولىك بەرىلگەن. ياعني, مەملەكەت تاراپىنان كولىك پەن تۇرعىن ءۇي ماسەلەسى شەشىلگەن ۋچاسكەلىك پوليتسيا ينسپەكتورى ەش الاڭداماستان اكىمشىلىك ۋچاسكەسىندەگى قۇقىقتىق ءتارتىپتى قامتاماسىز ەتۋگە بار كۇشىن ارنايدى. ناتيجەسىندە بيىل قۇقىق بۇزۋشىلىقتار سانى ازايدى”,- دەدى تالدىقورعان قپب باستىعى اسقار نۇرساپا.
ۋچاسكەلىك پوليتسەيدىڭ ءوز اكىمشىلىك اۋماعىندا تۇراتىنىنا جەرگىلىكتى تۇرعىندار دا ريزا.
“بۇرىن قاراڭعى تۇسكەن كەزدە كوشەلەردە ماس ادامدار ءجۇرىپ, دۇكەنگە بارۋعا قورقاتىنبىز. قازىر بارلىعى جاقسى بولدى. ويتكەنى, ۋچاسكەلىك پوليتسيا ينسپەكتورى اۋىلدا تۇراتىن بولعاندىقتان, ءتارتىپ ورنادى. كەز كەلگەن ۋاقىتتا ماسەلەمىزدى ايتىپ, ۋچاسكەلىك پۋنكتكە كەلسەك, ينسپەكتوردى تاباتىنىمىز وتە ىڭعايلى”,- دەدى وتەناي اۋىلدىق وكرۋگىنىڭ تۇرعىنى نينا كارماچۋنوۆا.
وزگە اۋىل تۇرعىندارى دا ۋچاسكەلىك پوليتسەيلەرگە مەملەكەت تاراپىنان قولداۋ كورسەتىلگەنى وتە دۇرىس دەپ سانايدى. “مەن بۇرىن ءوزىم دە ىشكى ىستەر ورگاندارىندا قىزمەت اتقارعانمىن. ۋچاسكەلىك پوليتسەيلەرگە جاعداي جاساۋ قاجەت, ويتكەنى ولار ۋاقىتپەن ساناسپاي قىزمەت اتقارادى. قىلمىستىڭ كوبى تۇندە جاسالاتىندىقتان, اكىمشىلىك اۋماققا جاۋاپتى ءتارتىپ ساقشىسى بارلىق ۋاقىتى مەن كۇش-جىگەرىن تەك جۇمىسقا باعىتتاۋى ءتيىس. پوليتسيا قىزمەتكەرلەرىنىڭ قازىرگى جۇمىسىنا ريزامىز, قىزمەتتەرىندە شاپشاڭدىق, ءتارتىپ پەن كىشىپەيىلدىك سەزىلىپ تۇرادى”,- دەدى اۋىلدىق اقساقالدار القاسىنىڭ توراعاسى بەدەلبەك سۇلەيمەنوۆ.
ءوز كەزەگىندە, وسىنداي تۇرعىن ۇيمەن قامتاماسىز ەتىلگەن وتەناي اۋىلدىق وكرۋگىنىڭ اعا ۋچاسكەلىك ينسپەكتورى ازامات ابدىلداەۆ تا بۇل جوبانىڭ تيىمدىلىگىن اتاپ ءوتتى.
“وتباسىم قىزمەتتىك تۇرعىن ۇيمەن قامتاماسىز ەتىلگەندىكتەن, جۇمىس بارىسىندا الەۋمەتتىك پروبلەمالارعا الاڭدامايمىن. تۇرعىندار مەنى تاۋلىكتىڭ كەز كەلگەن ۋاقىتىندا جۇمىس ورنىمنان تابا الاتىنىن بىلەدى. بۇل – وتە ءتيىمدى جوبا. اۋماقتاعى تۇرعىندارمەن ەتەنە جاقىن ارالاسىپ, ولاردى تانۋ ءۇشىن ءبىز ءوزىمىز قىزمەت ەتەتىن اۋماعىمىزدا تۇرۋىمىز قاجەت”,- دەدى ۋچاسكەلىك ينسپەكتور ازامات ابدىلداەۆ.
