قۇرىلعانىنا جيىرما جىلعا جۋىق مەرزىمدە راديوەلەكترونيكا جانە بايلانىس اسكەري-ينجەنەرلىك ينستيتۋتى ەلىمىزدىڭ قارۋلى كۇشتەرى مەن باسقا دا اسكەري قۇرىلىمدارىنا وفيتسەر كادرلاردى بەس ماماندىق بويىنشا دايىنداپ كەلەدى. بۇگىندە بولاشاق اسكەريلەر زەنيتتى زىمىراندى, راديوتەحنيكالىق, اۆياتسيانى راديوتەحنيكامەن قامتاماسىز ەتۋ, بايلانىس, قارۋ-جاراقتى باسقارۋدىڭ اۆتوماتتاندىرىلعان جۇيەلەرىنىڭ ينجەنەرلەرى, سونداي-اق اقپاراتتىق قاۋىپسىزدىكتى قورعاۋ سالاسى بويىنشا ءبىلىم الىپ كەلەدى.
زاماناۋي وفيتسەرلەرگە قارۋ-جاراقتىڭ كوپتەگەن تۇرلەرى مەن راديوەلەكترونيكانى جەتىك ءبىلۋ جاۋاپكەرشىلىگى جۇكتەلگەن. حالىقارالىق ستاندارتتارعا ساي جاراقتالعان ينستيتۋتتا جوعارى دارەجەلى ماماندار ءدارىس بەرەدى. بۇگىندە 18 ماماننىڭ عىلىمي دارەجەسى بار. ونىڭ 4-ءۋى عىلىم دوكتورى, 11-ءى عىلىم كانديداتى, 3 وقىتۋشى PhD دوكتورى بولىپ تابىلادى. ال 141 ادام ماگيستر دارەجەسىنە يە. سونداي-اق, 25 اسكەري قىزمەتشى ەلىمىزدەگى جوعارى وقۋ ورىندارىنىڭ ماگيستراتۋراسى مەن تمد ەلدەرىنىڭ اديۋنكتۋراسىندا ءبىلىم الۋدا. اسكەري ينستيتۋتتىڭ باستىعى گەنەرال-مايور اسقار مۇستابەكوۆ اتاپ وتكەنىندەي, وقۋ ورنىنىڭ جەتىستىگى ءاربىر اسكەري قىزمەتشىنىڭ, ازاماتتىق پەرسونالدىڭ قاجىرلى ەڭبەگىنىڭ جەمىسى. ولار اسكەري ءبىلىم بەرۋدى دامىتۋعا, جوعارعى وقۋ ورنىنىڭ قالىپتاسۋىنا, بولاشاق وفيتسەرلەردى دايىنداۋعا لايىقتى ۇلەس قوسىپ كەلەدى. سونىڭ ارقاسىندا ينستيتۋت ەلىمىزدىڭ اسكەري جوعارعى وقۋ ورىندارى اراسىندا جەتەكشى ۇجىمداردىڭ ءبىرى بولىپ سانالادى. ەلىمىزدىڭ قارۋلى كۇشتەرى مەن باسقا دا اسكەري قۇرالىمدارى ءۇشىن وفيتسەر كادرلارىن دايارلاۋدا ۇزدىك تاجىريبەسىمەن ەرەكشەلەنۋدە.
ينستيتۋت قابىرعاسىندا كۇندەلىكتى بەرىلىپ جاتقان تەوريالىق ءبىلىم ناتيجەلى بولۋى ءۇشىن پراكتيكالىق ساباقتار قوسا ۇيىمداستىرىلادى. وقۋ اۋديتوريالارى مەن زەرتحانالارى ءتۇرلى راديوتەحنيكالىق ستەندتتەرمەن, كومپتەرلىك جانە لينگوفوندى تەحنيكالارمەن, سيمۋلياتورلارمەن, سونداي-اق جاتتىعۋ كەشەندەرىمەن جابدىقتالعان. كۋرسانتتار تەوريالىق بىلىمدەرىن ينستيتۋتتىڭ وقۋ ورتالىعىندا جەتىلدىرە تۇسەدى. بولاشاق وفيتسەرلەر شىنايى جاۋىنگەرلىك تەحنيكالاردا تاجىريبەدەن ءوتىپ, راديولوكاتسيالىق بەكەتتەر مەن بايلانىس اسكەري تەحنيكالارىندا قىزمەت كورسەتەدى. سونىمەن قاتار, كۋرسانتتار مەن وفيتسەرلەر ءتۇرلى عىلىمي جوبالاردى زەرتتەۋ قولعا العان. ياعني, عىلىمي زەرتتەۋلەر جۇرگىزىپ, اسكەري جانە قارۋ-جاراق تەحنيكاسىن جەتىلدىرۋگە اتسالىسۋدا. بىلىكتى پەداگوگتاردىڭ جەتەكشىلىگىمەن كۋرسانتتار عىلىمي جوبالارىن زەرتتەۋگە ۇسىنىپ, باياندامالارىمەن رەسپۋبليكالىق جانە حالىقارالىق دەڭگەيدەگى عىلىمي كونفەرەنتسيالارعا قاتىسىپ كەلەدى. عىلىمي ەڭبەكتەر ينستيتۋت قابىرعاسىندا شىعاتىن عىلىمي-تەحنيكالىق جۋرنالىندا جاريالانادى. سونداي-اق, اتالعان عىلىمي باسپا بەتتەرىندە الىس جانە جاقىن شەتەلدىك عالىمدار دا ءوز عىلىمي ەڭبەكتەرىمەن ءبولىسىپ كەلەدى.
بۇگىندە ەكى مىڭنان استام لەيتەنانتتى قاناتتاندىرعان ينستيتۋتتا 340 تۇلەك وقۋ وزاتى اتانسا, 30 كۋرسانت "وقۋ ۇزدىگى" توسبەلگىسىمەن ماراپاتتالعان. ينستيتۋت ماقتان ەتەتىن ماماندار ەلىمىزدىڭ قارۋلى كۇشتەرىنىڭ قىراعى كۇزەتىندە.
