تاراپتار كورەيا پرەزيدەنتى مۋن چجە ءينننىڭ قازاقستانعا وتكەن جىلعى ساپارى ەلدەرىمىز اراسىنداعى ەكىجاقتى ىنتىماقتاستىققا قوسىمشا سەرپىن بەرگەنىن اتاپ ءوتتى.
كەزدەسۋدە ينفراقۇرىلىم, ونەركاسىپ, كولىك, ينۆەستيتسيالار, اۋىل شارۋاشىلىعى جانە دەنساۋلىق ساقتاۋ سالالارىنداعى ەكىجاقتى ىنتىماقتاستىقتى تەرەڭدەتۋ پەرسپەكتيۆالارى قارالدى.
قازاقستان – كورەيانىڭ ورتالىق ازياداعى ءىرى ساۋدا سەرىكتەسى. 2019 جىلى ەكى ەلدىڭ تاۋار اينالىمى 6,5 ملرد اقش دوللارىن قۇرادى. كوروناۆيرۋس پاندەمياسىنا قاراماستان كورەيا 2020 جىلدىڭ باسىنان قازاقستانمەن تاۋار اينالىمىنىڭ (4,3 ملرد دوللار) وڭ ديناميكاسىن كورسەتكەن ءتورت ەلدىڭ ءبىرى بولىپ وتىر.
تاراپتار بۇل ءتۇرلى سالالارداعى ىنتىماقتاستىقتىڭ 58 باعىتىن قامتيتىن "سامال جەل" بىرلەسكەن ەكونوميكالىق باعدارلاماسىن ىسكە اسىرۋدىڭ ناتيجەسى ەكەنىن اتاپ ءوتتى.
كورەيا بىرلەسكەن كاسىپورىندار سانى بويىنشا الىس شەت ەلدەردىڭ وندىعىنا كىردى. قازاقستاندا كورەي كاپيتالىنىڭ قاتىسۋىمەن 20 جوبا ىسكە قوسىلدى (Lotte, Hyundai, Dongil Construction (Highvill) جانە باسقالار سياقتى), سونداي-اق 30-عا جۋىق جوبا ىسكە اسىرىلىپ, پىسىقتالىپ جاتىر. جالپى, قازاقستاندا ماشينا جاساۋ, قۇرىلىس, دەنساۋلىق ساقتاۋ جانە ت. ب. سالالاردا كورەيانىڭ قاتىسۋىمەن 500-دەن استام كاسىپورىن جۇمىس ىستەيدى.
ەكى ەل اراسىنداعى ءوزارا ءىس-قيمىلدىڭ جارقىن ۇلگىلەرىنىڭ ءبىرى الماتى قالاسىندا اشىلعان "Hyundai Trans Kazakhstan" جشس زاۋىتى ەكەنىن اتاپ ءوتتى. سونداي-اق, كورەي-تۇرىك كونسورتسيۋمىنىڭ قاتىسۋىمەن ۇلكەن الماتى اينالما اۆتوجولىن ء(ۇاااج) سالۋ الماتى اگلومەراتسياسى ءۇشىن وتە ماڭىزدى.
سونىمەن قاتار, تاراپتار قازاقستان-كورەي ۇكىمەتارالىق كوميسسياسىنىڭ الداعى 9-شى وتىرىسىن ۇيىمداستىرۋ ماسەلەلەرىن تالقىلادى. مينيستر اتالعان ءىس-شارانى تابىستى وتكىزۋ ەكى ەل ىنتىماقتاستىعىن ودان ءارى دامىتۋعا جانە نىعايتۋعا ەلەۋلى ۇلەس قوساتىنىن اتاپ ءوتتى.
كەزدەسۋ سوڭىندا تاراپتار قازاقستان مەن وڭتۇستىك كورەيا اراسىنداعى ەكىجاقتى ساۋدا-ەكونوميكالىق قاتىناستاردى قارقىندى دامىتۋ ءۇشىن بار كۇش-جىگەردى جۇمساۋعا دايىن ەكەندىكتەرىن ءبىلدىردى.
