– جاڭاوزەن قالاسىندا مادەنيەت پەن ونەردىڭ ورگە باسۋى, مادەنيەت تۋىندىلارىنا قولجەتىمدىلىكتى قامتاماسىز ەتۋ, جاستاردىڭ شىعارماشىلىق قابىلەتىن ارتتىرىپ, ونەرگە باۋلۋ, ونەردىڭ وزىق ۇلگىلەرىن ناسيحاتتاۋ باعىتىنداعى مادەني ۇيىمداردىڭ سانى 10 بىرلىكتى قۇرايدى. 2020 جىلى قالا جانە ىرگەلەس ەلدى مەكەندەر تۇرعىندارى ءۇشىن ءداستۇرلى جانە اتاۋلى مەرەكەلەرگە ارنالعان 366 مادەني-كوپشىلىك شارا جوسپارلانىپ, 278-ءى جوسپارلى تۇردە ءوتتى, ونىڭ ىشىندە 211 ءىس-شارا ونلاين تۇرىندە ۇيىمداستىرىلدى.
2019 جىلى 5 ۇيىرمە قوسىلىپ, ونىڭ 4-ءى تەگىن ۇيىرمە رەتىندە اشىلدى. «ۇزاقباي جىراۋ قازجان ۇلى» مادەنيەت ۇيىندە قولونەر, تىگىن, كوركەم ءسوز جانە جىر – تەرمە ۇيىرمەلەرى, «اتامۇرا» مادەنيەت ۇيىندە بي ۇيىرمەسى ىسكە قوسىلدى, – دەيدى جاڭاوزەن قالالىق مادەنيەت جانە تىلدەردى دامىتۋ ءبولىمىنىڭ باسشىسى ۇلبازار ورىنباەۆا.
جاڭاوزەندىك ونەرپازدار ءوز باقتارىن ايتۋلى دودالاردا سىناۋدان سەسكەنبەيدى. بۇعان دەيىن تالاي ءدۇبىرلى دودالاردا جۇلدە سالعان ونەرپازدار توتەنشە جاعدايعا قاراماستان بۇل جەتىستىكتەرىن جالعاستىرىپ كەلەدى.
– ءبىز جاس ورەندەرگە جاعداي جاساپ, قابىلەتىن ۇشتاپ, تالانتىن باپتاۋعا تۇراقتى نازار اۋدارىپ كەلەمىز. جاڭاوزەندىك ونەرپاز ورەندەردىڭ ءىرى بايقاۋلاردا توپ جارىپ, جۇلدەگەر بولۋى – جاسالعان قولداۋ-قامقورلىقتىڭ ناتيجەسى. مىسالى تامىز ايىندا «الاش ونەر ورتالىعى» باستاماسىمەن ۇيىمداستىرىلعان حالىقارالىق «ALASH STAR» بايقاۋىندا, «Summer Music and Dance Fest» حالىقارالىق بايقاۋىندا, اباي قۇنانباي ۇلىنىڭ 175 جىلدىق مەرەيتويىنا ارنالعان «Talantty jastar» حالىقارالىق ونەر جانە ءبىلىم بايقاۋىندا, رەسپۋبليكالىق «دارا بالا» جۋرنالىنىڭ ۇيىمداستىرۋىمەن «تىلدەر كۇنىنە» وراي وتكىزىلگەن بايقاۋدا, وزگە دە ءىرى سايىستاردا جاڭاوزەن ورەندەرى جەرلەستەرىن دە, ۇستازدارىن دا جەرگە قاراتقان جوق. بۇل جاقسى ءداستۇر جالعاسىن تابارىنا سەنىمدىمىز, – دەيدى ءبولىم باسشىسى.
مۇنايلى قالاداعى ورتالىق كىتاپحانا – كىتاپقۇمارلاردىڭ سۇيىكتى ورنى. «رابيس» رەسپۋبليكالىق اۆتوماتتاندىرىلعان كىتاپحانالىق اقپاراتتىق جۇيە باعدارلاماسىنا ەنگىزىلگەن كىتاپحانادا قازاقشا كىتاپتار قورى مول.
جاڭاوزەن قالاسىنداعى بىرەگەي مادەني جانە رۋحاني وشاق – «مۇنايشى» مادەنيەت ءۇيى 1980 جىلى قولدانىسقا بەرىلگەن بولاتىن. 2001-2002 جىلعى رەكونسترۋكتسيادان وتكەن مادەنيەت ۇيىنە قازىرگى كەزدە «وزەنمۇنايگاز» اق دەمەۋشىلىگىمەن «KazPetroCon» جشس جوندەۋ جۇمىستارىن جاساۋدا. جوسپار بويىنشا جوندەۋ جۇمىستارى بيىل كۇزدە اياقتالىپ, بارلىق قۇرال-جابدىقتارىمەن تاپسىرىلادى دەپ كۇتىلۋدە.
اۋىلدىق جەرلەردىڭ الەۋمەتتىك ورتاسىن جاڭعىرتۋ قاجەتتىلىگىنە بايلانىستى ەلباسى ن.نازارباەۆ «اۋىل – ەل بەسىگى» ارنايى جوباسىن ىسكە اسىرۋدى تاپسىرعان بولاتىن. وسى جوبا اياسىندا جاڭاوزەن قالاسىنداعى راحات اۋىلىندا 300 ورىندىق مادەنيەت ءۇيىنىڭ قۇرىلىسى باستالدى. قازىرگى تاڭدا ءبىرىنشى قاباتى تۇرعىزىلىپ, قاباتارالىق جابىندىسى سالىنىپ, ەكىنشى قاباتتىڭ تاس قالاۋ جۇمىستارى باستالدى. جالپى كولەمى 3 473 شارشى مەتردى قۇرايتىن بۇل مادەنيەت ۇيىندە كىتاپحانا مەن 40 ادامعا ارنالعان وقىرمان زالى بولادى. كەلەسى جىلى كوكتەمدە پايدالانۋعا بەرۋ جوسپارلانعان 300 ورىندىق مادەنيەت ءۇيى 43 مىڭنان اسا تۇرعىنى بار ەلدى مەكەندەگى العاشقى مادەني كوپشىلىك نىسان بولماق.
سونداي-اق ماڭعىستاۋ وبلىسى جاڭاوزەن قالاسىنىڭ الەۋمەتتiك-ەكونوميكالىق دامۋىنىڭ 2019-2025 جىلدارعا ارنالعان كەشەندى جوسپارى نەگىزىندە جاڭاوزەن قالاسىندا 40 مىڭ دانا قۇجات ساقتاۋعا ارنالعان «مەملەكەتتىك ءارحيۆتىڭ ۇلگى عيماراتىن سالۋ» قۇرىلىسى جالعاسۋدا. قازىرگى تاڭدا عيماراتتىڭ جىلۋ ۇنەمدەۋ قازاندىقتارى ورناتىلىپ, توبەسىنە بەتون جابىندىسى توسەلدى. سونىمەن قاتار كاناليزاتسيالىق سۋ قۇبىرلارى مەن نىساننىڭ ىشكى بولىگىنە توق جۇرگىزىلۋدە. ورىنداۋشى مەردىگەر «وڭداسىن ستروي» جشس بيىل قازان ايىنىڭ سوڭىنا دەيىن قۇرىلىستى اياقتاپ, تۇرعىندار يگىلىگىنە بەرۋدى جوسپارلاپ وتىر.
ءبولىم باسشىسىنىڭ ايتۋىنشا, جاڭاوزەن مادەنيەتىندەگى جاڭالىقتار از ەمەس ەكەن. الداعى جىلدارعا ارنالعان جوبالار ىشىندە بىرقاتار مادەني عيماراتتار سالۋ جوسپارلانۋدا. 2012-2020 جىلدارعا ارنالعان كەشەندى جوسپار اياسىندا جاڭا «وقۋشىلار شىعارماشىلىق ءۇيى», 200 كىتاپ قورى ساقتالاتىن كىتاپحانا قۇرىلىسىن سالۋ ءۇشىن اۋدانى 0,2 گا جەر ۋچاسكەسى ءبولىنىپ, جالپى سمەتالىق قۇنى جاساقتالعان. سونداي-اق وبلىستىق مۋزەي فيليالى قۇرىلىسىن سالۋ ءۇشىن اۋدانى 0,39 گا جەر ۋچاسكەسى ءبولىنىپ, جالپى سمەتالىق قۇنى جاساقتالىپ, مەملەكەتتىك ساراپتامادان ءوتتى. عيماراتتاردىڭ قۇرىلىستارىن 2021 جىلى باستاۋ جوسپارلانۋدا.
جاڭاوزەندەگى مادەنيەت سالاسىنىڭ جۇمىسىندا جاڭارۋ بارى بايقالدى. ال سالا باسشىلىعى مۇنى مادەنيەت ءبولىمى تاراپىنان جاسالىپ جاتقان جۇمىستار لەگى قازىرگى احۋالدىڭ قيىندىعىنا قاراماستان توقتامايتىندىعىمەن, ويتكەنى حالىقتىڭ رۋحاني دامۋىنىڭ وركەندەۋىنە ەشنارسە كەدەرگى بولماۋى قاجەتتىگىمەن ءتۇسىندىردى.
ماڭعىستاۋ وبلىسى
