سوڭعى تاۋلىكتە اقتوبە وبلىسىندا 1 ادامنان كوروناۆيرۋس ينفەكتسياسى انىقتالدى. 31 جاستاعى اقتوبە تۇرعىنى پروفيلاكتيكالىق ماقساتتا تەكسەرىلگەن. پتر-سىناماسى ونىڭ ۆيرۋس جۇقتىرعانىن كورسەتكەن. بۇگىنگە دەيىن وڭىردە بارلىعى 3 مىڭنان استام ادام ۆيرۋس جۇقتىرسا, ولاردىڭ 98 پايىزى جازىلىپ شىقتى.
"شەكارالاردا شەكتەۋ شاراسى كۇشەيتىلدى. اقتوبە وبلىسىندا ەكى شەكارا بەكەتى بار. قارعالى مەن مارتوك ارقىلى 6-14 قازان ارالىعىندا 3600-دەن استام ادام ءوتتى. ونىڭ ىشىندە انىقتاما قۇجاتى بولماعان 594 ادامنان پتر-سىناما الىنىپ, ەكەۋىنىڭ ناتيجەسى وڭ بولىپ شىقتى. ولار وقشاۋلانىپ, ەم الۋدا. كورسەتكىش كەيبىر وبلىستا اسىپ كەتىپ جاتىر. شەكتەۋ دە كۇشەيتىلگەن. اقتوبە وبلىسىندا ەپيدەميولوگيالىق جاعداي تۇراقتى. ەگەر بۇعان دەيىنگى قاۋلىدا بەكىتىلگەن تالاپتى ساقتاپ, سانيتارلىق ەرەجەنى ۇستاناتىن بولساق, جاڭا قاۋلى قابىلدانبايدى. كورسەتكىشتى ساقتاپ قالۋ ءوزىمىزدىڭ قولىمىزدا. بەتپەردە تاعىپ, الەۋمەتتىك اراقاشىقتىقتى ساقتاۋ قاجەت", دەدى نۇرسۇلۋ بەركىمباەۆا.
ايتا كەتەيىك, وبلىستا كارانتين تالاپتارىنىڭ ساقتالۋىن تەكسەرەتىن مونيتورينگىلىك توپتار جۇمىس ىستەيدى. بارلىعى 1 مىڭعا جۋىق حاتتاما تولتىرىلىپ, 82 ميلليون تەڭگەدەن استام ايىپپۇل سالىندى. ەسكە سالساق, وڭىردە قاجەتتىلىك تۋىنداعان جاعدايدا توسەك-ورىن سانى 315-تەن 3603-كە دەيىن ۇلعايتىلماق. 6 قازاننان باستاپ ا.دوسجانوۆا جاتاقحاناسى, جايساڭ كوپسالالى كوللەدجى, قارعالى اۋدانىنىڭ الىمبەت مەكتەپ-ينتەرناتىنان 440 ورىندىق 3 ستاتسيونار ىسكە قوسىلدى. وبلىستاعى 1547 توسەك-ورىننىڭ 1438-ءى, ياعني, 93% وتتەگىمەن قامتىلعان.
