2020 جىل قر پرەزيدەنتىنىڭ جارلىعىمەن ەرىكتىلەر جىلى بولىپ جاريالاندى.
مۇقتاج ادامدارعا كومەك كورسەتۋ قاجەتتىلىگى - قوعامدىق سانا مەن جاۋاپكەرشىلىكتىڭ كورىنىسى. نۇر-سۇلتاندا مۇنداي يگى ءىستى "استانا جاستارى" رەسۋرستىق ورتالىعى جانىنداعى ەرىكتىلەردىڭ قالالىق شتابىندا جۇزەگە اسىرۋعا بولادى. ەرىكتىلەر قاتارىنا كىرۋ ءۇشىن ەرىكتىلەر مەكتەبىندە وقۋدىڭ ءۇش كەزەڭىنەن ءوتۋ كەرەك.
"الدىمەن العاشقى مەديتسينالىق كومەك كورسەتۋدى ۇيرەتەتىن كىرىسپە كۋرستان ءوتۋ كەرەك, ءتۇرلى پسيحولوگيالىق ترەنينگتەر وتكىزىلەدى ياعني جالپى دايىندىق جۇرگىزىلەدى", – دەدى نۇر-سۇلتان قالاسى اكىمدىگىنىڭ "استانا جاستارى" جرو باسشىسى شىڭعىس تىلەۋلين.
العاشقى دايىندىق شامامەن ون ساباق الادى. ءارى قاراي, ەرىكتىلەر ءتۇرلى باعىتتار بويىنشا بولىنگەن كەزدە مامانداندانادى.
"تج كەزىندە كومەك بەرۋگە نيەت بىلدىرۋشىلەر ماماندارمەن دايىندالىپ, وقۋ جيىندارىنان وتەدى. سونداي-اق حالىقارالىق ۆولونتەرلەر مەن الەۋمەتتىك ۆولونتەرلەر ءۇشىن وقىتۋ جۇرگىزىلەدى. سودان كەيىن تىكەلەي اكتسيا وتكىزۋ كەزىندە پراكتيكالىق ساباقتار وتەدى", - دەپ ءتۇسىندىردى شىڭعىس تىلەۋلين.
ونىڭ مالىمەتىنشە, بيىل مەكتەپتە 300-گە جۋىق ەرىكتىنى وقىتۋ جوسپارلانعان.
ايتا كەتەيىك, ەلوردالىق ەرىكتىلەر شتابى ءتۇرلى باعىتتار بويىنشا جۇمىس جۇرگىزۋدە. مىسالى, "قامقورلىق مەكەنجايى" جوباسى اياسىندا بالالار جالعىزباستى زەينەتكەرلەر مەن ارداگەرلەرگە قار باسقان اۋلالاردى تازارتۋ, پاتەرلەر مەن اۋماقتاردى تۇرمىستىق قوقىستاردان تازارتۋ, باقشالاردى وتىرعىزۋعا دايىنداۋ سياقتى كومەك كورسەتەدى.
ەلدە توتەنشە جاعداي ەنگىزىلگەننەن كەيىن قالالىق شتاب جەدەل جۇمىس رەجيمىنە كوشتى. ءۇش اي بويى كۇن سايىن 500 بەلسەندى ۆولونتەر جۇمىلدىرىلدى, 2 000 ەرىكتى رەزەرۆتە تۇردى. وسى ۋاقىت ىشىندە ەرىكتىلەر مۇقتاج وتباسىلارعا ازىق-ت ۇلىك سەبەتتەرىن, ءبىرىنشى قاجەتتىلىكتەگى تاۋارلارمەن جانە انتيسەپتيكالىق قۇرالدارمەن قامتاماسىز ەتتى, مەملەكەتتىك الەۋمەتتىك كومەكتى تاراتۋ بويىنشا جۇمىستار اتقاردى. سونداي-اق, بالالار اۋداندىق ەمحانالاردىڭ ەسەبىندە تۇرعان مۇمكىندىگى شەكتەۋلى, ەگدە جاستاعى ادامدارعا قاجەتتى ءدارى-دارمەكتەردى جەتكىزۋمەن اينالىستى. ەلوردالىق پوليتسيا دەپارتامەنتىنىڭ وكىلدەرىمەن بىرگە كارانتين رەجيمىن بۇزعاندارعا ءتۇسىندىرۋ جۇمىستارىن جۇرگىزدى. بانك بولىمشەلەرىندە الەۋمەتتىك قاشىقتىقتى ەسكەرە وتىرىپ كەزەك ۇيىمداستىردى.
مەديتسينالىق ەرىكتىلەر كوروناۆيرۋس جۇقتىرعان ناۋقاستاردى ەمدەيتىن دارىگەرلەرگە تەگىن كومەكتەستى.
بۇعان دەيىن ەرىكتىلەر ارىستى قالپىنا كەلتىرۋگە اتسالىسىپ, ماقتاارال اۋدانىنداعى سۋ تاسقىنىنان زارداپ شەككەندەرگە گۋمانيتارلىق كومەك جينادى, قازاقستان استاناسىندا وتكەن حالىقارالىق ءىس-شارالارعا قاتىستى.
ۇيىم جۇمىس ىستەگەن بارلىق ۋاقىت ىشىندە ياعني 2014 جىلدان باستاپ شامامەن 2,5 مىڭ ادام وقىتىلدى.
