ءىس-شارانى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى, "قۇلانشى" زاماناۋي ونەر ورتالىعى, قازاقستاننىڭ شىعارماشىلىق باستاۋلارى مەن مادەني مۇراسىن قولداۋ جونىندەگى "بايتا" قايىرىمدىلىق قورى, نۇر-سۇلتان قالاسى ءبىلىم باسقارماسى, پەداگوگ سۋرەتشىلەر حالىقارالىق وداعىنىڭ (رف) قازاقستانداعى وكىلدىگى, ەۋرازيا ونەر اكادەمياسى, بالالار كوركەمسۋرەت مەكتەبى – نۇر-سۇلتان قالاسى يۋنەسكو كلۋبى; "ForteBank" اق مەن "لەوناردو" حوببي گيپەرماركەتىنىڭ قولداۋىمەن ۇيىمداستىردى.
"تۋعان جەرىم" اتتى بالالار مەن جاسوسپىرىمدەر شىعارماشىلىعى بايقاۋىنىڭ جۇمىسى 2004 جىلدان باستاۋ الادى. 2006 جىلى سايىس جاڭا جوبالىق دەڭگەيگە كوتەرىلەدى. جەڭىمپازداردى ماراپاتتاۋ ءراسىمى مەن توپ جارعان ۇمىتكەرلەر جۇمىستارىنىڭ كورمەسىن قازاقستان رەسپۋبليكاسى تۇڭعىش پرەزيدەنتى – ەلباسى مۋزەيىندە وتكىزۋ, بايقاۋ كاتالوگىن باسىپ شىعارۋ سياقتى مەكەمەنىڭ يگى داستۇرىنە اينالادى.
جوبا جەر بەتىنىڭ بالالارىن قازاقستاننىڭ مادەنيەتى مەن ونەرىمەن تانىستىرۋدى, ولاردىڭ جەكە قابىلەتى مەن شىعارماشىلىق الەۋەتىن تەرەڭدەتۋدى كوزدەيدى. كەسكىندەمە مەن ءمۇسىننىڭ, ساندىك-قولدانبالى ونەردىڭ ءتۇرلى تەحنيكاسىمەن ورىندالعان ۇمىتكەرلەردىڭ تۋىندىلارى بۇگىنگى كوركەم ونەردەگى بالالار شىعارماشىلىعىن جان-جاقتى اشىپ, بايقاۋ جۇمىستارىنا جەتەكشىلىك ەتكەن پەداگوگتاردىڭ كاسىبي شەبەرلىگىن كورسەتەدى.
"وتكەن شاق, وسى شاق, كەلەر شاق", "تۋعان ولكەم", "ۇلتىمنىڭ داستۇرلەرى", "ەرمەگىم", "مەن سۋرەتشىمىن" تاقىرىبىندا ۇسىنىلعان 400-دەن استام جۇمىستى بيىلعى سايىسقا قازاقستان, رەسەي, تاتارستان, باشقورتستان, وزبەكستان, ۋكراينا, ازەربايجان, بەلارۋس ەلدەرىنىڭ وكىلدەرى جىبەرگەن.
"بۇل باستامانى تۇڭعىش پرەزيدەنت مۋزەيى قولداعان العاشقى ساتتەردەن باستاپ تەك بالالار شىعارماشىلىعى عانا ونەردىڭ ەڭ ءبىر تازا جانە ەڭ ءبىر شىنايى ءتۇرى بولاتىنى تۋرالى وي ءبىزدى العا جەتەلەدى. جاس قاتىسۋشىلارىمىزدىڭ جۇمىستارى ءبىزدى وسى شىعارماشىلىق جولدا توقتاپ قالماي, ونى جىل سايىن جالعاستىرا بەرۋىمىزگە شابىتتاندىرادى. ءدال سول سەبەپتى دە ەلباسى كىتاپحاناسى بالالار شىعارماشىلىعىن قولداۋمەن اينالىسۋدان جالىقپايدى. ءبىز بايقاۋ قاتىسۋشىلارىنا شەكسىز العىسىمىز بەن ريزاشىلىعىمىزدى بىلدىرەمىز", دەدى ەلباسى كىتاپحاناسى ديرەكتورىنىڭ ورىنباسارى كۇلايشا اقتاەۆا,
قازىلار القاسىنىڭ, بايقاۋ ۇيىمداستىرۋ كوميتەتىنىڭ مۇشەسى, "قۇلانشى" زاماناۋي ونەر ورتالىعىنىڭ ديرەكتورى ءلايلا ماحاتتىڭ ايتۋىنشا, قاي كوركەم جۇمىسقا قانداي ورىن بەرۋ ماسەلەسى قاشان دا وڭاي شارۋا ەمەس.
"ال بالالار شىعارماشىلىعىنا باعا بەرۋ ءتىپتى قيىن. ءاربىر بالا ءوز جۇمىسىن جانىن بەرە, بار جۇرەگىمەن بەرىلە ورىندايدى, بۇل دا ۇلكەن سىناق. الايدا ەگەر بالالار سۋرەتشى بولامىن دەسە بۇعان داعدىلانۋعا تۋرا كەلەدى, سەبەبى سۋرەتشى ەڭبەگىن كورەرمەن, جازۋشى ەڭبەگىن وقىرمان باعالايدى ەمەس پە؟! مەن بايقاۋدا قويىلاتىن جۇمىستار ساپاسىنا قاتتى كوڭىلىم تولادى جانە قاتىسۋشىلاردىڭ جۇمىسىنىڭ كوپتىگى مەن ولاردىڭ جان-جاقتان قاتىسۋى تاڭقالدىرادى. وسى بايقاۋعا قاتىسۋ ءۇشىن ءوز جۇمىستارىن قورىقپاي جىبەرگەندەردىڭ بارلىعىن قۇتتىقتايمىن", – دەپ اتاپ ءوتتى ول ءوز سوزىندە.
8-10 جاس ارالىعىنداعى ساناتتا ءىىى ورىندى سوفيا نيكۋلينا (دولگوپرۋدنىي, رەسەي), ۆالەريا الەكسەەنكو (بارناۋل, رەسەي), ءسۇريا ساپار (نۇر-سۇلتان, قازاقستان); ءىى ورىندى الەكسەي ليتۆينتسەۆ (بوريسوۆ, بەلارۋسسيا), الينا پورحاچەۆا (مۋروم, رەسەي); ءى ورىندى سوفيا مورگۋن (دونەتسك وبلىسى, ۋكراينا) يەلەندى. گران-ءپريدى ماتۆەي كرىلوۆ (لەنينوگورسك, تاتارستان) قانجىعاسىنا بايلادى.
"مەن جەڭىسكە جەتكەنىمە وتە قۋانىشتىمىن, قازىرگى ەموتسيامدى سوزبەن ايتىپ جەتكىزۋ مۇمكىن ەمەس. مەن وسىنداي ءىرى حالىقارالىق بايقاۋدا ءوز ەلىمدى تانىستىرعانىما باقىتتىمىن. ۇيىمداستىرۋشىلار مەن قازىلار القاسىنا راقمەت!" – دەپ بەلارۋس ەلىنەن 10 جاسار الەشا ليتۆينتسەۆ ءوز اسەرىمەن ءبولىستى.
11-13 جاس ارالىعىنداعى ساناتتا ءىىى ورىننىڭ جۇلدەگەرى بولىپ سوفيا پەچەنسكيح (كامەنسك-ۋرالسك, رەسەي), دانيل تەرەحوۆ (سالاۋات, باشقۇرتستان), الينا يۆشينا (يگرا, ۋدمۋرتيا), داريا نوۆيكوۆا (ۋسولە-سيبيرسكوە, رەسەي), ءسۇيىنشى ءجاميلا (نۇر-سۇلتان, قازاقستان) جاريالانسا, ءىى ورىن جەڭىمپازى رەتىندە ۋليانا لوگينوۆا (نوۆوسيبيرسك, رەسەي), دينا ماۋلەن (پەتروپاۆل, قازاقستان), ۆيكتوريا ياكوۆلەۆا (ەلابۋگا, تاتارستان), ايگەرىم ەسكەندىروۆا (بادامشا اۋىلى, قازاقستان) مويىندالدى. ءى ورىندى اناستاسيا شەلياپا (سۆەردلوۆ وبلىسى, رەسەي), جانسايا بەردىباي (شىمكەنت, قازاقستان), ساعدات توقتاەۆا (شاحريسابز, وزبەكستان); باس جۇلدەنى ءدىلنۇر اقپاەۆا (سول-يلەتسك, رەسەي) مەن ۆيكتوريا ساۆەلەۆا (ماگنيتوگورسك, رەسەي) يەلەندى.
14-16 جاس ارالىعىنداعى جەڭىمپازدار قاتارىندا ءىىى ورىن جۇلدەگەرلەرى اقبوتا قاسەنوۆا (ستەپنوگورسك, قازاقستان) مەن انەل پرۋدنيكوۆا (پاۆلودار, قازاقستان); ءىى ورىن جەڭىمپازدارى ۆارۆارا ماتۆەەۆا (شۋيا, رەسەي), ديانا پەتراچەۆا (ەكىباستۇز, قازاقستان), ۆالەريا شتىرەۆا (ليساكوۆسك, قازاقستان), اننا چەن (نۇر-سۇلتان, قازاقستان); ءى ورىن يەگەرلەرى الەكساندرا ەفرەموۆا (ەكاتەرينبۋرگ, رەسەي), ەكاتەرينا كريۆلەۆا (رۋدنىي, قازاقستان), راي نينا (ۆولگودونسك, رەسەي); باس جۇلدەلى جەڭىمپازدار سەۆينچ بوتيروۆ (شاحريسابز, وزبەكستان), ايىم سەيىلحان (اقتوبە, قازاقستان) بار.
"ارينە, مەن ءوز كۇشىمە سەندىم, جەڭگىم كەلدى, بىراق بۇل مەن ءۇشىن كۇتپەگەن ءسات بولعاندىقتان قوبالجىپ تا تۇرمىن. وسىنداي مۇمكىندىك بەرگەنى ءۇشىن ءبىزدىڭ كەرەمەت ونەر مەكتەبىنە العىس ايتقىم كەلەدى. بارلىق قاتىسۋشىلارعا تابىس تىلەيمىن!" – دەدى اننا چەن.
ۇيىمداستىرۋشىلار بايقاۋ لاۋرەاتتارى ديپلومدار مەن سىيلىقتاردى پوشتا ارقىلى الاتىنىن اتاپ ءوتتى.
"وسىمەن توقتاپ قالماڭىزدار. سىزدەردى بۇدان ءارى دە العا جەتەلەيتىن كىشكەنتاي ارماندارىڭىزدى, قۋانىشتارىڭىز بەن تاجىريبەلەرىڭىزدى وسى باستان جيناي بەرىڭىزدەر. سىزدەرگە سەنىم ارتىپ, قولداۋ بىلدىرەتىن اتا-انالارىڭىزعا جانە تالانتتارىڭىزدى كورىپ, ونى اشا تۇسەتىن, سول ءۇشىن بارىن سالاتىن پەداگوگتارىڭىزعا دا كوپ راقمەت. سىزدەردىڭ بۇلاي تالاپتانىپ, العا ۇمتىلۋىڭىز قوعام ءۇشىن, ءبىز ءۇشىن قاجەت. سۋرەت سالىڭىزدار, تاڭ قالدىرىڭىزدار, شابىت سىيلاڭىزدار, ءسويتىپ الەمگە شۋاق شاشىڭىزدار!" – دەدى قاتىسۋشىلارعا ايتقان سوزىندە "بايتا" شىعارماشىلىق باستامالار مەن مادەني مۇرا قايىرىمدىلىق قورىنىڭ ديرەكتورى سۆەتلانا ماحات.
ۇزدىك جۇمىس رەتىندە مويىندالعان جەڭىمپازداردىڭ تۋىندىلارىن ەلوردا تۇرعىندارى مەن قوناقتارى تۇڭعىش پرەزيدەنت – ەلباسى كىتاپحاناسىنىڭ مۋزەيىندە تاماشالاي الادى. ولار ءبىر ايدىڭ كولەمىندە ۇيىمداستىرۋشى مەكەمەلەردىڭ رەسمي سايتىندا دا قولجەتىمدى بولماق.
