"رۋحاني جاڭعىرۋ" قازاقستاندىق قوعامدىق دامۋ ينستيتۋتى "قازاقستان جاستارى – 2020" ۇلتتىق بايانداماسىنىڭ جوباسىن جەتىلدىرۋ ءۇشىن ەلىمىزدىڭ وزىق ويلى ساراپشىلارىنىڭ باسىن قوسىپ, قوعامدىق تالقىلاۋ وتكىزدى.
ساراپشىلارمەن بىرلەسىپ دايىندالعان "جاستار" عىلىمي-زەرتتەۋ ورتالىعىنىڭ بۇل جوباسىندا دەموگرافيا, دەنساۋلىق, ءبىلىم بەرۋ, قوعامدىق-ساياسي احۋال جانە الەۋمەتتىك-ەكونوميكالىق ورتانىڭ ماڭىزدى ماسەلەلەرى كوتەرىلگەن. "رۋحاني جاڭعىرۋ" قازاقستاندىق قوعامدىق دامۋ ينستيتۋتىنىڭ باسقارما توراعاسى دانيار ەسيننىڭ ايتۋىنشا, بۇگىندە ۇلتتىق بايانداما "جاستار" عزو-نىڭ برەندىنە اينالعان. ناقتى ايتقاندا, بۇل زەرتتەۋلەرگە مەملەكەتتىك جانە جەرگىلىكتى اتقارۋشى ورگانداردان باستاپ, باسقا دا قوعامدىق ينستيتۋتتار سۇيەنەدى.
"اقپارات جانە قوعامدىق دامۋ مينيسترلىگىنىڭ تاپسىرىسىمەن دايىندالعان "قازاقستان جاستارى - 2020" ۇلتتىق بايانداماسى "جاستار" عىلىمي-زەرتتەۋ ورتالىعىنىڭ نەگىزگى قۇجاتى سانالادى. ياعني, جاستار اراسىنداعى وزەكتى پروتسەستەردى بولجاۋ, مەملەكەتتىك جاستار ساياساتىن قازىرگى زامان ساياساتىنا بەيىمدەۋ جانە جاستاردى قوعامنىڭ الەۋمەتتىك-ەكونوميكالىق پروتسەستەرىنە قاتىسۋىن ارتتىرۋ ماسەلەرىن قاراستىرادى. جالپى, "قازاقستان جاستارى" ۇلتتىق بايانداماسى سەگىزىنشى جىل دايىندالىپ كەلەدى. وسى ارالىقتا قازاقستاندىق جاستاردى دامىتۋدىڭ ءتۇرلى وزەكتى ماسەلەلەرى قامتىلدى. بۇل جاستار ءومىرىنىڭ نەگىزگى باعىتتارى مەن جاعدايىن جان-جاقتى تالداۋعا مۇمكىندىك بەرەدى", - دەپ اتاپ ءوتتى دانيار ەسين.
ۇلتتىق بايانداما جاستاردىڭ دەموگرافيالىق سيپاتتامالارى, جاستاردىڭ دەنساۋلىعى مەن بوس ۋاقىتى, جاستار ومىرىندەگى ءبىلىم مەن عىلىم, جاستاردىڭ الەۋمەتتىك-ەكونوميكالىق جاعدايى, قازىرگى جاستاردىڭ قۇندىلىق باعدارلارى مەن مۇددەلەرى, قوعامدىق-ساياسي پروتسەستەردەگى جاستار, جاستار ورتاسىنداعى قىلمىس جانە جاستار ساياساتى سياقتى نەگىزگى 8 نەگىزگى تارماقتى قامتيدى.
جالپى, "قازاقستان جاستارى – 2020" ۇلتتىق بايانداماسىن تالقىلاۋعا مەملەكەتتىك ورگانداردىڭ, عىلىمي-زەرتتەۋ قوعامداستىعىنىڭ, جاستار ۇيىمدارى مەن رەسۋرستىق ورتالىقتاردىڭ وكىلدەرى قاتىستى. ماسەلەن, ۇلتتىق باياندامانىڭ جۇمىسىنا قاتىسقان جانە جاستار ورتاسىنداعى قىلمىس تاقىرىبىن زەرتتەگەن PhD دوكتورى ءمادي شاكەنوۆتىڭ ايتۋىنشا, زەرتتەۋ بارىسىندا اكادەميالىق جۇمىستار مەن ستاتيستيكالىق دەرەكتەر جانە حالىقارالىق تاجىريبەگە قاتىستى ءتۇرلى ماتەريالدار قاراستىرىلعان.
"قازاقستاندا كامەلەتكە تولماعانداردى قۇقىقتىق قورعاۋدىڭ, يۋۆەنالدى قىلمىستىڭ الدىن الۋدىڭ جولدارى ويلاستىرىلعانىمەن جۇزەگە اسىرىلۋى قيىنداۋ ەكەنىنە زەرتتەۋ بارىسىندا كوز جەتكىزدىم. جاي عانا ءۇستىرت قاراپ-اق بۇل سالادا كوپتەگەن سايكەسسىزدىكتەردى كورۋگە بولادى", - دەپ ءسوزىن قورىتىندىلادى ءمادي شاكەنوۆ.
ۇلتتىق باياندامانىڭ جوباسىن كوپشىلىككە "جاستار" عزو ديرەكتورى ايان ساكوشەۆ تانىستىردى. تانىستىرىلىم بارىسىندا ساكوشەۆ سوڭعى بەس جىلدا قازاقستاندا جاستاردىڭ ازايعانىن, سونىڭ سالدارى بۇل تۋ جانە وتباسىن قۇرۋ سياقتى باسقا دا الەۋمەتتىك-دەموگرافيالىق كورسەتكىشتەرگە اسەر ەتىپ جاتقانىن اتاپ ءوتتى. الايدا, ساراپشىلاردىڭ بولجامى بويىنشا جاستار سانىنىڭ ءوسۋى 2025 جىلدان كەيىن كۇتىلىپ وتىر.
"ۇلتتىق بايانداما جوباسىن جاساۋدا ساراپشىلار ۇسىنعان ۇسىنىستار مەن تۇجىرىمدارعا ەرەكشە نازار اۋدارىلدى. ساراپتامالىق تالقىلاۋدىڭ نەگىزگى ماقساتى – ۇلتتىق باياندامانىڭ ماڭىزدىلىعىن ارتتىرىپ, ساپاسىن جاقسارتۋ. ويتكەنى, ءبىرىنشى كەزەكتە, ۇلتتىق بايانداما تەك اناليتيكالىق قۇجات قانا ەمەس, سونىمەن قاتار, قولدانبالى قۇجات بولعانىن قالايمىز", - دەدى ءوز كەزەگىندە ايان ساكوشەۆ.
ۇلتتىق بايانداما بيىل جەلتوقساندا جاريالانادى دەپ كۇتىلۋدە. ايتا كەتەيىك, 2013 جىلدان باستاپ 2019 جىلعا دەيىنگى ۇلتتىق باياندامالار "جاستار" عىلىمي-زەرتتەۋ ورتالىعىنىڭ eljastary.kz رەسمي ينتەرنەت-رەسۋرسىندا قولجەتىمدى.
