«وتىنىشتەر 28 قىركۇيەكتەن 7 قازانعا دەيىن zhilfond.kz سايتىندا ەلەكتروندى فورماتتا قابىلداندى. قابىلداۋ كەزەڭىنىڭ ناتيجەسىندە 4635 ءوتىنىش كەلىپ ءتۇستى. ونىڭ 2030-ى – ءبىلىم سالاسى قىزمەتكەرلەرىنەن, 723-ءى – دەنساۋلىق ساقتاۋ, 209-ى – مادەنيەت, 84-ءى – سپورت, 668-ءى – الەۋمەتتىك قورعاۋ, 613-ءى – پوليتسيا دەپارتامەنتى, 308-ءى – توتەنشە جاعدايلار دەپارتامەنتىنىڭ قىزمەتكەرلەرى», – دەدى بريفينگ بارىسىندا نۇر-سۇلتان اكىمدىگىنىڭ «تۇرعىن ءۇي قورى» كمم تۇگەندەۋ جانە ەسەپكە الۋ ءبولىمى باسشىسى مارتا ءالنيازوۆا.
بارلىق ءوتىنىش بەرۋشىلەر كەلەسى ساناتتار بويىنشا كەزەكتە تۇر: «مەملەكەتتىك قىزمەتشىلەر, بيۋدجەتتىك ۇيىمدار قىزمەتكەرلەرى», «كوپ بالالى انالار, كوپ بالالى وتباسىلار», «اپاتتى ءۇي», «حالىقتىڭ الەۋمەتتىك وسال توپتارى» (مۇگەدەك بالالاردى تاربيەلەپ وتىرعان وتباسىلار, مۇگەدەكتەرگە جانە ۇوس قاتىسۋشىلارىنا تەڭەستىرىلگەندەر, 1 جانە 2 توپ مۇگەدەكتەرى, سوزىلمالى اۋرۋلارمەن اۋىراتىن ادامدار, جاسى بويىنشا زەينەتكەرلەر, ورالماندار جانە تولىق ەمەس وتباسىلار).
بۇگىندە كەلىپ تۇسكەن وتىنىشتەر قارالۋدا. باعدارلاماعا قاتىسۋشىلاردى ىرىكتەۋ كەزەككە قويىلعان كۇنگە سايكەس جۇزەگە اسىرىلادى. تۇرعىن ءۇيدى نۇر-سۇلتان قالاسى اكىمدىگىنىڭ جانىنداعى تۇرعىن ءۇي كوميسسياسى بولەدى.
تىلەنديەۆ داڭعىلىندا, سارىبۇلاق بويىندا ورنالاسقان «جاڭا قونىس» تۇرعىن ءۇي كەشەنىنەن جانە س.تورايعىروۆ كوشەسىندە ورنالاسقان «زامەچاتەلنىي»تۇرعىن ءۇي كەشەنىنەن 224 پاتەردى جالعا بەرۋ جوسپارلانعان.
الەۋمەتتىك تۇرعىن ءۇي الۋشىلارى اي سايىن جالداۋ شارشى مەترى ءۇشىن 1455 تەڭگە تولەۋى كەرەك. ەڭ كوپ جالداۋ مەرزىمى – 20 جىل. ول اياقتالعاننان كەيىن تۇرعىن ءۇي جالعا الۋشىنىڭ مەنشىگىنە وتەدى.
ەسكە سالا كەتەيىك, قازاقستان رەسپۋبليكاسى ۇكىمەتىنىڭ 2019 جىلعى 31 جەلتوقسانداعى №1054 قاۋلىسىمەن 2020-2025 جىلدارعا ارنالعان «نۇرلى جەر» تۇرعىن ءۇي-كوممۋنالدىق دامۋىنىڭ مەملەكەتتىك باعدارلاماسى بەكىتىلگەن بولاتىن. ونىڭ باعىتتارىنىڭ ءبىرى – «قازاقستاننىڭ يپوتەكالىق كومپانياسى» يپوتەكالىق ۇيىمى» اكتسيونەرلىك قوعامى ارقىلى ساتىپ الۋ قۇقىعىمەن جالعا بەرىلەتىن تۇرعىن ءۇيدى ساتۋ.
بيىل ناۋرىز ايىندا نۇر-سۇلتان اكىمدىگى مەن «قازاقستاننىڭ يپوتەكالىق كومپانياسى» اق اراسىندا اكىمدىككە ۆەدومستۆولىق باعىنىستاعى ءبىلىم بەرۋ, دەنساۋلىق ساقتاۋ, مادەنيەت, سپورت جانە الەۋمەتتىك قىزمەت كورسەتۋ ۇيىمدارىنىڭ, سونداي-اق كوممۋنالدىق تۇرعىن ءۇي قورىنان تۇرعىن ۇيگە مۇقتاج رەتىندە تىركەلگەن پوليتسيا جانە توتەنشە جاعدايلار دەپارتامەنتتەرى قىزمەتكەرلەرى ءۇشىن جالعا بەرىلەتىن تۇرعىن ءۇيدى ساتۋ تۋرالى كەلىسىمگە قول قويىلدى.
